ބޮޑު ސަރަހައްދެއް ހުދު ސަމާލުގައި!

މޫސުން ގޯސްވާނެކަމަށް ލަފާކޮށް ރާއްޖޭގެ ބޮޑު ސަރަހައްދަކަށް ހުދު ސަމާލު ނެރެފި އެވެ.

މޫސުމާއި ބެހޭ ގައުމި އިދާރާއިން ހުދު ސަމާލު ނެރެފައިވަނީ ބ އަތޮޅުން ފެށިގެން ލ އަތޮޅާއަށް ހަމައަށް މިއަދުގެ 05:00 އިން ފެށިގެން މެންދުރު 11:00 ގެ ނިޔަލަށެވެ.

އެގޮތުން ހުދު ސަމާލުގެ މުއްދަތުގައި ބޯކޮށް ވާރޭވެހުމާއިއެކު ގުގުރާނެ ކަމަށް ލަފާކޮށްފައިވާއިރު ވިލާގަނޑުގައި ގަޑިއަކު 40 މޭލަށް ވައިގަދަވެ ކަނޑުތައް ގަދަވާނެ ކަމަށް މޫސުމާއި ބެހޭ ގައުމީ އިދާރާއިން ލަފާކުރެއެވެ.

ރާއްޖެ ސަރަހައްދަށް އިއްޔެއިން ފެށިގެން މޫސުން ގޯސްވެފައިވާއިރު މިއީ ބޭ އޮފް ބެންގާލްގައި އުފެދެމުންދާ ކޮޅިގަނޑަކާއި ގުޅިގެން ކުރާ ވިއްސާރައެއްކަމަށް ސަރަހައްދުގެ މޫސުން ދިރާސާ ކުރާ ފަރާތްތަކުން ވަނީ ބުނެފައި އެވެ.