އެމެރިކާގެ އިސް އޮފިޝަލަކު ލަންކާއަށް ވަޑައިގެންފި

އެމެރިކާ ސަރުކާރުގެ އިސް އޮފިޝަލަކު އަވަށްޓެރި ސްރީލަންކާއަށް ވަޑައިގެންފި އެވެ.

ލަންކާގެ ނޫހެއްކަމަށްވާ ނިއުސްވަޔާއިން ރިޕޯޓުކުރާ ގޮތުގައި މިއަދު ލަންކާއަށް ރަސްމީ ދަތުރުފުޅެއްގައި ވަޑައިގެންނެވީ އެމެރިކާގެ އަންޑަރ ސެކްރެޓަރީ އޮފް ސްޓޭޓް ފޯ ޕޮލިޓިކަލް އެފެއާޒް އެލިސަން ހޫކަރއެވެ.

މި ދަތުރުފުޅުގައި އަންޑަރ ސެކްރެޓަރީ ހޫކަރ ލަންކާގެ ސަރުކާރުގެ އިސްވެރިންނާއި ބައްދަލުކުރައްވައި، އިޤްތިޞާދީ އަދި ވިޔަފާރީގެ ގުޅުން އިތުރުކުރުމާއި، ދިފާޢީ އެއްބާރުލުން ހަރުދަނާކުރުމާއި، ލަންކާގެ އިޤްތިޞާދީ އަދި ކަނޑުގެ އިސްތިޤްލާލު ހިމާޔާތްކުރުމަށް އެހީތެރިވުމާއި ގުޅޭގޮތުން މަޝްވަރާކުރައްވާނެ ކަމަށް ލަންކާގައި ހުންނަ އެމެރިކާ އެމްބަސީން ވަނީ ބުނެފައި އެވެ.

މީގެ އިތުރުން ލަންކާއަށް ދާދިފަހުން އެރި ބާރުގަދަ ތޫފާނުގައި ލިބުނު ގެއްލުންތައް ންޑަރ ސެކްރެޓަރީ ހޫކަރ އޮޅުންފިލުވައި ލަންކާއަށް އިތުރު އެހީ ހޯދޭނެ މަގުތައް ހޯދުމަށްވެސް މަޝްވަރާތައް ކުރިޔަށްގެންދަން ނިންމާފައިވާ ކަމަށްވެސް އެމްބަސީން ވަނީ ހާމަކޮށްފައި އެވެ.