ކުލަގަދަ ރަސްމިޔާތަކާއެކު ގައުމީ ޓީމަށް މަރުހަބާކިޔައިފި

ސާފް ފުޓްސަލް ޗެމްޕިއަންޝިޕް 2026 ގެ ޗެންޕިއަންކަން ހޯދި ގައުމީ ފުޓްސަލް ޓީމު މާލެ އައުމުން ހޫނު މަރުހަބާއެއް ކިޔައިފިއެވެ.

ގައުމީ ފުޓްސަލް ޓީމު ރޭ މާލެ އައުމުން ވެލާނާ އިންޓަނޭޝަނަލް އެއާޕޯޓުގެ ވީއައިޕީން ޓީމަށް މަރުހަބާ ދެންނެވީ ކުޅިވަރާއި ހަށިހެޔޮކަމާއި ބެހޭ ވަޒީރު އަބްދުﷲ ރާފިއު އާއި ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ރައީސް އަހުމަދު ތޯރިގެވެ.

މީގެ އިތުރުން ގައުމީ ފުޓްސަލް ޓީމުގެ ކުޅުންތެރިންގެ އާއިލާ މެމްބަރުންނަށް ވެސް އެއާޕޯޓުގެ ވީއައިޕީގައި ކުޅުންތެރިންނާ ބައްދަލުކުރުމުގެ ފުރުސަތު ފަހިވެފައި އޮތެވެ. އަދި އެއާޕޯޓުގެ އިވެންޓަށް ފަހު ގައުމީ ފުޓްސަލްޓީމުން ބަހުގައި ސޯޝަލް ސެންޓަރަށް އައުމަށް ފަހު ސޯޝަލް ސެންޓަރުން ފެށިގެން އާޓިފިޝަލް ބީޗަށް ގޮސްފައިވަނީ ލޮރީ ބުރެއްގައެވެ.

ޤައުމީ ޓީމަށް މަރުހަބާކިއުމަށް ގިނަ އަދަދެއްގެ ސަޕޯޓަރުން އާޓިފިޝަލް ބީޗަށް ޖާމަވިއިރު، އޭގެ ތެރޭގައި ކުޅިވަރު އެސޯސިއޭޝަންތަކުގެ އިސް ވެރިންންގެ އިތުރުން ކުޅިވަރުގެ އާއިލާއަށް ނިސްބަތްވާ ފާހަގަކޮށްލެވޭ ގިނަ ބޭފުޅުންތަކެއް މިއިވެންޓުގައި ބައިވެރިވެފައިވެއެވެ. އަދި އާޓިފިޝަލް ބީޗުގައި ކުޅުންތެރިންނަށް ހާއްސަކުރެވިފައިވާ ސްޓޭޖަށް ޓީމުގެ ކުޅުންތެރިންނާއި، އޮފިޝަލުން އެރީ ރަތްދޫލައިގައެވެ.

އަދި އެއަށްފަހު ގައުމީ ފުޓްސަލް ޓީމުގެ ކެޕްޓަން މުހައްމަދު އިމްރާން (އިންމި) ތަށި ހިފައިގެން އަރައި ސްޕޯޓްސް މިނިސްޓަރު ރާފިއު އާއި އެފްއޭއެމްގެ ރައީސް ތޯރިގުއާއެކު، ރަސްމީކޮށް އެ ސްޓޭޖު މަތީގައި ހުރެ މުބާރާތުގެ ތަށި ވަނީ ސަޕޯޓަރުންނަށް ދައްކާލާފައެވެ. އަދި އޭގެ ފަހުން ހަވާއަރުވާފައިވާއިރު، ސަޕޯޓަރުންނަށް ފުޓްސަލް ޓީމުގެ ކުޅުންތެރިންން އަދި އޮފިޝަލުނާއެކު ފޮޓޯ ނެގުންމަށް ފުރުސަތުދީފައިވެއެވެ.

ސައުތު އޭޝިއަން ފުޓްބޯލް ފެޑަރޭޝަން (ސާފް) އިން އިންތިޒާމުކޮށްގެން ފުރަތަމަ ފަހަރަށް ކުރިއަށް ގެންދިޔަ ސާފް ފުޓްސަލް ޗެމްޕިއަންޝިޕް ރާއްޖޭގެ ގައުމީ ފުޓްސަލް ޓީމުން ކާމިޔާބުކޮށްފައިވަނީ ކުޅުނު ހުރިހާ މެޗެއްވެސް ކާމިޔާބުކޮށް ސައްތައިން ސައްތަ ރެކޯޑަކާއެކުއެވެ