'އައިލާ ސަސްޓެއިނަބަލް ޓައުންޝިޕް' މަޝްރޫޢުގެ ބިންގާ އަޅައިފި

ނ. އަތޮޅުގައި ތަރައްޤީކުރާ 'އައިލާ ސަސްޓެއިނަބަލް ޓައުންޝިޕް' މަޝްރޫޢުގެ ބިންގާ އަޅައިފިއެވެ.

މި މަޝްރޫޢުގެ ބިންގާ އަޅުއްވައިދެއްވީ އެކަމަށްޓަކައި މިއަދު ބޭއްވި ޚާއްސަ ރަސްމިއްޔާތެއްގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއެވެ.އައިލާ ސަސްޓެއިނަބަލް ޓައުންޝިޕް މަޝްރޫއަކީ ރާއްޖޭގެ ސްޕެޝަލް އިކޮނިމިކް ޒޯން، އެސްއީޒެޑްގެ ދަށުން ހިންގާ ފުރަތަމަ ބޮޑު މަޝްރޫޢެވެ.

ސަރުކާރުން މި މަޝްރޫޢުގެ ހުއްދަ ރަސްމީކޮށް ހަވާލުކުރީ މިދިޔަ އަހަރުގެ ޑިސެމްބަރު 11 ގައެވެ. މި މަޝްރޫޢު ކުރިއަށްގެންދިއުމަށް ހަމަޖެހިފައިވަނީ ނ. އަތޮޅުގެ ދިގުފަރު ފަޅާއި، ދެކުނުފަރު އަދި ކުރަމާދޫ ހިމެނޭ ސަރަހައްދުގައެވެ.ކްރިސްޓަލް ހޯލްޑިންގްސް ޕްރައިވެޓް ލިމިޓެޑާ ހަވާލުކޮށްގެން ކުރިއަށްގެންދާ މި މަޝްރޫޢަކީ ޖުމްލަ 790 މިލިޔަން އެމެރިކާ ޑޮލަރު ނުވަތަ 12.2 ބިލިޔަން ރުފިޔާގެ އިންވެސްޓްމެންޓެކެވެ.

މި މަޝްރޫޢަށް ބޭނުންވާ ބިން ހިއްކުމުގެ މަސައްކަތް މިދިޔަ އަހަރުގެ މާރިޗު މަހު ފަށައި، ޑިސެންބަރު މަހުގެ ނިޔަލަށް ވަނީ ނިންމާލާފައެވެ.

މި ޓައުންޝިޕް ނިމިގެންދާއިރު، އެތަނަށް ބޭނުންވާ ކަރަންޓުގެ 60 އިންސައްތަ އިޔާދަކުރަނިވި ހަކަތައިން އުފެއްދުމާއި ދުނިޔޭގެ ފެންވަރުގެ ސިއްޙީ ޚިދުމަތްދޭ މަރުކަޒަކާއި، ބައިނަލްއަޤްވާމީ ފެންވަރުގެ ޓޫރިޒަމް ސްކޫލެއް މި ސަރަހައްދުގައި ޤާއިމުކުރެވޭނެއެވެ.

އަދި ރާއްޖެއަށް އެތެރެކުރާ ކާބޯތަކެތީގެ ބާވަތްތައް ދެމެހެއްޓެނިވި ގޮތެއްގައި އުފެއްދުމަށްޓަކައި ޒަމާނީ ޓެކްނޮލޮޖީއާއެކު އެކުއަކަލްޗަރ އަދި މެރިކަލްޗަރ ޒޯނެއްވެސް މި މަޝްރޫޢުގެ ދަށުން ތަރައްޤީކުރުމަށް ވަނީ ހަމަޖެހިފައެވެ.2028ވަނަ އަހަރުގެ ނިމުމުގެ ކުރިން ސަސްޓެއިނަބަލް ޓައުންޝިޕް އޮޕަރޭޝަނަށް ގެނައުމަށް އަމާޒު ހިފާފައިވާއިރު، މި މަޝްރޫޢަކީ މުޅި އިންޑިއާ ކަނޑުގެ ސަރަހައްދުގައިވެސް ފާހަގަކޮށްލެވޭނެ ތަފާތު މަޝްރޫޢަކަށް ވާނެ ކަމަށް ސަރުކާރުން ހާމަކުރެއެވެ. އަދި މި މަޝްރޫޢު ނިމުމުން މިއީ ދުނިޔޭގެ ފެންވަރުގައި ފާހަގަކުރެވޭނެ ދެމެހެއްޓެނިވި ތަރައްޤީގެ ނަމޫނާއަކަށް ވާނެކަމަށް ސަރުކާރުން ބުންޏެވެ.

މި މަޝްރޫޢަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ "ވިޜަން 2040" ގައި ހިމެނޭ ދެމެހެއްޓެނިވި ކުރިއެރުމާއި، އިޤްތިޞާދީ ވަރުގަދަކަން ކަށަވަރުކުރުމާއި، އަދި މުސްތަޤްބަލަށް އަމާޒުކުރެވިފައިވާ މަތީ ފަންތީގެ ދާއިރާތައް ތަރައްޤީކުރުމުގެ ތަޞައްވުރާ ފުރިހަމައަށް އެއްގޮތްވާ މަޝްރޫޢެކެވެ.

މި ޓައުންޝިޕް މޮޑެލްއަކީ ރާއްޖޭގައި ތަރައްޤީކުރާ އައު ޖީލުގެ އިންޓަގްރޭޓެޑް ޑިވެލޮޕްމަންޓް މަޝްރޫޢެކެވެ. މީގެ މަޤްޞަދަކީ ދިގު މުއްދަތުގެ އިޤްތިޞާދީ ހަރަކާތްތަކަށް މަގުފަހިކޮށްދީ، ބައިނަލްއަޤްވާމީ އިންވެސްޓްމަންޓްތައް ރާއްޖެއަށް ގެނައުމުގެ އިތުރުން، އެކި ދާއިރާތަކުން ފަންނީ ވަޒީފާގެ ފުރުޞަތުތައް އުފެއްދުމެވެ. އެސް.އީ.ޒެޑް އޮނިގަނޑުގެ ތެރެއިން މި މަޝްރޫޢު ކުރިއަށް ދިއުމަކީ، ބޮޑެތި އިންވެސްޓްމަންޓްތަކަށް ރާއްޖެއަކީ އިތުބާރު ހުރި އަދި ވާދަވެރި މަންޒިލެއްގެ ގޮތުގައި ބައިނަލްއަޤްވާމީ މައިދާނުގައި ސާބިތުކޮށްދޭ ކަމެކެވެ.

ޢިޤްތިޞާދީ ތަރައްޤީއާއި ވިޔަފާރިއާ ބެހޭ ވުޒާރާ އާއި ބޯޑް އޮފް އިންވެސްޓްމަންޓުން، މި މަޝްރޫޢު ކަނޑައެޅިފައިވާ މުއްދަތަށް ކާމިޔާބުކަމާއެކު ނިންމައި، އޭގެ އިޖުތިމާޢީ އަދި އިޤްތިޞާދީ މަންފާ ދިވެހި ޤައުމަށް ލިބިދިނުމަށްޓަކައި ކްރިސްޓަލް ހޯލްޑިންގްސްއާއެކު ގާތުން މަސައްކަތް ކުރަމުންދާނެއެވެ.