މާޓިނެލީގެ ހެޓްރިކާއެކު ޕޯޓްސްމައުތު ބަލިކޮށް އާސެނަލް އެފްއޭކަޕް ހަތަރުވަނަ ބުރުން ޖާގަ ހޯދައިފި

އިނގިރޭސި އެފްއޭކަޕްގެ ތިންވަނަ ބުރުގައި މިރޭ ރަށުން ބޭރުގައި ޗެމްޕިއަންޝިޕްގެ ޕޯޓްސްމައުތާއި ދެކޮޅަށް ކުޅުނު މެޗު ފަހަތުން އަރައި 4-1 ގެ ނަތީޖާއަކުން ކާމިޔާބުކޮށް އާސެނަލް އިން މުބާރާތުގެ ހަތަރުވަނަ ބުރުން ޖާގަ ހޯދައިފިއެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު މިމެޗުގައި ފުރަތަމަ ލަނޑުޖަހައި ކުރިހޯދީ ޕޯޓްސްމައުތުންނެވެ. މިލަނޑު މެޗު ފެށިގެން ތިންވަނަ މިނެޓުގައި ކާމިޔާބުކޮށްދިނީ އެޓީމުގެ ފޯވާޑް ކޯލްބީ ބިޝޮޕް އެވެ.

ނަމަވެސް އޭގެ ފަސް މިނެޓު ފަހުން އާސެނަލް އިން ވަނީ ލަނޑެއް ކާމިޔާބުކޮށް މެޗުގެ ނަތީޖާ އެއްވަރުކޮށްފައެވެ. މިލަނޑަކީ ޕޯޓްސްމައުތުގެ މިޑްފީލްޑަރު އަންދްރޭ ޑޮޒެލް އަތުން ބައިކޮޅަށް ވަން ލަނޑެކެވެ. އަދި އާސެނަލް އިން މެޗުގެ ލީޑުހޯދި ލަނޑު ފުރަތަމަ ހާފުގެ 25 ވަނަ މިނެޓުގައި ކާމިޔާބުކޮށްދިނީ އެޓީމުގެ ބްރެޒިލް ފޯވާޑް ގެބްރިއަލް މާޓިނެލީ އެވެ.

މީގެ އިތުރުން ފުރަތަމަ ހާފުގެ 43 ވަނަ މިނެޓުގައި މެޗުގެ ލީޑު ފުޅާކުރުމަށް އާސެނަލްއަށް ވަނީ ޕެނަލްޓީއެއް ވެސް ލިބިފައެވެ. ނަމަވެސް އެޓީމުގެ އިގިރޭސި ފޯވާޑް ނޯނީ މަޑުއެކޭ ކުރިއަށް ފޮނުވާލި ޕެނަލްޓީ ނާކާމިޔާބުވިއިރު، ފުރަތަމަ ހާފުގެ ކުޅުން ނިމިގެންދިޔައީ 2-1 ގެ ނަތީޖާއަކުން އާސެނަލް ކުރީގައި އޮވެގެންނެވެ.

މެޗުގެ ދެވަނަ ހާފުގައި އާސެނަލް އިން ވަނީ އެޓީމު ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. ނަތީޖާއެއްގެ ގޮތުން މިހާފުގައި އެޓީމުން އިތުރު ދެލަނޑު ކާމިޔާބުކުރިއިރު، މި ދެލަނޑު ވެސް އެޓީމަށް ކާމިޔާބުކޮށްދިނީ މެޗުގެ މޮޅު ކުޅުންތެރިއަކަށް ހޮވުނު ބްރެޒިލް ފޯވާޑް ގެބްރިއަލް މާޓިނެލީ އެވެ.