ވާދަވެރި ކުޅުމަކަށްފަހު އެފްސީ ބްރަދާސް ބަލިކޮށް ސެމީގެ ދެވަނަ ޖާގަ އެޓޭކް އެޓޭކް އެޓޭކް އިން ހޯދައިފި

މިހާރު ކުރިއަށްދާ "ކުޑަހުވަދޫ ކައުންސިލް ފުޓްސަލް މުބާރާތް 2025" ގެ ފިރިހެން ޑިވިޝަން ގުރޫޕް ދޭއްގައި ރޭ، ވާދަވެރި ކުޅުމަކަށްފަހު 4-3 ގެ ނަތީޖާއަކުން އެފްސީ ބްރަދާސް ބަލިކޮށް ގުރޫޕްގެ ދެވަނަ ޓީމުގެ ގޮތުގައި އެޓޭކް އެޓޭކް އެޓޭކް އިން މުބާރާތުގެ ސެމީފައިނަލުން ޖާގަ ހޯދައިފިއެވެ.

މުބާރާތުގެ ގުރޫޕް ސްޓޭޖުގައި އެފްސީ ބްރަދާސް ކުޅުނު ފުރަތަމަ މެޗުގައި ޑްރީމް އެފްސީ އަތުން 5-2 ގެ ނަތީޖާއަކުން ބަލިވެފައިވާއިރު، ދެވަނަ މެޗުގައި އެޓޭކް އެޓޭކް އެޓޭކް އާއި ވާދަކޮށް 1-1 ގެ ނަތީޖާއަކުން ދެޓީމު ވަނީ އެއްވަރުވެފައެވެ. އަދި އެޓީމުގެ ތިންވަނަ މެޗުގައި ޑްރީމް އެފްސީ އަތުން ބަލިވީ 12-0 ގެ ތަފާތުބޮޑު ނަތީޖާއަކުންނެވެ.

މުބާރާތުގެ ގުރޫޕް ސްޓޭޖުގައި އެޓޭކް އެޓޭކް އެޓޭކް ކުޅުނު ފުރަތަމަ މެޗުގައި 5-1 ގެ ނަތީޖާއަކުން ޑްރީމް އެފްސީ އަތުން ބަލިވެފައިވާއިރު، ދެވަނަ މެޗުގައި އެފްސީ ބްރަދާސް އާއި ވާދަކޮށް 1-1 ގެ ނަތީޖާއަކުން ދެޓީމު ވަނީ އެއްވަރުވެފައެވެ. އަދި އެޓީމުގެ ތިންވަނަ މެޗުގައި ޑްރީމް އެފްސީ އަތުން ބަލިވީ 12-2 ގެ ތަފާތުބޮޑު ނަތީޖާއަކުންނެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، ފުރަތަމަ ހާފުގެ ކުޅުނު ނިމިގެންދިޔައީ 1-1 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ. އަދި ދެވަނަ ހާފުގައި ދެ ޓީމުން ވެސް އެޓޭކުތައް އިތުރަށް ވަރުގަދަކުރިއިރު، މިހާގައި އެޓޭކް އެޓޭކް އެޓޭކް އިތުރު ތިން ލަނޑު ކާމިޔާބުކުރިއިރު، މިހާފުގައި އެފްސީ ބްރަދާސް އިން ވެސް ވަނީ އިތުރު ދެލަނޑު ކާމިޔާބުކޮށްފައެވެ.

އެގޮތުން މިމެޗުގައި އެޓޭކު އެޓޭކު އެޓޭކުގެ މުހައްމަދު އިސްމާއިލް ދެލަނޑު ކާމިޔާބުކުރިއިރު، އެޓީމުގެ މުހައްމަދު ޝަނީޒު އަދި ހަސަން ޝަރީފް މިއިން ކޮންމެ ކުޅުންތެރިއަކު ވަނީ އެއްލަނޑު ކާމިޔާބުކޮށްފައެވެ. އަދި މީގެ އިތުރުން މިމެޗުގައި އެފްސީ ބްރަދާސްގެ އިބްރާހިމް ހައްޔާން ހާމިދު ދެލަނޑު ކާމިޔާބުކުރިއިރު، އެޓީމުގެ އަނެއް ލަނޑު ކާމިޔާބުކޮށްދިނީ އަހުނަފު އިސްމާއިލް އެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ އެޓޭކް އެޓޭކް އެޓޭކްގެ މުހައްމަދު އިސްމާއިލް އެވެ.

މިނަތީޖާއެކު ގުރޫޕް ސްޓޭޖުގައި ކުޅުނު ހަތަރު މެޗުން ހޯދި ހަތަރު ޕޮއިންޓާއެކު ގުރޫޕްގެ ދެވަނަ ޓީމުގެ ގޮތުގައި އެޓޭކް އެޓޭކް އެޓޭކް ފައިނަލުން ޖާގަހޯދިއިރު، މިމެޗުން ބަލިވި އެފްސީ ބްރަދާސް އިން މުބާރާތް ނިންމާލީ ކުޅުނު ހަތަރު މެޗުން ލިބުނު އެއްޕޮއިންޓާއެކު ގުރޫޕްގެ ފުލުގައި އޮވެގެންނެވެ.

8 އޮގަސްޓް 2025 އިން 17 އޮގަސްޓް 2025 ގެ ނިޔަލަށް، ކުރިއަށްދާ މިމުބާރާތުގައި މިއަހަރު ޖުމްލަ ހަ ޓީމަކުން ބައިވެރިވެފައިވާއިރު، މުބާރާތުގެ މެޗުތައް ކުރިއަށް ދަނީ ބައިވެރިވި ހަ ޓީމު ދެގުރޫޕަކަށް ބަހާލައިގެންނެވެ. އަދި ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމު ސެމީފައިނަލަށް ހޮވޭގޮތަށެވެ.

ޗެންޕިއަން ޓީމަށް 20،000 އަދި ރަނަރަޕް ޓީމަށް 10،000 ރުފިޔާގެ ފައިސާގެ އިނާމެއް ހުށަހަޅާފައިވާއިރު މުބާރާތުގެ އޮފިޝަލް މީޑިއާ ޕާޓްނަރަކީ ގާފު ސްޕޯޓްސް އެވެ.