ކޮޕާ ޑެލަރޭ: ރަށުން ބޭރުގައި ބަލިވި ނަަމަވެސް ބާސެލޯނާ ކަޓުވާލުމަށްފަހު އެތްލެޓިކޯ މެޑްރިޑް ފައިނަލުން ޖާގަ ހޯދައިފި

ކޮޕާ ޑެ ލަރޭ ފުޓްބޯޅަ މުބާރާތުގެ ސެމީފައިނަލް ފުރަތަމަ މެޗުގެ ދެވަނަ ލެގުގައި ރޭ ރަށުން ބޭރުގައި 3-0 ގެ ނަތީޖާއަކުން ބަލިވި ނަމަވެސް މުބާރާތުގެ ފައިނަލުގެ ފުރަތަމަ ޖާގަ އެތްލެޓިކޯ މެޑްރިޑުން ކަށަވަރުކޮށްފިއެވެ.

މިދެޓީމުގެ މެދުގައި ކުޅުނު ސެމީފައިނަލުގެ ފުރަތަމަ ލެގުގެ މެޗު އަމިއްލަ ދަނޑުގައި 4-0 ގެ ނަތީޖާއަކުން އެތްލެޓިކޯ މެޑްރިޑުން ކާމިޔާބުކޮށްފައިވާއިރު، އެޓީމު ފައިނަލުން ޖާގަހޯދީ 4-3 ގެ އެގްރިގޭޓް ނަތީޖާއަކުން ކުރިހޯދައިގެންނެވެ.

މެޗުގެ ފުރަތަމަ ހާފުގައި ގިނަވަގުތު ބޯޅަ ހިފަހައްޓައިގެން ކުޅެ ބާސެލޯނާ އިން މެޗު ޑޮމިނޭޓްކުރިއިރު، އެޓީމުން މެޗުގެ ލީޑުހޯދީ ފުރަތަމަ ހާފުގެ 29 މިނެޓުގައެވެ. މިލަނޑު އެޓީމަށް ކާމިޔާބުކޮށްދިނީ ޒުވާން މިޑްފީލްޑަރު މާކް ބެރްނާލް އެވެ. އަދި އެޓީމުން ލީޑު ފުޅާކުރި ލަނޑު ފުރަތަމަ ހާފުގެ އިތުރު ވަގުތުގެ ތެރޭގައި އެޓީމަށް ލިބުނު ޕެނަލްޓީއަކުން ކާމިޔާބުކޮށްދިނީ އެޓީމުގެ ބްރެޒިލް ފޯވާޑް ރަފީނިއާ އެވެ.

މެޗުގެ ދެވަނަ ހާފުގައި ވެސް ބާސެލޯނާ އިން ލަނޑުޖަހާނެ ގިނަ ފުރުސަތުތަކެއް ތަނަވަސްކުރިއިރު، އެޓީމުގެ ތިންވަނަ ލަނޑު މެޗުގެ 72 ވަނަ މިނެޓުގައި ކާމިޔާބުކޮށްދިނީ އެޓީމު ފުރަތަމަ ލަނޑު ވެސް ކާމިޔާބުކުރި ބްރެނާލް އެވެ. އަދި މިއީ ބާސެލޯނާ އެންމެ ފަހުން ކުޅުނު ތިން މެޗުގައި އުމުރުން 18 އަހަރު މިޑްފީލްޑަރު، ކާމިޔާބުކުރި ތިންވަނަ ލަނޑެވެ.

މިލަނޑާއެކު 3-0 ގެ ނަތީޖާއަކުން ބާސެލޯނާ އިން މެޗު ކާމިޔާބުކުރި ނަމަވެސް، ދެ ލެގުގެ އެގްރިގޭޓް ނަތީޖާއިން ކުރިހޯދައި ފައިނަލުން ޖާގަހޯދީ އެތްލެޓިކޯ މެޑްރިޑުންނެވެ. އަދި ފައިނަލުގައި އެތްލެޓިކޯ މެޑްރިޑް ވާދަކުރަން ޖެހޭނީ ސެމީފައިނަލްގެ ދެވަނަ މެޗުގައި އެތްލެޓިކް ބިލްބާއޯ އާއި ރެއާލް ސޮސިއެޑާޑް ވާދަކޮށް މޮޅުވާ ޓީމަކާއި ދެކޮޅަށެވެ.

ބިލްބާއޯގެ ދަނޑުގައި ކުޅުނު ފުރަތަމަ ލެގުގެ މެޗު 1-0 ގެ ނަތީޖާއަކުން ސޮސިއެޑާޑުން ކާމިޔާބުކޮށްފައިވާއިރު، މިރޭ އަމިއްލަ ދަނޑުގައި ކުޅޭ މެޗު އެއްވަރުކޮށްލައިގެން ވެސް ފައިނަލުން ޖާގަ ހޯދުމުގެ ފުރުސަތު އެޓީމަށް އެބައޮތެެވެ.