އެމެރިކާއާއި އިސްރާއީލުން އިރާނުގެ ސްކޫލަކަށް ހަމަލާދީ 160 ދަރިވަރުން ޝަހީދުކޮށްލި ގަތުލުއާންމު ތަހުގީގުކުރަން އދ އިން ގޮވާލައިފި

އެމެރިކާއާއި އިސްރާއީލުން އިރާނުގެ ސްކޫލަކަށް ހަމަލާދީ 160 ދަރިވަރުން ޝަހީދުކޮށްލި ގަތުލުއާންމު ތަހުގީގުކުރަން އދ ގެ ހިއުމަން ރައިޓްސް އޮފީހުން މިއަދު ގޮވާލައިފި އެވެ.

ހަމަލާދިން އެމެރިކާއާއި އިސްރާއީލުން ނަން ހާމަނުކޮށް އދ ގެ ހިއުމަން ރައިޓްސް އޮފީހުން ވަނީ އީރާނުގެ އަންހެން ކުދިންގެ ސްކޫލަކަށް ހަމަލާ ދިނުމުގެ ފަހަތުގައި ބަޔަކު ހޯދައި "ބިރުވެރި" ހާދިސާ ތަހުގީގުކޮށް އެކަން އެ އޮފީހާއި ހިއްސާކުރުމަށް ގޮވާލާފައި އެވެ.

އެ އޮފީހުގެ ހައިކޮމިޝަނަރު ވޮލްކަރ ތުރުކު ވަނީ މި ހަމަލާގެ ތަހުގީގު ދެފުށްފެންނަ ގޮތަކަށް ފުރިހަމައަށް ތަހުގީގު ކުރުމަށް ގޮވާލާފައި އެވެ. އެގޮތުން އެކަން ތަހުގީގު ކުރުމުގެ ޒިންމާ އޮތީ ހަމަލާ ދިން ބާރުތަކުގެ މައްޗަށް ކަމަށްވެސް ހައިކޮމިޝަނަރު ގަބޫލުކުރައްވާ ކަމުގައި އދ.ގެ އިންސާނީ ހައްގުތަކާ ބެހޭ އޮފީހުގެ ތަރުޖަމާނު ރަވީނާ ޝަމްދާސާނީ ވަނީ ބުނެފައި އެވެ.

އީރާނުގެ ދެކުނުގެ މިނާބް ސިޓީގެ އަންހެން ކުދިންގެ ސްކޫލަކަށް އެމެރިކާއާއި އިސްރާއީލުން ދިން ހަމަލާއެއްގައި ޝަހީދުވި 165 ދަރިވަރުންނާއި މުވައްޒަފުންގެ ޖަނާޒާ މިދިޔަ ހޮނިހިރު ދުވަހު ވަނީ ބާއްވާފައި އެވެ. އެހަމަލާގައި 160 ދަރިވަރުން ވަނީ ޝަހީދުވެފައި އެވެ.

މި ގަތުލުއާންމު ހިންގި އިސްރާއީލުގެ އަސްކަރިއްޔާއިން ވަނީ އެ ސަރަހައްދުގައި އިސްރާއީލުން ނުވަތަ އެމެރިކާއިން އެއްވެސް ހަމަލާއެއް ދިންކަން އެނގިފައި ނުވާ ކަމަށް ބުނެ ދޮގު ހަދާފައި އެވެ. މިއީ އިސްރާއީލާއި އެމެރިކާއިން ދިން ހަމަލާއެއް ކަމަށް އިރާނުން ވަނީ ރަސްމީކޮށް އިއުލާނުވެސް ކޮށްފައެވެ.