ބައިނަލްއަޤްވާމީ ޢަދުލު އިންޞާފުގެ ނިޒާމުތައް ހަރުދަނާ ކުރުމަށް ރާއްޖެއިން އަބަދުވެސް އިސްކަންދޭ: ޚަލީލް

ބައިނަލްއަޤްވާމީ ޢަދުލު އިންޞާފުގެ ނިޒާމުތައް ހަރުދަނާ ކުރުމަށް ދިވެހިރާއްޖޭން އަބަދުވެސް އަހައްމިއްޔަތުކަން ދެއްވާ ކަމަށް ޚާރިޖީ ވަޒީރު ޑރ.ޢަބްދުالله ޚަލީލް ވިދާޅުވެއްޖެއެވެ.

ވަޒީރު މިފަދައިން ވިދާޅުވީ ޤަޠަރުގެ ވެރިރަށް ޠޯހާގައި މިހާރު ހިނގަމުންދާ ދޯހާ ފޯރަމްގެ އެޖެންޑާގެ ތެރެއިން "އަޕްހޯލްޑިންގ އިންޓަރނޭޝަނަލް ޖަސްޓިސް ސިސްޓަމްސް އެންޑް ދަ ރޫލް އޮފް ލޯ" ގެ ނަމުގައި ބޭއްވުނު ހައި-ލެވަލް މިނިސްޓީރިއަލް ރައުންޑޭބަލްގައި ބައިވެރިވެވަޑައިގެން ދެއްކެވި ވާހަކައިގައެވެ.

މި ރައުންޑޭބަލް ސެޝަންގައި ބައިވެރިވެވަޑައިގެން ވަޒީރު ވަނީ ޑިޕްލޮމަސީގެ ރިވެތި އުޞޫލު ކުރިއަރުވައި، ޤާނޫނީ ވެރިކަން ނެގެހެއްޓުމާއި، އަދި ބައިނަލްއަޤްވާމީ ޢަދުލު އިންޞާފުގެ ނިޒާމުތައް ހަރުދަނާ ކުރުމަށް ދިވެހިރާއްޖޭން އަބަދުވެސް އަހައްމިއްޔަތުކަން ދޭ ކަމަށާއި، އަދި ޢަދުލު އިންސާފު ޤާއިމް ކުރުމުގައި ހުރިހާ ފަރާތްތަކުންވެސް ހަމަހަމަކަމާއެކު، ވަކި ފަރާތަކަށްބުރަނުވެ އިތުބާރާއި، ޖަވާބުދާރީކުރުވުން ބައިނަލްއަޤްވާމީ ފެންވަރުގައި ދެމެހެއްޓުމުގެ މުހިންމު ކަމުގެ މައްޗަށް އަލިއަޅުވާލައްވާ ވާހަކަ ދައްކަވާފައެވެ.

މީގެ އިތުރުން، ޢަދުލު އިންސާފު ޤާއިމުކުރުމުގައި އިންސާނީ ކަރާމާތް ނެގެހެއްޓުމަށާއި ފަލަސްތީނުގެ ރައްޔިތުން ތަހައްމަލުކުރަމުންދާ ހިތްދަތި ކަމަކީ އަދުލު އިންސާފު ގާއިމްކުރުމުގައި ބައިނަލްއަގުވާމީ މުޖުތަމައު ކުރާ މަސައްކަތްތައް މިންކުރެވިގެންދާނެ ކަމެއް ކަން ވަޒީރު ފާހަގަކުރެއްވިއެވެ.

އަދި ފަލަސްތީނު ރައްޔިތުންގެ ރައްކާތެރިކަން ކަށަވަރު ކުރުމާއި، އަނިޔާވެރިން ޖަވާބުދާރީ ކުރުވުމުގެ އިތުރުން އަނިޔާވެރިކަމަށް އަވަސް ނިމުމެއް ގެނައުމަށް ދިވެހިރާއްޖެއިން ގޮވާލާ ގޮވާލުން ވަޒީރު ވަނީ ތަކުރާރުކުރައްވާފައެވެ.

ވަޒީރުގެ ވާހަކައިގައި ބައިނަލްއަޤްވާމީ ޤާނޫނުތަކަކީ ޢަދުލުވެރި އިންސާފަށް މަގުދައްކައިދޭ ވަޞީލަތަކަށް ވާން ޖެހޭކަމަށާއި މިގޮތުން ފަލަސްތީނު ރައްޔިތުންގެ ޙައްޤުތައް ކަށަވަރުކުރުން ހިމެނޭކަން އެ މަނިކުފާނު ފާހަގަކުރެއްވިއެވެ.

އަދި ފަލަސްތީނު ރައްޔިތުންނަށް ޢަދުލު އިންސާފު ލިބުން ލަސްވުމަކީ ޢަދުލު އިންސާފު ނުލިބުން ކަމުގައި އެ މަނިކުފާނު ސިފަކުރައްވާފައިވެއެވެ. މީގެ އިތުރަށް ބައިނަލްއަގުވާމީ ޢަދުލު އިންސާފުގެ ނިޒާމުގެ އިތުބާރު ނެގެހެއްޓޭނީވެސް ފަލަސްތީނުގެ މައްސަލައަށް ޢަދުލުވެރި، ސުލްޙަވެރި ހައްލެއް އަތުވެގެން ކަމަށް މިވަޒީރުގެ ވާހަކައިގައި ފާހަގަކުރެއްވިއެވެ.

މި ފޯރަމްގައި ޤައުމުތަކުގެ ވަޒީރުން، އިސް އޮފިޝަލުން އަދި ތަޖުރިބާކާރުން އެއްތަނަކުން ބައްދަލުކުރައްވައި، ސުލްޙަވެރިކަމާއި، ޖަވާބުދާރީ ކުރުވުމާއި، ބައިނަލްއަޤްވާމީ ޢަދުލު އިންޞާފުގެ ދައުރު އެންމެ ފުރިހަމައަށް އަދާކުރާނެ ގޮތާ ބެހޭގޮތުން މަޝްވަރާ ކުރައްވާފައިވެއެވެ.

ޚާރިޖީ ވަޒީރު ޑރ. ޚަލީލްގެ އަރިހުގައި، މިނިސްޓްރީ އޮފް ފޮރިން އެފެއާޒްގެ އެޑިޝަނަލް ސެކްރެޓަރީ އަލްފާޟިލާ ޚަދީޖާ ނަޖީހާއާއި، ޤަތަރުގައި ހުންނަ ދިވެހިރާއްޖޭގެ އެމްބަސީ ވަގުތީ ގޮތުން ހިންގެވުމާ ހަވާލުވެ ހުންނެވި މުޙައްމަދު ދީދީ ޖޮއިންޓް ސެކްރެޓަރީ އަލްފާޟިލާ މަރިޔަމް މިދުފާ ނަޢީމް އަދި ޤަޠަރުގައި ހުންނަ ދިވެހިރާއްޖޭގެ އެމްބަސީގެ ސެކަންޑް ސެކްރެޓަރީ މުޙައްމަދު ތަޙުސީން ބައިވެރިވެވަޑައިގެންނެވިއެވެ.