ތަފާތުބޮޑު ނަތީޖާއަކުން ކަރަބާގް ބަލިކޮށް ލިވަޕޫލުން ފެންވަރު ދައްކާލައިފި

ޔުއެފާ ޗެމްޕިއަންސް ލީގުގައި ރޭ އަމިއްލަ ދަނޑުގައި އަޒަރުބައިޖާންގެ ކަރަބާގް 6-0 ގެ ތަފާތުބޮޑު ނަތީޖާއަކުން ބަލިކޮށް ލިވަޕޫލުން އެޓީމު ފެންވަރު ދައްކާލައިފިއެވެ.

ޗެމްޕިއަންސް ލީގުގައި ލިވަޕޫލް އެންމެ ފަހުން ކުޅުނު މެޗުގައި ފްރާންސްގެ މާސޭ އަތުން 3-0 ގެ ނަތީޖާއަކުން މޮޅުވެފައިވާއިރު، މިމުބާރާތުގައި ކަރަބާގް އެންމެ ފަހުން ކުޅުނު މެޗުގައި އެޓީމުން ވަނީ ޖަރުމަނުގެ ފްރެންކްފާޓް 3-2 ގެ ނަތީޖާއަކުން ބަލިކޮށްފައެވެ.

މެޗުގެ ފުރަތަމަ ހާފުގައި މޮޅަށް ކުޅެ ލިވަޕޫލުން މެޗު ޑޮމިނޭޓްކުރިއިރު، ފުރަތަމަ ހާފުގެ ކުޅުން ނިމިގެންދިޔައީ 2-0 ގެ ނަތީޖާއަކުން ލިވަޕޫލް ކުރީގައި އޮވެގެންނެވެ. އަދި ދެވަނަ ހާފުގައި ލިވަޕޫލުން އެޓީމުގެ އެޓޭކުތައް އިތުރަށް ވަރުގަދަކުރިއިރު، މިހާފުގައި އެޓީމުން ވަނީ އިތުރު ހަތަރު ލަނޑު ކާމިޔާބުކޮށްފައެވެ.

އެގޮތުން މިމެޗުގައި ލިވަޕޫލްގެ މިޑްފީލްޑަރު އެލެކްސިސް މާކް އެލިސްޓާ ދެލަނޑު ކާމިޔާބުކުރިއިރު، އެޓީމުގެ މުހައްމަދު ސަލާހް، ފްލޮރިއަން ވިޓްޒް، ހޫގޯ އެކަޓިކޭ އަދި ފެޑަރީކޯ ކިއޭސާ މިއިން ކޮންމެ ކުޅުންތެރިއަކު ވަނީ މިމެޗުގައި އެއްލަނޑު ކާމިޔާބުކޮށްފައެވެ.

މިނަތީޖާއެކު ލީގުބުރުގައި ކުޅުނު އަށް މެޗުން ލިވަޕޫލަށް 18 ޕޮއިންޓް ލިބިފައިވާއިރު، ލީގުބުރުގެ ތިންވަނަ ޓީމުގެ ގޮތުގައި އެޓީމުން ވަނީ މުބާރާތުގެ ދެވަނަ ބުރުގެ ޖާގައެއް ކަށަވަރުކޮށްފައެވެ. އަދި މިމެޗުން ބަލިވި ކަރަބާގް އިން ލީގުބުރުގައި ކުޅުނު އަށް މެޗުން ހޯދި 10 ޕޮއިންޓާއެކު ލީގުބުރުގެ 22 ވަނަ ޓީމުގެ ގޮތުގައި އެޓީމުން ވަނީ ޕްލޭއޮފްގެ ޖާގައެއް ޔަގީންކޮށްފައެވެ.