ހާމަވެގެން މިދަނީ ރައީސް ޑރ. މުޢިއްޒުގެ ޚާރިޖީ ސިޔާސަތު ހަރުދަނާވެފަ އޮތް މިންވަރު: އަބްދުއްރަހީމް

ސްރީލަންކާއަށް ދިމާވެފައިވާ ކާރިސާއަށް ރާއްޖެއިން ވަމުންދާ އެހީތެރިކަމުން ހާމަވަނީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ޚާރިޖީ ސިޔާސަތު ހަރުދަނާވެފަ އޮތް މިންވަރު ކަމަށް ރައްޔިތުންގެ މަޖިލީހުގެ ރައީސް އަދި ޕީއެންސީގެ ޗެއަރޕާސަން އަބްދުއްރަހީމް އަބްދުﷲ ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ދައުލަތުގެ މީޑިއާގައި ވާހަކަފުޅު ދައްކަވަމުންނެވެ.

ލަންކާއަށް އެހީވުމަށް ދައުލަތުގެ މީޑިއާ ޕީއެސްއެމްއިން އިސްނަގައިގެން ރާއްޖޭގެ ގިނަ މީޑިއާތަކަކާއި ގުޅިގެން ފެށި ޚާއްސަ ޓެލެތޯންއަށް މަޖިލީހުގެ މެޖޯރިޓީ ޕާޓީ، ކޮންގްރެސް ޕާޓީގެ ފަރާތުން ވަނީ ތިން ލައްކަ ރުފިޔާ ހަދިޔާކޮށްފައެވެ.

މި ޒިޔާރަތުގައި ދައުލަތުގެ މީޑިއާގައި ވާހަކަފުޅު ދައްކަވަމުން ޕީއެންސީގެ ޗެއަރޕާސަން އަބްދުއްރަހީމް އަބްދުﷲ ވަނީ ސްރީލަންކާއަކީ ރާއްޖެއާ ވަރަށް އުޙުއްވަތްތެރި އަދި ގާތް ގުޅުމެއް ތާއަބަދު އޮންނަ ގައުމެއްކަން ފާހަގަކުރައްވާ ލަންކާގެ ގުޅުމަކީ އެއްބަނޑު އެއްބަފާ ކަމުގެ ގުޅުމެއް ކަމަށް ވިދާޅުވެފައެވެ.

ލަންކާއަށް މިދަފަ ހިތާމަވެރި ކާރިސާއެއް ދިމާވުމުން އެންމެ ފުރަތަމަ އެހީވުމަށް އިސްނެގި ޤައުމެއްގެ ގޮތުގަ އަޅުގަނޑުމެންނަށް ފެނުނީ ދިވެހިރާއްޖެ. ޚާއްސަ ގޮތެއްގައި ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ އިސްނެންގެވުމުގެ ދަށުން މިކަން ފެށިގެން ދިޔުމުން ހާމަވަނީ އަވަށްޓެރި ޤައުމުތަކާއެކީގަ މިއަދުގެ ސަރުކާރުން ގެންގުޅުއްވާ ޚާރިޖީ ސިޔާސަތުގެ ވަރުގަދަކަން.ޕީއެންސީގެ ޗެއަރޕާސަން އަބްދުއްރަހީމް

މިފަދަ ކޮންމެ ކަމަކުންވެސް އެނގި ހާމަވަނީ ރައީސްގެ ޚާރިޖީ ސިޔާސަތު ހަރުދަނާ ވެފަ އޮތް މިންވަރު ކަމަށްވެސް އަބްދުއްރަހީމްގެ ވާހަކަފުޅުގައި ފާހަގަކުރެއްވިއެވެ.

ލަންކާއަށް ދިމާވެފައިވާ ހާލަތުން އަރައިގަތުމަށް އަޅުގަނޑުމެންގެ ފެންވަރުން އަޅުގަނޑުމެންގެ މިންވަރުން ވެދެއްވެން އޮތް ހުރިހާ އެހީތެރިކަމެއް ވެދިނުމުމަކީ ވަރަށް މުހިންމު ކަމެއް ކަމަށްވެސް އެމަނިކުފާނު ވިދާޅުވިއެވެ.

މި ހާދިސާގައި އަނިޔާވި ފަރާތްތަކަށް ހަމްދަރުދީ ފާޅުކުރައްވާ އަދި ނިޔާވި ފަރާތްތަކުގެ އާއިލާއަށް އަބްދުއްރަހީމް ވަނީ ތައުޒިޔާ ދަންނަވާފައެވެ.

ސްރީލަންކާއަށް އެހީތެރިކަން ފޯރުކޮށްދިނުމަށް، ދިވެހި މީޑިއާތަކުން ފެށި ޚާއްސަ ޓެލެތޯނަށް މިހާތަނަށް 8 ލައްކައަށްވުރެ ގިނަ ރުފިޔާ މިހާތަނަށް ވަނީ ލިބިފައެވެ.