5 މިލިއަން ގަސް އިންދުމުގެ މަޝްރޫއު: ސްޓެލްކޯއިން މި ހަފްތާ ބަންދުގައިވެސް ގަސް އިންދުމުގެ ހަރަކާތްތައް ކުރިޔަށް ގެންދިޔަ!

ސްޓެލްކޯ އިން އަމާޒު ހިފާފައިވާ 500,000 ގަސް އިންދުމުގެ ޕްރޮގްރާމުގެ ދަށުން މި ހަފްތާ ބަންދުގައިވެސް ގިނަ އަދަދެއްގެ ގަސް އިންދުމަށް ހަރަކާތްތަކެއް ކުރިޔަށް ގެންގޮސްފި އެވެ.

ސްޓެލްކޯއިން 5 ލައްކަ ގަސް އިންދުމަށް ޕްލެޖުވީ ފަސް މިލިއަން ގަސް އިންދުމަށް އަމާޒުކޮށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެވަޑައިގެންފައިވާ ވަޢުދު ފުރިހަމަކުރުމަށެވެ. އެގޮތުން ސްޓެލްކޯއިން ވައުދުވެފައިވާ އަދަދަށް ގަސް އިންދުމަށް ރަސްމީކޮށް މަސައްކަތް ފެށީ މިދިޔަ އަހަރުގެ ޖޫން މަހުގެ ތެރޭގައި އެވެ.

މި ޕްލެޖް ހާސިލުކުރުމަށް ކުރަމުންދާ މަސައްކަތްތަކާއި ގުޅޭގޮތުން މިއަދު އެކުންފުނީގެ އެމްޑީ ހުސެއިން ފަހުމީ އެކްސްގައި ކުރެެއްވި ޕޯސްޓެއްގައި ވިދާޅުވީ ފަސް މިލިއަން ގަސް އިންދުމަށް އަމާޒުކޮށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެވަޑައިގެންފައިވާ ވަޢުދު ފުރިހަމަކުރުމަށް، ސްޓެލްކޯއިން ޕްލެޖްވެފައިވާ ގޮތަށް 500،000 ގަސް އިންދުމުގެ އަމާޒަށް ވާޞިލްވުމަށްޓަކައި ގިނަ މަސައްކަތްތަކެއް ކުރެވެމުންދާ ކަމަށެވެ.

އެގޮތުން ސްޓެލްކޯއިން ހިދުމަތްދޭ ރަށްރަށުގައި ހަފްތާ ބަންދުތަކުގައި ދަނީ ގަސް އިންދުމުގެ ހަރަކާތްތަކެއް ހިންގަމުންކަން ފާހަގަކުރައްވައި ފަހުމީ ވިދާޅުވީ މާތްﷲގެ އިރާދަފުޅާއެކު ރައީސްގެ ވައުދު ފުއްދެވުމަށް ސްޓެލްކޯއިން އަމާޒުހިފާފައިވާ ގޮތައް ފަސްލައްކަ ގަސް އިންދިގެންދާނެ ކަމަށެވެ.

ސްޓެލްކޯގެ އިސް އޮފިޝަލަކު ވިދާޅުވީ ހަފްތާ ބަންދުގައި ސްޓެލްކޯގެ މުވައްޒަފުން 15،000 އަށްވުރެ ގިނަ ގަސް އިންދާފައިވާ ކަމަށެވެ.

މި ޕްރޮގްރާމް ފުރިހަމަ ކުރުމަށް ކުރިއަށް އޮތް ތަނުގައި ކޮންމެ މަހަކުވެސް ސްޓެލްކޯއިން ހިދުމަތްދޭ ރަށްރަށުގައި ގަސް އިންދުމުގެ ހަރަކާތްތައް ކުރިއަށް ގެންދިޔުމަށް ނިންމާފައިވާ ކަމަށް އެކުންފުނިން ވަނީ މީގެ ކުރީން ބުނެފައި އެވެ. އެގޮތުން, އެކުންފުނިން މި ޕްރޮގްރާމް ފެށިފަހުން މަހަކު ގާތްގަނޑަކަށް 9200 އިންދުމަށް އެކުންފުނިން އަމާޒު ހިފާފައިވާ ކަމަށް ވަނީ ބުނެފައި އެވެ.

ފަސް އަހަރުން ފަސް މިލިއަން ގަސް އިންދުމުގެ ޕްރޮގްރާމަކީ 2023 ވަނަ އަހަރު ދުބާއީގައި ކުރިއަށްދިޔަ 28 ވަނަ ކޮންފަރެންސް އޮފް ދަ ޕާޓީސް ޓު ދަ ޔުނައިޓެޑް ނޭޝަންސް ފްރޭމްވޯކް ކޮންވެންޝަން އޮން ކްލައިމެޓް ޗޭންޖް (ކޮޕް28) ބައްދަލުވުމުގެ މަތީ ފަންތީގެ ސެގްމެންޓްގައި ޤައުމީ ބަޔާން އިއްވަވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިޢުލާން ކުރައްވާފައިވާ ޕްރޮގްރާމެކެވެ.