ގައުމީ ލެބޯޓަރީއާއިއެކު ކާނާގެ ރައްކާތެރިކަން ކަށަވަރުކުރުމަށްޓަކައި ކުރަމުންދާ މަސައްކަތްތަކަށް އާރޯކަމެއް ލިބިއްޖެ - މާރިޔާ

ފުވައްމުލައް ސިޓީގައި ހުޅެވުނު ދަނޑުވެރިކަމުގެ ގައުމީ ލެބޯޓަރީއާއިއެކު ކާނާގެ ރައްކާތެރިކަން ކަށަވަރުކުރުމަށްޓަކައި ކުރަމުންދާ މަސައްކަތްތަކަށް އާރޯކަމެއްލިބިގެންދާނެ ކަމަށް ދަނޑުވެރިކަމާއިބެހޭ ވަޒީރު ޑރ. މަރިޔަމް މަރިޔާ ވިދާޅުވެއްޖެ އެވެ.

މާރިޔާ މިފަދައިން ވިދާޅުވީ ފުވައްމުލަކުގައި ދަނޑުވެރިކަމުގެ ގައުމީ ލެބޯޓެރީ ހުޅުވުމަށް ބޭއްވުނު ރަސްމިއްޔާތުގައި އެކަމަނާ ދެއްކެވި ވާހަކަފުޅުގައި އެވެ.

އެގޮތުން މިއަދަކީ ދިވެހިރާއްޖޭގެ ދަނޑުވެރިކަމުގެ ސިނާޢަތުގައި ފާހަގަކޮށްލެވޭނެ ތާރީޚީ ދުވަހެއްކަން ފާހަގަކުރައްވައި ވަޒީރު ވަނީ ފުވައްމުލަކު ސިޓީގައި އިފްތިތާހުކުރެވިގެންދިޔަ "ނޭޝަނަލް އެގްރިކަލްޗަރ ލެބޯޓްރީ" އާއެކު، ދަނޑުވެރިކަމުގެ ޚިދުމަތްތައް ޒަމާނީ ފެންވަރަށް ތަރައްޤީކުރުމަށާއި، ޤައުމީ ފެންވަރުގައި ކާނާގެ ރައްކާތެރިކަން ކަށަވަރުކުރުމަށްޓަކައި ކުރަމުންދާ މަސައްކަތްތަކަށް އާރޯކަމެއް ލިބި، މުހިންމު ފިޔަވަޅެއް ކުރިއަށް އެޅިފައިވާކަން ފާހަގަކުރައްވާފައި އެވެ.

ޕީ.ޑީ.އެސް.އޭ.އީ މަޝްރޫޢުގެ ދަށުން ޤާއިމުކުރެވުނު މި ލެބޯޓްރީއަކީ، ދަނޑުވެރިކަމުގެ ދާއިރާ ތަރައްޤީކޮށް، މޫސުމީ ބަދަލުތަކަށް ދަނޑުވެރިން އަހުލުވެރިކުރުވުމަށް ބޭނުންވާ ފަންނީ އެހީތެރިކަން އެއް ފުރާޅެއްގެ ދަށުން ފޯރުކޮށްދިނުމަށް އެކުލަވައިލެވިފައިވާ މަރުކަޒެއްކަން ފާހަގަކުރައްވައި ވަޒީރު ވިދާޅވީ މި މަރުކަޒުގެ ޚިދުމަތްތަކުގެ ތެރޭގައި ފަސްގަނޑު ތަޙުލީލުކުރުމާއި، ގަސްގަހާގެހީގެ ބަލިތައް ދެނެގަތުމާއި، ސޫފާސޫފި ދިރާސާކުރުމުގެ އިތުރުން "ޕްލާންޓް ޓިޝޫ ކަލްޗަރ" ފަދަ ޒަމާނީ ފަންނީ ވަސީލަތްތައް ހިމެނޭ ކަމަށެވެ.

"ފުވައްމުލަށް ސިޓީގައި މި ބިނާކުރެވުނު މަރުކަޒަކީ މުޅި ރާއްޖޭގައި އެމްގެޕް ތަންފީޒުކުރުމަށް އެޅުނު މުހިންމު ފިޔަވަޅެއް. މި މަރުކަޒު މެދުވެރިކޮށް، ސަރަހައްދީ ފެންވަރުގައި ދަނޑުވެރިންނަށް ބޭނުންވާ ސައްޙަ މަޢުލޫމާތާއި ފަންނީ އިރުޝާދު ފޯރުކޮށްދެވޭނެ." ވަޒީރު ވިދާޅުވިއެވެ.

މިއަދު އިފްތިތާހުކުރެވުނު ލެބޯޓަރީއާއިއެކު މޫސުމީ ބަދަލުތަކާ ގުޅޭނޭފަދަ ބާވަތްތައް އިޚްތިޔާރުކުރުމަށް މަގުފަހިވުމުގެ އިތުރުން، ބަލިތައް ހަރުދަނާކަމާއެކު ކޮންޓްރޯލްކުރުމަށާއި ފަސްގަނޑުގެ ފެންވަރު ރަނގަޅުކޮށް އުފެއްދުންތެރިކަން އިތުރުކުރުމަށް ބޮޑު އެހީތެރިކަމެއް ލިބިގެންދާނެކަންވެސް ވަޒީރު ފާހަގަކުރެއްވި އެވެ.

މީގެއިތުރުން، ރަށްރަށުގެ ފެންވަރުގައި ދަނޑުވެރިކަމުގެ އިރުޝާދާއި ލަފާދޭ ނިޒާމު ހަރުދަނާކޮށް، މި މަރުކަޒު މެދުވެރިކޮށް ދަނޑުވެރިންނަށް ބޭނުންވާ ޢަމަލީ ތަމްރީނުތައް ހޯދުމުގެ ފުރުސަތު ތަނަވަސްވެގެންދާނެކަމަށާއި މިގޮތުން 'ސީޑްސް' މަޝްރޫޢުގެ ދަށުން އެހީތެރިކަން ފޯރުކޮށްދޭ 250 ދަނޑުވެރިންވެސް މި މަސައްކަތުގައި ޝާމިލުވާކަން ވަޒީރު ވިދާޅުވިއެވެ.

މިއަދު ހުޅުވުނު ލެބޯޓަރީ ޚާއްޞަކުރެވިފައިވަނީ ދަނޑުވެރިކަމުގެ ދާއިރާއިން ގައުމީ ފެންވަރުގައި ހިންގޭ ދިރާސާތަކާއި، ބަލި ދެނެގަތުމުގެ ވަސީލަތްތަކާއި، ހާއްސަ ލެބޯޓަރީގެ އިންފްރާސްޓްރަކްޗާގެ މަދުކަމުގެ ސަބަބުން ދިމާވާ އުނދަގޫތަކަށް ހައްލު ހޯދައިދިނުމަށެވެ. މިކަމުގެ ސަބަބުން ދަނޑުތަކުގެ އުފެއްދުންތެރިކަމާއި، ބަލިތަކާއި ފަނިފަކުސާ ކޮންޓްރޯލް ކުރުމުގެ އިތުރުން ގައުމީ ބަޔޯސެކިއުރިޓީ ވަރުގަދަކޮށްދެއެވެ. ދަނޑުވެރިކަމުގެ ގައުމީ ލެބޯޓަރީން ހިދުމަތްތައް ފޯރުކޮށްދިނުމަށް ހަމަޖެހިފައިވަނީ ދަނޑުވެރިންގެ އިތުރުން، ދިރާސާކުރާ ފަރާތްތަކާއި، އެކްސްޓެންޝަން އޮފިސަރުންނާއި، ސިޔާސަތު ކަނޑައަޅާ ފަރާތްތައް ވެސް ހިމެނޭ ގޮތަށެވެ. އެގޮތުން، ރާއްޖޭގެ އެކި ކަންކޮޅުތަކުގައި ދެމެހެއްޓެނިވި، މޫސުމަށް ހޭނޭ، އަދި ރައްކާތެރި ދަނޑުވެރިކަން ކުރިއެރުވުމުގައި ލެބޯޓަރީން މުހިންމު ދައުރެއް އަދާކުރާނެއެވެ.

މި ލެބޯޓަރީ ގާއިމުކުރެވިފައިވަނީ ޔޫއެންޑީޕީގެ ޕްރޮޖެކްޓް ފޯ ޑިވެލޮޕިންގ ސަސްޓެއިނަބަލް އެގްރިކަލްޗަރަލް އިކޮނޮމީ (ޕީ.ޑީ.އެސް.އޭ.އީ) ގެ ދަށުންނެވެ. މި މަސައްކަތަށް ޖަޕާން ސަރުކާރުގެ އެހީތެރިކަން ލިބިފައިވާއިރު، މި ޕްރޮޖެކްޓް ތަންފީޒުކުރެވިފައިވަނީ ޔޫ.އެން.ޑީ.ޕީ މެދުވެރިކޮށް، ދަނޑުވެރިކަމާއި ދިރޭތަކެއްޗާބެހޭ ވުޒާރާއާ ގުޅިގެންނެވެ.

އަދި މީގެ އިތުރުން ވޯލްޑް ބޭންކާއި އިފާޑް ގެ އެހީތެރިކަން މިވުޒާރާގެ ފަރާތުން ޝުކުރުވެރިކަމާއެކު ފާހަގަކުރެއެވެ.