
ޓާފް ކުއީންސް ބަލިކޮށް ލީގު ބުރުގެ އެއްވަނަ މާވަހި ސްޕޯޓްސް ކުލަބުން ކަށަވަރުކޮށްފި
# ދިވެހި ކުޅިވަރު # ކުޑަހުވަދޫ ކައުންސިލް ފުޓްސަލް މުބާރާތް 2025ޓާފު ކުއީންސް އާއި މާވަހި ސްޕޯޓްސް ކުލަބު ވާދަކުރި މެޗުގެ ތެރެއިން.. ފޮޓޯ: ކުޑަހުވަދޫ ކައުންސިލް
ދ.ކުޑަހުވާދޫގައި މިހާރު ކުރިއަށްދާ "ކުޑަހުވަދޫ ކައުންސިލް ފުޓްސަލް މުބާރާތް 2025" ގެ އަންހެން ޑިވިޝަންގައި ރޭ ކުޅުނު މެޗުގައި ވާދަވެރި ކުޅުމަކަށްފަހު 2-1 ގެ ނަތީޖާއަކުން ޓާފު ކުއީންސް ބަލިކޮށް މާވަހި ސްޕޯޓްސް ކުލަބު (އެމްއެސްސީ) އިން ލީގުބުރުގެ އެއްވަނަ ޔަގީންކޮށްފިއެވެ.

މުބާރާތުގައި އެމްއެސްސީ ކުޅުނު ފުރަތަމަ މެޗުގައި ޓާފު ކުއީންސް ޖޫނިއަރސް އަތުން 2-1 ގެ ނަތީޖާއަކުން މޮޅުވެފައިވާއިރު، ދެވަނަ މެޗުގައި ވިދުވަރު ސްޕޯޓްސް ކުލަބު (ވީއެސްސީ) އަތުން މޮޅުވީ 2-0 ގެ ނަތީޖާއަކުންނެވެ. އަދި ޓާފު ކުއީންސްގެ ފުރަތަމަ މެޗުގައި 7-1 ގެ ތަފާތުބޮޑު ނަތީޖާއަކުން ވީއެސްސީ އަތުން މޮޅުވިއިރު، ދެވަނަ މެޗުގައި ޓާފު ކުއީންސްވޖޫނިއަރސް އަތުން އެޓީމު މޮޅުވީ 4-1 ގެ ނަތީޖާއަކުންނެވެ.
ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ފުރަތަމަ ލަނޑުޖަހައި ކުރިހޯދީ އެމްއެސްސީ އިންނެވެ. މި ލަނޑު ފުރަތަމަ ހާފުގެ 12 ވަނަ މިނެޓުގައި އެޓީމަށް ކާމިޔާބުކޮށްދިނީ ފާތުމަތު ސީނާ އަބްދުލް ރަޝީދު އެވެ.
އެމްއެސްސީ އިން ލީޑު ފުޅާކުރި ލަނޑު ފުރަތަމަ ހާފުގެ އެންމެ ފަހު މިނެޓުގައި އެޓީމަށް ކާމިޔާބުކޮށްދިނީ ފަރުޒާނާ އިބްރާހިމް އެވެ. އަދި މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 2-0 ގެ ނަތީޖާއަކުން އެމްއެސްސީ ކުރީގައި އޮވެގެންނެވެ.
މެޗުގެ ދެވަނަ ހާފުގައި ޓާފު ކުއީންސް އިން އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކުރިއިރު، އެޓީމުން ނަތީޖާގެ ފަރަގު ކުޑަކުރި ލަނޑު ފަހުހާފުގެ 38 ވަނަ މިނެޓުގައި ކާމިޔާބުކޮށްދިނީ މަރިޔަމް ޒާނާ ޒަމީރު އެވެ. އަދި މިލަނޑާއެކު މެޗުގެ ކުޅުން ނިމިގެންދިޔައީ 2-1 ގެ ނަތީޖާއަކުން އެމްއެސްސީ ކުރީގައި އޮވެގެންނެވެ.
މިނަތީޖާއެކު ލީގުބުރުގައި ކުޅުނު ތިން މެޗުން ވެސް މޮޅުވެ ނުވަ ޕޮއިންޓާއެކު ލީގުބުރުގެ އެއްވަނަ އެމްއެސްސީ އިން ކަށަވަރުކުރިއިރު، މިމެޗުން ބަލިވި ޓާފު ކުއީން ކުޅުނު ތިން މެޗުން ހޯދި ހަ ޕޮއިންޓާއިއެކު ލީގުބުރު ނިންމާލީ ތާވަލުގެ ދެވަނައިގައެވެ. އަދި މިމެޗަށް ނިކުތްއިރު ވެސް މިދެޓީމުން ވަނީ މުބާރާތުގެ ފައިނަލުގެ ޖާގައެއް ކަށަވަރުކޮށްފައެވެ.
8 އޮގަސްޓް 2025 އިން 17 އޮގަސްޓް 2025 ގެ ނިޔަލަށް، ކުރިއަށްދާ މިމުބާރާތުގައި މިއަހަރު ޖުމްލަ ހަތަރު ޓީމަކުން ބައިވެރިވެފައިވާއިރު، މުބާރާތުގެ މެޗުތައް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި ހަތަރު ޓީމުގެ މެދުގައި ލީގު އުސޫލުން ކޮންމެ ޓީމެއް ކޮންމެ ޓީމަކާއި އެއްމެޗު ކުޅެ އެންމެ ރަނގަޅު ނަތީޖާއެއް ހޯދާ ދެޓީމު ފައިނަލަށް ހޮވޭގޮތަށެވެ.
ޗެންޕިއަން ޓީމަށް 20،000 އަދި ރަނަރަޕް ޓީމަށް 10،000 ރުފިޔާގެ ފައިސާގެ އިނާމެއް ހުށަހަޅާފައިވާއިރު މުބާރާތުގެ އޮފިޝަލް މީޑިއާ ޕާޓްނަރަކީ ގާފު ސްޕޯޓްސް އެވެ.
ގުޅުންހުރި

ތަފާތުބޮޑު ނަތީޖާއަކުން ޑްރީމް އެފްސީ ބަލިކޮށް ރުއްދަށް އެސްސީ ފައިނަލުން ޖާގަ ހޯދައިފި

ފަސޭހަކަމާއެކު އެޓޭކް އެޓޭކް އެޓޭކް ބަލިކޮށް ގުޅުން ކަންމަތި ފައިނަލުން ޖާގަ ހޯދައިފި

ޓާފް ކުއީންސް ބަލިކޮށް ލީގު ބުރުގެ އެއްވަނަ މާވަހި ސްޕޯޓްސް ކުލަބުން ކަށަވަރުކޮށްފި
