ޒާނާގެ ދެލަނޑާއެކު ޓާފު ކުއީންސް އިން ޓާފު ކުއީންސް ޖޫނިއަރސް ބަލިކޮށްފި

ދ.ކުޑަހުވާދޫގައި މިހާރު ކުރިއަށްދާ "ކުޑަހުވަދޫ ކައުންސިލް ފުޓްސަލް މުބާރާތް 2025" ގެ އަންހެން ޑިވިޝަންގައި ރޭ ޓާފު ކުއީންސް އާއި ޓާފު ކުއީންސް ޖޫނިއަރސް ވާދަކުރި މެޗު 4-1 ގެ ނަތީޖާއަކުން ކާމިޔާބުކޮށް ޓާފު ކުއީންސް އިން ލީގުތާވަލުގެ އެއްވަނައަށް ކުރިއަށް ޖެހިލައިފިއެވެ.

މުބާރާތުގައި ޓާފު ކުއީންސް ކުޅުނު ފުރަތަމަ މެޗު ފަސޭހަކަމާއެކު 7-1 ގެ ނަތީޖާއަކުން ވިދުވަރު ސްޕޯޓްސް ކުލަބު (ވީއެސްސީ) އަތުން މޮޅުވެފައިވާއިރު، ޓާފު ކުއީންސް ޖޫނިއަރސްގެ ފުރަތަމަ މެޗުގައި މާވަހި ސްޕޯޓްސް ކުލަބު (އެމްއެސްސީ) އަތުން 2-1 ގެ ނަތީޖާއަކުން އެޓީމު ވަނީ ބަލިވެފައެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، ފުރަތަމަ ހާފުގެ އިތުރުވަގުތުގެ ތެރޭގައި ކާމިޔާބުކުރި ލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ޓާފު ކުއީންސް ކުރީގައި އޮވެގެންނެވެ. އަދި ދެވަނަ ހާފުގައި ޓާފު ކުއީންސް އިން އެޓީމުގެ އެޓޭކުތައް އިތުރަށް ވަރުގަދަކޮށް އިތުރު ތިން ލަނޑު ކާމިޔާބުކުރިއިރު މިހާފުގައި ޓާފު ކުއީންސް ޖޫނިއަރސް އިން ވެސް ވަނީ އެއްލަނޑު ކާމިޔާބުކޮށްފައެވެ.

އެގޮތުން މިމެޗުގައި ޓާފު ކުއީންސްގެ މަރިޔަމް ޒާނާ ޒަރީރު ދެލަނޑު ކާމިޔާބުކުރިއިރު، އެޓީމުގެ އައިޝަތު ޒުހާ އަދި ޕްރިޔާ ދުލާލް މިއިން ކޮންމެ ކުޅުންތެރިއަކު ވަނޫ އެއްލަނޑު ކާމިޔާބުކޮށްފައެވެ. އަދި މިމެޗުގައި ޓާފު ކުއީންސް ޖޫނިއަރސްގެ ހަމައެކަނި ލަނޑު އެޓީމުގެ އައިޝަތު އާޔާ އަލީ ޝަރީފް ކާމިޔާބުކުރިއިރު، މެޗުގެ މޮޅު ކުޅުންތެރިއަކަށް ހޮވުނީ ޓާފު ކުއީންސްގެ މަރިޔަމް ޒާނާ ޒަރީރު އެވެ.

މިނަތީޖާއެކު ލީގުބުރުގައި ކުޅުނު ދެމެޗުން ވެސް މޮޅުވެ ހަ ޕޮއިންޓާއެކު ތާވަލުގެ އެއްވަނައިގައި ޓާފު ކުއީންސް އޮތްއިރު، މިމެޗުން ބަލިވި ޓާފު ކުއީންސް ޖޫނިއަރސް ކުޅުނު ދެމެޗުން ވެސް ބަލިވެ ޕޮއިންޓެއް ނުލިބި މިވަގުތު އޮތީ ގުރޫޕްގެ ފުލުފައެވެ.

8 އޮގަސްޓް 2025 އިން 17 އޮގަސްޓް 2025 ގެ ނިޔަލަށް، ކުރިއަށްދާ މިމުބާރާތުގައި މިއަހަރު ޖުމްލަ ހަތަރު ޓީމަކުން ބައިވެރިވެފައިވާއިރު، މުބާރާތުގެ މެޗުތައް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި ހަތަރު ޓީމުގެ މެދުގައި ލީގު އުސޫލުން ކޮންމެ ޓީމެއް ކޮންމެ ޓީމަކާއި އެއްމެޗު ކުޅެ އެންމެ ރަނގަޅު ނަތީޖާއެއް ހޯދާ ދެޓީމު ފައިނަލަށް ހޮވޭގޮތަށެވެ.

ޗެންޕިއަން ޓީމަށް 20،000 އަދި ރަނަރަޕް ޓީމަށް 10،000 ރުފިޔާގެ ފައިސާގެ އިނާމެއް ހުށަހަޅާފައިވާއިރު މުބާރާތުގެ އޮފިޝަލް މީޑިއާ ޕާޓްނަރަކީ ގާފު ސްޕޯޓްސް އެވެ.