ސިލޯނާއިއެކު ދިވެހީން: ފޮރިން މިނިސްޓްރީގެ ފަރާތުން 59،000 ރުފިޔާ ހަދިޔާކޮށްފި

ލަންކާއަށް އެރި ބާރުގަދަ ތޫފާނާއިއެކު އެގައުމަށް ބޮޑެތި ގެއްލުންތަކެއްވެ ބައިނަލަގްވާމީ އެހީއަށް އެދިފައިވާ ދަނޑިވަޅެއްގައި ރާއްޖެއިންވެސް ލަންކާއަށް އެހީވުމަށް ދައުލަތުގެ މީޑިއާ ޕީއެސްއެމްއިން އިސްނަގައިގެން ރާއްޖޭގެ ގިނަ މީޑިއާތަކަކާއި ގުޅިގެން ފެށި ޚާއްސަ ޓެލެތޯންއަށް ފޮރިން މިނިސްޓްރީގެ ފަރާތުން 59،000 ދިވެހި ރުފިޔާ ހަދިޔާކޮށްފި އެވެ.

"ސިލޯނާއެކު ދިވެހީން"ގެ ނަމުގަ ޚާއްސަ ޓެލެތޯނެއް ފެށީ މިއަދު ހެނދުނު 9 ޖެހިއިރުއެވެ. މި ޓެލެތޯން މިރޭގެ މެންދަމު 1 އާއި ހަމައަށް ކުރިޔަށްދާނެ އެވެ. މިއީ ލަންކާއަށް އެރި ބާރުގަދަ ތޫފާނާއިއެކު އެގައުމަށް ބޮޑެތި ގެއްލުންތަކެއްވެ ބައިނަލަގްވާމީ އެހީއަށް އެދިފައިވާ ދަނޑިވަޅެއްގައި ރާއްޖެއިންވެސް ލަންކާއަށް އެހީވުމަށް ކުރިއަށްގެންދާ ޓެލެތޯނެކެވެ.

މި ޓެލެތޯންއަށް ފޮރިން މިނިސްޓްރީގެ ފަރާތުން އެހީތެރިކަން ފޯރުކޮށްދިނީ މިރެ އެވެ. އެގޮތުން ޓެލެތޯން ކުރިޔަށްދާ ސްޓޫޑިއޯގައި އެހީ ޕީއެސްއެމްއާއި ހަވާލުކޮށްދެއްވީ މަރްޔަމް ޒުލްފާ އެވެ. އަދި ޕީއެސްއެމްގެ ފަރާތުން ރަމްޒީ ޗެކާއި ހަވާލުވެވަޑައިގެންނެވީ އެކުންފުނީގެ ޑިރެކްޓަރ އޮފް ޕްރޮޖެކްޓްސް އައިޝަތު އާސިފާއެވެ.

މިހާތަނަށް އައިރު ބީއެމްއެލްއިން މި ޓެލެތޯންއަށް ޚާއްސަކޮށްފައިވާ ދިވެހި ރުފިޔާ އެކައުންޓަށް ވަނީ 2،114،750.31 ރުފިޔާ ލިބިފައެވެ. އަދި ޑޮލަރު އެކައުންޓަށް ވަނީ 37،874.00 ޑޮލަރު ލިބިފައެވެ.

މިޓެލެތޯނުގައި ބައިވެރިވުމުގެ ފުރުސަތު ހުރިހާ ދިވެހި ރައްޔިތުންނަށާއި ޖަމްޢިއްޔާ، ޖަމާޢަތް، ކްލަބްތަކާއި އޮފީސްތަކަށް ވެސް ވަނީ ހުޅުވާލާފައެވެ.މި ޓެލެތޯނުގައި މާލެ އާއި ހުޅުމާލެ އަދި ވިލިމާލޭގެ އެކި ސަރަޙައްދުތަކުގައި ފަންޑު ފޮށިތައް ބެހެއްޓުމުގެ އިތުރުން ފަންޑަށް އެހީވުމަށް ފަސޭހަ ގިނަ އިންތިޒާމްތަކެއްވަނީ ހަމަޖައްސާފައެވެ. އެގޮތުން ކިއުއާރު ކޯޑް ސްކޭންކޮށްގެން ފަސޭހައިން ފައިސާ ޖަމާ ކުރެވޭނެ އިންތިޒާމްވަނީ ހަމަޖައްސާފައެވެ. އަދި ނަގުދު ފައިސާ، ޓްރާންސްފަރގެ އިތުރުން ޗެކް މެދުވެރިކޮށްވެސް މިޓެލެތޯނަށް ފައިސާ ޖަމާކުރެވޭ ގޮތް ވަނީ ހަމަޖައްސާފައެވެ.

މި ޓެލެތޯން ކުރިޔަށްދަނީ 37 މީޑިއާއެކުގައި އެވެ.