މާލޭގެ ބައެއް ސަރަހައްދުތަކަށް ކަރަންޓު ދޭން ފަށައިފި

ކުއްލި ގޮތަކަށް މިއަދު ހެނދުނު މާލެއާއި ހުޅުމާލެއިން ކަރަންޓު ކެނޑުމަށްފަހު މާލޭގެ ބައެއް ސަރަހައްދުތަކަށް މިހާރު ކަރަންޓު ދޭން ފަށައިފި އެވެ.

މާލެ އާއި ހުޅުމާލޭގެ ހުރިހާ ސަރަހައްދަކުން ކަރަންޓުގެ ހިދުމަތް ކެނޑުނީ މިއަދު ހެނދުނު 09:50 ހާއިރު އެވެ. އެގޮތުން ސްޓެލްކޯއިން ބުނީ ދިމާވި ޓެކްނިކަލް މައްސަލައަކާއި ގުޅިގެން މާލެއާއި ހުޅުމާލެއިން ކަރަންޓުގެ ހިދުމަތް މެދުކެނޑިފައިވާ ކަމަށާއި މައްސަލަ ހައްލުކޮށް އަލުން ކަރަންޓު ދިނުމުގެ މަސައްކަތްތައް ކުރެވެމުންދާ ކަމަށެވެ.

މައްސަލަ ހައްލުކުރުމުގެ މަސައްކަތް ކުރަމުންދާއިރު މިހާރު މާލޭގެ ބައެއް ސަރަހައްދުތަކަށް ވަނީ ކަރަންޓު ދޭން ފަށާފައި އެވެ. އެގޮތުން މާ ލަސްތަކެއް ނުވެ ހުރިހާ ސަރަހައްދަކަށް ކަރަންޓުގެ ހިދުމަތް ދޭން ފެށޭނެ ކަމަށް ބެލެވެއެވެ.

ކަރަންޓުގެ ހިދުމަތް ކުއްލި ގޮތަކަށް މެދުކެނޑުނު ސީދާ ސަބަބެއް އަދި މިހާތަނަށް ސްޓެލްކޯއިން ހާމައެއް ނުކުރެއެވެ.