ރެއާލް ލަދުގަންނަވާލުމަށްފަހު ބެންފީކާ ޕްލޭއޮފްގެ ޖާގައެއް ކަށަވަރުކޮށްފި

ޔުއެފާ ޗެމްޕިއަންސް ލީގުގުގައި ރޭ އަމިއްލަ ދަނޑުގައި ސްޕެއިންގެ ރެއާލް މެޑްރިޑް 4-2 ގެ ނަތީޖާއަކުން ބަލިކޮށް ޕޯޗުގަލްގެ ބެންފީކާ އިން މުބާރާތުގެ ޕްލޭއޮފްގެ ޖާގައެއް ކަށަވަރުކޮށްފިއެވެ.

ޗެމްޕިއަންސް ލީގުގައި ރެއާލް މެޑްރިޑް އެންމެ ފަހުން ކުޅުނު މެޗުގައި ފްރާންސްގެ މޮނާކޯ އަތުން 5-1 ގެ ނަތީޖާއަކުން މޮޅުވެފައިވާއިރު، މިމުބާރާތުގައި ބެންފީކާ އިން އެންމެ ފަހުން ކުޅުނު މެޗުގައި ޔުވެންޓަސް އަތުން އެޓީމު ވަނީ 2-0 ގެ ނަތީޖާއަކުން ބަލިވެފައެވެ.

މެޗުގެ ފުރަތަމަ ހާފުގައި ބެންފީކާގެ ފަރާތުން ތަފާތު މޮޅު ކުޅުމެއް ފެނިގެންދިޔަ ނަމަވެސް މިމެޗުގައި ފުރަތަމަ ލަނޑުޖަހައި ކުރިހޯދީ ރެއާލް މެޑްރިޑުންނެވެ. މިލަނޑު ފުރަތަމަ ހާފުގެ 30 ވަނަ މިނެޓުގައި އެޓީމަށް ކާމިޔާބުކޮށްދިނީ ކިލިއަން އެމްބާޕޭ އެވެ.

ނަމަވެސް އޭގެ ހަ މިނެޓް ފަހުން ބެންފީކާގެ އަންދްރޭ ޝްޖެލްޑަރަޕް ވަނީ އެޓީމަށް މެޗުގެ ނަތީޖާ އެއްވަރުކޮށްދީފައެވެ. އަދި ފުރަތަމަ ހާފުގެ އިތުރުވަގުތުގެ ތެރޭގައި އެޓީމަށް ލިބުނު ޕެނަލްޓީއަކުން ބެންފީކާއަށް މެޗުގެ ލީޑު ހޯދައިދިނީ ވެންގެލިސް ޕަވްލިޑިސް އެވެ.

މެޗުގެ ދެވަނަ ހާފު ވެސް ބެންފީކާ އިން ވަރުގަދަކޮށް ފެށިއިރު. ދެވަނަ ހާފު ފެށިގެން ނުވަވަނަ މިނެޓުގައި ޝްޖެލްޑަރަޕް ވަނީ އިތުރު ލަނޑެއް ކާމިޔާބުކޮށް އެޓީމުގެ ލީޑު ފުޅާކޮށްދީފައެވެ. ނަމަވެސް އޭގެ ހަތަރު މިނެޓް ފަހުން އެމްބާޕޭ ވަނީ ލަނޑެއް ކާމިޔާބުކޮށް ރެއާލް މެޑްރިޑަށް ނަތީޖާގެ ފަރަގު ކުޑަކޮށްދީފައެވެ.

ނަމަވެސް މިމެޗުގައި ރެއާލް މެޑްރިޑަށް އިތުރު މައްސަލަތަކައް ކުރިމިތިވީ މެޗުގެ އިތުރުވަގުތުގެ ގޮތުގައި ދެއްކި ހަތަރު މިނެޓުގެ ތެރޭގައި ރެއާލްގެ ޑިފެންޑަރު އަސެންސިއޯ އަދި ފޯވާޑް ރޮޑްރިގޯއަށް ދެވަނަ ރީނދޫ ކާޑާއެކު ރަތްކާޑި ދައްކައި ދަނޑުން ފޮނުވާލުމުންނެވެ. އަދި މެޗުގެ އެންމެ ފަހު ސިކުންތުކޮޅުގެ ތެރޭގައި ބެންފީކާގެ ހަތަރުވަނަ ލަނޑު އެޓީމަށް ކާމިޔާބުކޮށްދިނީ އެޓީމުގެ ގޯލް ކީޕަރު އަނަޓޮލީ ޓްރުބިން އެވެ.

މިނަތީޖާއެކު ލީގުބުރުގައި ކުޅުނު އަށް މެޗުން ބެންޕީކާއަށް ނުވަ ޕޮއިންޓް ލިބިފައިވާއިރު، ލަނޑުގެ ތަފާތުން ތާވަލުގެ 24 ވަނަ ޓީމުގެ ގޮތުގައި އެޓީމުން ޕްލޭއޮފްގެ ޖާގައެއް ކަށަވަރުކުރިއިރު، މިމެޗުން ބަލިވި ރެއާލް މެޑްރިޑް އިން ލީގުބުރުގައި ކުޅުނު އަށް މެޗުން ހޯދި 15 ޕޮއިންޓާއެކު އެޓީމުން ލީގުބުރު ނިންމާލީ ތާވަލުގެ ނުވަވަނައިގައެވެެ. މިއާއެކު ގަދައަށެއްގެ ޖާގަ ގެއްލި އެޓީމަށް ވަނީ ޕްލޭއިޮފް ކުޅެންޖެހިފައެވެ.