ގިރާވަރުފަޅުން ގޯތި ލިބުނު ފަރާތްތަކުގެ ޕްލޮޓް ކަނޑައެޅުމުގެ ގުރުއަތުލުން ފެށިގެން ކުރިޔަށް!

ގިރާވަރުފަޅުގެ ލޭންޑް ޔޫސް ޕްލޭން އަށް ބަދަލުގެނެސްފައިވުމުން ގިރާވަރުފަޅުން ގޯތި ޙަވާލުކޮށްފައިވާ ފަރާތްތަކުގެ މެދުގައި އައު ޕްލޮޓް އެލޮކޭޓް ކުރުމަށްޓަކައި ގުރުއަތުލުން މިއަދު ހެނދުނު ފަށައިފި އެވެ.

ހައުސިންގ މިނިސްޓްރީން މިއަދު ބުނީ ގިރާވަރުފަޅުގެ ލޭންޑް ޔޫސް ޕްލޭން އަށް ބަދަލު ގެނެވި، އައު ލޭންޑް ޔޫސް ޕްލޭނެއް ތައްޔާރުކުރެވިފައިވާތީ، އެ ޕްލޭންއަށް ރިޢާޔަތްކޮށް ބިންވެރިޔާ ސްކީމްގެ ދަށުން ގިރާވަރުފަޅުން ގޯތި ލިބިފައިވާ ފަރާތްތަކުގެ ގޯތީގެ ސަރަޙައްދަށް ބަދަލު އައިސްފައިވުމުން، އައު ލޮޓް ނަންބަރު ކަނޑައެޅިފައިވާ ކަމަށާއި މިއަދު ކުރިއަށް މިދަނީ، މި ބަދަލާއި ގުޅިގެން ގިރާވަރުފަޅުން ގޯތި ޙަވާލުކޮށްފައިވާ ފަރާތްތަކުގެ މެދުގައި އައު ޕްލޮޓް އެލޮކޭޓް ކުރުމަށްޓަކައި ގުރުއަތުލުމުގެ މަސައްކަތް ކަމަށެވެ.

މި ބަދަލާއިއެކު ގިރާވަރު ފަޅުން ގޯތިލިބޭ ފަރާތްތަކަށް ލިބިގެންދާ ޕްލޮޓްގެ ގުރުއަތުލުމުގެ ކަންކަން ކުރިއަށް ގެންދާނީ އެކަމަށް ކަނޑައަޅާފައިވާ ހައުސިންގ މިނިސްޓްރީގެ މުވައްޒަފުންނެވެ.

ގިރާވަރުފަޅުން ބިން ލިބޭ ފަރާތްތަކުގެ ތެރެއިން ގުރުއަތުލާ ހޯލަށް، ބިން ލިބިފައިވާ ފަރާތް/ފަރާތްތަކުގެ ތެރެއިން ކޮންމެ ޕްލޮޓަކަށް 01 (އެކެއް) ފަރާތަށް ވަދެވޭނެ އިންތިޒާމުވަނީ ހަމަޖެހިފައިވާއިރު ގުރުއަތުލާއިރު ޕްލޮޓް އެލޮކޭޓްކުރެވޭ ފަރާތްތަކަށް ވަގުތުން އެފަރާތަކަށް ލިބުނު ޕްލޮޓް ނަންބަރު އެސް.އެމް.އެސް ގެ ޒަރިއްޔާއިން ލިބިގެންދާނެކަމަށްވެސް މިނިސްޓްރީން ވަނީ ބުނެފައި އެވެ. މި ގުރުއަތުލުން ދައުލަތުގެ މީޑިއާއިން ދަނީ ވަގުތުން ދުރަށްވެސް ދައްކަމުންނެވެ.

ގިރާވަރުފަޅުން ދޫކޮށްފައިވާ ގޯތީގެ އަދަދާއި ބޮޑުމިނުގެ ތަފްޞީލް

1. 1250 އަކަފޫޓުގެ 2605 ގޯތި
2. 1650 އަކަފޫޓުގެ 1213 ގޯތި
3. 2050 އަކަފޫޓުގެ 253 ގޯތި
4. 2450 އަކަފޫޓުގެ 1 ގޯތި

މިނިސްޓްރީން އިތުރަށް ބުނީ ގޯތިލިބޭ ފަރާތްތަކުގެ ގުރުއަތުލުން ނިމުމުން، ގޯތިތަކުގެ ރަޖިސްޓްރީ އާއި ބިން ލިބޭ ފަރާތްތަކާއެކުވާ އެއްބަސްވުންތަކާގުޅޭ މަޢުލޫމާތު މިނިސްޓްރީ އިން ފަހުގެ ތާރީޚެއްގައި ޙިއްސާކުރާނެ ކަމަށެވެ. އަދި ބިން ހިއްކާ ނިމުމުން، ގޯތި ލިބިފައިވާ ފަރާތްތަކާ ގޯތި ހަވާލުކުރުމުގެ މަސައްކަތް ކުރިއަށް ގެންދެވޭނެ ކަމަށެވެ.