ފުރަތަމަ މެޗުގައި ގުޅުން ކަންމަތިން އައްކަން އެސްސީ ކޮޅަށް 15 ލަނޑު ޖަހައިފި

މިހާރު ކުރިއަށްދާ "ކުޑަހުވަދޫ ކައުންސިލް ފުޓްސަލް މުބާރާތް 2025" ގެ ފިރިހެން ޑިވިޝަން ގުރޫޕް އެކެއްގައި މިރޭ އައްކަން އެސްސީ އާއި ގުޅުން ކަންމަތި ވާދަކުރި މެޗު ފަސޭހަކަމާއެކު 15-1 ގެ ތަފާތުބޮޑު ނަތީޖާއަކުން މޮޅުވެ ގުޅުން ކަންމަތިން މުބާރާތުގެ ފެށުން ރަނގަޅުކޮށްފިއެވެ.

މުބާރާތުގެ ގުރޫޕް ސްޓޭޖުގައި އައްކަން އެސްސީ ކުޅުނު ފުރަތަމަ މެޗުގައި 6-1 ގެ ނަތީޖާއަކުން ރުއްދަށް އެއްސީ އަތުން ބަލިވެފައިވާއިރު، މިއީ މުބާރާތުގައި ގުޅުން ކަންމަތިން ކުޅުނު ފުރަތަމަ މެޗެވެ.

މުޅި މެޗުގައި ވެސް މޮޅަށް ކުޅެ ގުޅުން ކަންމަތިން މެޗު ޑޮމިނޭޓްކުރިއިރު، ފުރަތަަމަ ހާފުގެ ކުޅުން ނިމިގެންދިޔައީ ހަތަރު ލަނޑުގެ ލީޑަކާއެކު 5-1 ގެ ނަތީޖާއަކުން ގުޅުން ކަންމަތި ކުރީގައި އޮވެގެންނެވެ. އަދި ދެވަނަ ހާފުގައި ގުޅުން ކަންމަތިން އެޓީމުގެ އެޓޭކުތައް އިތުރަށް ވަރުގަދަކުރިއިރު، މިހާފުގައި އެޓީމުން ވަނީ އިތުރު 10 ލަނޑު ކާމިޔާބުކޮށްފައެވެ.

އެގޮތުން މިމެޗުގައި ގުޅުން ކަންމަތީގެ އަހުމަދު އާޖިލް މުހައްމަދު ފަޔާޒް ހަތަރު ލަނޑު ކާމިޔާބުކުރިއިރު، އެޓީމުގެ ހުސެއިން އިފްހާމް ވަނީ ތިންލަނޑު ކާމިޔާބުކޮށް ހެޓްރިކް ހަދާފައެވެ. އަދި އެޓީމުގެ އަބްދުލް މުގުސިތު، ހުސެއިން ޝާމިހް އަދި އިބްރާހިމް ހުޝާމް މިއިން ކޮންމެ ކުޅުންތެރިއަކު ވަނީ ދެލަނޑު ކާމިޔާބުކޮށްފައެވެ.

މީގެ އިތުރުން މިމެޗުގައި ގުޅުން ކަންމަތީގެ ލުޖައިން ހުސެއިން އަދި ހާޒިމް ފައުޒީ މިއިން ކޮންމެ ކުޅުންތެރިއަކު އެއްލަނޑު ކާމިޔާބުކުރިއިރު، އައްކަން އެސްސީގެ ހަމައެކަނި ލަނޑު ކާމިޔާބުކޮށްދިނީ އެޓީމުގެ ސަލްމާން ލުގުމާން އެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ ގުޅުން ކަންމަތީގެ ހާޒިމް ފައުޒީ އެވެ.

8 އޮގަސްޓް 2025 އިން 17 އޮގަސްޓް 2025 ގެ ނިޔަލަށް، ކުރިއަށްދާ މިމުބާރާތުގައި މިއަހަރު ޖުމްލަ ހަ ޓީމަކުން ބައިވެރިވެފައިވާއިރު، މުބާރާތުގެ މެޗުތައް ކުރިއަށް ދަނީ ބައިވެރިވި ހަ ޓީމު ދެގުރޫޕަކަށް ބަހާލައިގެންނެވެ. އަދި ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމު ސެމީފައިނަލަށް ހޮވޭގޮތަށެވެ.

ޗެންޕިއަން ޓީމަށް 20،000 އަދި ރަނަރަޕް ޓީމަށް 10،000 ރުފިޔާގެ ފައިސާގެ އިނާމެއް ހުށަހަޅާފައިވާއިރު މުބާރާތުގެ އޮފިޝަލް މީޑިއާ ޕާޓްނަރަކީ ގާފު ސްޕޯޓްސް އެވެ.