ފަސޭހަކަމާއެކު ވިދުވަރު ސްޕޯޓްސް ކުލަބު ބަލިކޮށް ޓާފު ކުއީންސް މުބާރާތް ފެށީ އިތުބާރާއެކު

ދ.ކުޑަހުވާދޫގައި މިހާރު ކުރިއަށްދާ "ކުޑަހުވަދޫ ކައުންސިލް ފުޓްސަލް މުބާރާތް 2025" ގެ އަންހެން ޑިވިޝަންގައި ރޭ ޓާފު ކުއީންސް އާއި ވިދުވަރު ސްޕޯޓްސް ކުލަބު (ވީއެސްސީ) ވާދަކުރި މެޗު ފަސޭހަކަމާއެކު 7-1 ގެ ނަތީޖާއަކުން ޓާފު ކުއީންސް އިން ކާމިޔާބުކޮށްފިއެވެ.

މުޅި މެޗުގައި ވެސް މޮޅަށް ކުޅެ ޓާފު ކުއީންސް އިން މެޗު ޑޮމިނޭޓްކުރިިއިރު، ފުރަތަމަ ހާފުގެ ކުޅުން ނިމިގެންދިޔައީ 2-0 ގެ ނަތީޖާއަކުން ޓާފު ކުއީންސް ކުރީގައި އޮވެގެންނެވެ. އަދި މެޗުގެ ދެވަނަ ހާފުގައި ޓާފު ކުއީންސް އިން އެޓީމުގެ އެޓޭކުތައް އިތުރަށް ވަރުގަދަކޮށް އިތުރު ފަސް ލަނޑު ކާމިޔާބުކުރިއިރު، މިހާފުގައި ވީއެސްސީ އިން ވެސް ވަނީ އެއްލަނޑު ކާމިޔާބުކޮށްފައެވެ.

އެގޮތުން މިމެޗުގައި ޓާފު ކުއީންސްގެ މަރިޔަމް ރަނާ ޒަރީރު ހަތަރު ލަނޑު ކާމިޔާބުކުރިއިރު، އެޓީމުގެ އައިޝަތު ޒުހާ ވަނީ ދެލަނޑު ކާމިޔާބުކޮށްފައެވެ. އަދި އެޓީމުގެ އަނެއްލަނޑު ލުބުނާ ގާސިމް ކާމިޔާބުކުރިއިރު، ވީއެސްސީގެ ހަމައެކަނި ލަނޑު ކާމިޔަބުކޮށްދިނީ އެޓީމުގެ އައިޝަތް ރަފާހަތު އެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ ޓާފު ކުއީންސްގެ މަރިޔަމް ރަނާ ޒަރީރު އެވެ.

8 އޮގަސްޓް 2025 އިން 17 އޮގަސްޓް 2025 ގެ ނިޔަލަށް، ކުރިއަށްދާ މިމުބާރާތުގައި މިއަހަރު ޖުމްލަ ހަތަރު ޓީމަކުން ބައިވެރިވެފައިވާއިރު، މުބާރާތުގެ މެޗުތައް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި ހަތަރު ޓީމުގެ މެދުގައި ލީގު އުސޫލުން ކޮންމެ ޓީމެއް ކޮންމެ ޓީމަކާއި އެއްމެޗު ކުޅެ އެންމެ ރަނގަޅު ނަތީޖާއެއް ހޯދާ ދެޓީމު ފައިނަލަށް ހޮވޭގޮތަށެވެ.

ޗެންޕިއަން ޓީމަށް 20،000 އަދި ރަނަރަޕް ޓީމަށް 10،000 ރުފިޔާގެ ފައިސާގެ އިނާމެއް ހުށަހަޅާފައިވާއިރު މުބާރާތުގެ އޮފިޝަލް މީޑިއާ ޕާޓްނަރަކީ ގާފު ސްޕޯޓްސް އެވެ.