ވެލިދޫ ހޮސްޕިޓަލުގެ އަމަލީ މަސައްކަތް ރަސްމީކޮށް ފަށައިފި

ނ ވެލިދޫގައި އަލަށް އިމާރާތްކުރާ ހޮސްޕިޓަލުގެ އަމަލީ މަސައްކަތް ރަސްމީކޮށް ފަށައިފި އެވެ.

މި މަޝްރޫއުގެ އަމަލީ މަސައްކަތް ފަށާފައިވަނީ ރައީސް ޑރ މުހައްމަދު މުއިއްޒު މިހާރު ނ އަތޮޅަށް ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިން މިއަދު ހަވީރު ވެލިދޫއަށް އެމަނިކުފާނު ވަޑައިގެންނެވެވުމުންނެވެ.

އެގޮތުން ވެލިދޫގައި އޮތް ޚާއްސަ ރަސްމިއްޔާތުގައި މި މަޝްރޫއުގެ އަމަލީ މަސައްކަތް ފައްޓަވައިދެއްވި ހެލްތު މިނިސްޓަރު އަހުމަދު ނާޒިމް އާއި އާރްޑީސީގެ މެނޭޖިންގ ޑިރެކްޓަރު ބްރިގޭޑިއާ ޖެނެރަލް ރިޓަޔާޑް އަލީ ޒުހެއިރުގެ އިތުރުން ވެލިދޫ ކައުންސިލްގެ ރައީސް އާތިފް ހުސެއިން އެވެ.

މި ރަސްމިއްޔާތުގައި ރައީސް ޑރ މުހައްމަދު މުއިއްޒުގެ އިތުރުން ސަރުކާރުގެ ވަޒީރުންނާއި ކުންފުނި ތަކުގެ އިސްވެރިންގެ އިތުރުން ވެލިދޫ ކައުންސިލާއި މުވައްސަސާތަކުގެ އިސްވެރިންވެސް ވަނީ ބައިވެރިވެވަޑައިގެންފައެވެ.

ވެލިދޫ ހޮސްޕިޓަލުގެ މަސައްކަތް ސަރުކާރުން އާރްޑީސީއާއި ހަވާލުކުރީ މިދިޔަ މާޗު މަހުގެ ތެރޭގައި އެވެ.

އެގޮތުން މި މަސައްކަތް އާރްޑީސީއާއި ހަވާލުކުރީ 108,322,537.03 ރުފިޔާ އަށް 540 ދުވަސް ތެރޭގައި ނިންމާގޮތަށެވެ.