ޕްރައިމެރީއަކާއި ނުލައި ވަކިބަޔަކަށް ޓިކެޓު ދިނުމުގެ ވާހަކަތަކެއް ނުދެކެވޭ، ނުވެސް ދައްކާނެ - ފަލާހް

އެތެރޭގެ އިންތިހާބަކާއި ނުލައި ޕާޓީގެ ޓިކެޓު ވަކިބަޔަކަށް ދިނުމުގެ ވާހަކަތަކެއް ނުދެކެވޭ ކަމަށާއި އެފަދަ ވާހަކަތަކެއް ނުވެސް ދައްކާނެ ކަމަށް ޕީއެންސީގެ ޕީޖީ ލީޑަރު އަދި ކައުންސިލް އިންތިހާބަށް އެޕާޓީގެ ކެމްޕެއިން މެނޭޖަރުކަން ކުރައްވާ އިބްރާހިމް ފަލާހް ވިދާޅުވެއްޖެ އެވެ.

ވެރިކަން ކުރާ ކޮންގްެރެސް ޕާޓީއިން ލޯކަލް ކައުންސިލް އިންތިހާބަށް ބައެއް ފަރާތްތަކަށް އިންތިހާބަކާއި ނުލައި ޕާޓީގެ ޓިކެޓު ދޭން އުޅޭކަމަށް ޕާޓީގެ އެތެރެ ގަޑުބަޑުކުރަން އުޅޭ ބައެއް ފަރާތްތަކުން ދަނީ އަޑުފަތުރަމުންނެވެ.

މިއަދު ބޭއްވި ނޫސްވެރިންގެ ބައްދަލުވުމެއްގައި ނޫސްވެރިއަކު ކުރި ސުވާލަކަށް ޖަވާބުދެއްވަމުން ފަލާހް ވިދާޅުވީ ޕްރައިމެރީއަށް ތައްޔާރުވެ މިއަދު ބޮޑު ނޫސްވެރިންގެ ބައްދަލުވުމެއްވެސް ޕާޓީގެ ލީޑަރޝިޕުން ބޭއްވީ ޕްރައިމެރީއަކީ ވަރަށްވެސް ދެފުށް ފެންނަ ގޮތަކަށް ކުރިޔަށްގެންދާ ޕްރައިމެރީއަކަށް ހެދުމަށް ކަމަށެވެ. އެގޮތުން ވަކީން ޚާއްސަކޮށް އެއް ކެނޑިޑޭޓަށްވުރެ ގިނަ ކެނޑިޑޭޓުން އެއްވެސް ސިޓީއެއްގައި އަދި އެއްވެސް ރަށެއްގައި ވާދަކުރައްވާނަމަ ވަރަށް ދެފުށް ފެންނަ ގޮތަކަށް ޕްރައިމެރީ ބޭއްވިގެންދާނެ ކަމަށް ފަލާހް ވިދާޅުވިއެވެ.

އަދި އެއްވެސް ވަރަކަށް ޕާޓީގެ އެތެރޭގެ ޕްރައިމެރީއެއް ނުބާއްވައި ވަކި ބަޔަކަށް ޓިކެޓުދިނުމުގެ ވާހަކައެއް ޕާޓީ ތެރޭގައި ނުދެކެވޭ ކަމަށާއި އަދި ނުވެސް ދައްކާނެ ކަމަށް ފަލާހް ވިދާޅުވިއެވެ.

2026 ވަނަ އަހަރުގެ ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތް ކުރާ ކޮމިޓީގެ އިންތިޚާބަށް ކޮންގްރެސް ޕާޓީގެ ފަރާތުން ބާއްވާ ޕްރައިމެރީ ބޭއްވުމަށް ތާވަލުކޮށްފައިވަނީ އަންނަ ޑިސެމްބަރު މަހުގެ 27 ވާ ހޮނިހިރު ދުވަހު އެވެ.

ޕީއެންސީގެ ކައުންސިލް އިންތިހާބުގެ ޕްރައިމެރީއަށް މާދަމާއިން ފެށިގެން ކުރިމަތިލެވޭނެ އިންތިހާބު ހަމަޖެހިގެންދާނެ ކަމަށާއި ޕްރައިމެރީގައި ވާދަކުރުމަށް ހުށަހަޅަންޖެހޭނީ ޕާޓީގެ ރަސްމީ ވެބްސައިޓު މެދުވެރިކޮަށް ކަމަށްވެސް ފަލްާހު މިއަދު ވަނީ ވިދާޅުވެފައި އެވެ. އެގޮތުން ޕާޓީގެ ޕްރައިމެރީގައި ވާދަކުރުމަށް ބޭނުންވާ ޕާޓީގައި މިހާރު ނެތް މެމްބަރުންނަށްވެސް ޕާޓީއާއި ގުޅިވަޑައިގެން ޕްރައިމެރީގައި ވާދަކުރުމުގެ ފުރުސަތު އޮންނާނެ ކަމަށް ފަލާހް ވިދާޅުވިއެވެ.

ޕްރައިމެރީގައި ވާދަކުރުމަށް ބޭނުންވާ ފަރާތްތަކުން މިފަށާ ޑިސެމްބަރު މަހުގެ 15 ގެ 18:00 ގެ ކުރީން އޮންލައިންކޮށް ހުށަހެޅުއްވުމަށް ވަނީ އެދިފައި އެވެ. އެގޮތުން ޕާޓީއާއި އަލަށް ގުޅިވަޑައިގަންނަވާ ފަރާތްތަކުންވެސް ސުންގަޑީގެ ކުރީން ޕާޓީއާއި ގުޅި ޕްރައިމެރީގައި ވާދަކުރުމަށް ހުށަހެޅޭނެކަން ފަލާހް ފާހަގަކުރެއްވި އެވެ.