ނެޓްބޯޅަ: ފަސްވަނަ މެޗުން ވެސް ނެޓް އެޓޭކާސް ބަލިވިއިރު، ޕަވާ ޕަފްއަށް އެއްވަނައިގައި ތިން ޕޮއިންޓްގެ ލީޑެއް

މިހާރު ކުރިއަށްދާ މައިލޯ ރަމަޟާން ހާފްކޯޓް ނެޓްބޯޅަ ޗެލެންޖް 2026 ގެ ޖޫނިއާރ ކެޓަގެރީގައި މިރޭ ކުޅުނު ފުރަތަމަ މެޗުގައި ފަސޭހަކަމާއެކު ނެޓް އެޓޭކާސް ބަލިކޮށް ޕަވާ ޕަފް އިން އެއްވަނައިގައި ލީޑު ފުޅާކުރިއިރު، ދެވަނަ މެޗުގައި ސްޓާސް އިން ވަނީ ނެޓް ނިންޖާސް ބަލިކޮށްފައެވެ.

މުބާރާތުގެ ޖޫނިއަރ ޑިވިޝަންގައި މިރޭ ކުޅުނު ފުރަތަމަ މެޗުގައި ޕަވާ ޕަފް އާއި ނެޓް އެޓޭކާސް ވާދަކުރިއިރު، މެޗުގެ ފުރަތަމަ ހާފުގެ ކުޅުން ނިމިގެންދިޔައީ 1-1 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ. އަދި ދެވަނަ ހާފުގައި ޕަވާ ޕަފް އިން ކާމިޔާބުކުރި ހަތަރު ޕޮއިންޓާއެކު 5-1 ގެ ނަތީޖާއަކުން ޕާވާ ޕަފް މޮޅުވިއިރު، މިމެޗުގެ މޮޅު ކުޅުންތެރިއަކަށް ހޮވުނީ އެޓީމުގެ ފާތުމަތު އަޔާނީ މިޝްބާހާ އެވެ.

މީގެ އިތުރުން ޖޫނިއަރ ޑިވިޝަންގައި މިރޭ ކުޅުނު ދެވަނަ މެޗުގައި ސްޓާސް އާއި ނެޓް ނިންޖާސް ވާދަކުރިއިރު، މެޗުގެ ފުރަތަމަ ހާފުގެ ކުޅުން ނިމިގެންދިޔައީ 4-0 ގެ ނަތީޖާއަކުން ސްޓާސް ކުރީގައި އޮވެގެންނެވެ. އަދި މެޗުގެ ދެވަނަ ހާފުގައި ނެޓް ނިންޖާސް އިން ކުޅުން ރަނގަޅުކޮށް އިތުރު ތިން ޕޮއިންޓް ހޯދި ނަމަވެސް 4-3 ގެ ނަތީޖާއަކުން މެޗު ކާމިޔާބުކުރީ ސްޓާސް އިންނެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ ސްޓާސްގެ އެލީނާ ހުސެއިން ސިނާން އެވެ.

މިނަތީޖާއެކު ލީގުބުރުގައި ކުޅުނު ފަސް މެޗުން ޕަވާ ޕަފްއަށް 12 ޕޮއިންޓް ލިބިފައިވާއިރު، އެޓީމު މިވަގުތު އޮތީ ތާވަލުގެ އެއްވަނައިގައެވެ. އަދި ފަސް މެޗުން ހޯދި ނުވަ ޕޮއިންޓާއެކު ފައިދާ ޕޮއިންޓްގެ ތަފާތުން ތާވަލުގެ ދެވަނައިގައި ނެޓް ނިންޖާސް އޮތްއިރު، ތިންވަނައިގައި އޮތް ސްޓާސް އިން ވެސް ވަނީ ފަސް މެޗުން ނުވަ ޕޮއިންޓް ހޯދާފައެވެ. އަދި ކުޅުނު ފަސް މެޗުން ވެސް ބަލިވެ ޕޮއިންޓެއް ނުލިބި ތާވަލުގެ ފުލުގައި މިވަގުތު އޮތީ ނެޓް އެޓޭކާސް އެވެ.

23 ފެބުރުއަރީ 2025 އިން 05 މާރިޗު 2026 ނިޔަލަށް ކުރިއަށްދާ މިމުބާރާތުގެ ޖޫނިއަރ ކެޓަގެރީގައި މިއަހަރު ޖުމްލަ ހަތަރު ޓީމަކުން ބައިވެރިވެފައިވާއިރު، މިޑިވިޝަންގެ މެޗުތައް ކުރިއަށް ގެންދިއުމަށް ހަމަޖެހިފައިވަނީ ލީގު އުސޫލުން ކޮންމެ ޓީމެއް ކޮންމެ ޓީމަކާއި ދެމެޗު ކުޅުމަށްފަހު ބައިވެރި ހަތަރު ޓީމުގެ މެދުގައި ސެމީފައިނަލް ދެމެޗު ކުޅޭގޮތަށެވެ.

އެގޮތުން ސެމީފައިނަލްގެ ފުރަތަމަ މެޗުގައި ލީގު ބުރުގެ އެއްވަނަ ޓީމާއި ހަތަރުވަނަ ޓީމު ވާދަކުރާއިރު، ސެމީފައިނަލުގެ ދެވަނަ މެޗުގައި ލީގުބުރުގެ ދެވަނަ ޓީމު ވާދަކުރަންޖެހޭނީ ލީގުބުރުގެ ތިންވަނަ ޓީމައި ދެކޮޅަށެވެ.