މޯލްޑިވިއަންގެ ފްލީޓާއި އަލަށް ގުޅޭ އޭޓީއާރް ރާއްޖެ ގެނެސްފި

ރާއްޖޭގެ ގައުމީ އެއާލައިން، މޯލްޑިވިއަންގެ ފްލީޓާއި އަލަށް ގުޅޭ އޭޓީއާރް މަރުކާގެ ބޯޓު ރާއްޖެ އަތުވެއްޖެ އެވެ.

ފްރާންސްގެ ޓޫލޫސްގައި ހުންނަ އޭޓީއާރު ޑެލިވަރީ ސެންޓަރުން ފުރައިގެން އައި މި ބޯޓު ވެލާނާ އިންޓަނޭޝަނަލް އެއާޕޯޓް (ވީއައިއޭ)އަށް ޖެއްސީ މިއަދު ހަވީރު 4:05 ގައި އެވެ މި ބޯޓު ޖެއްސުމާއިއެކު އެމްއޭސީއެލްއިން ވަނީ މި ބޯޓަށް ވޯޓާ ސެލިއުޓެއް ދީފައެވެ. މި ބޯޓު އޭޓީއާރްއިން މޯލްޑިވިއަންއާއި ހަވާލުކުރުމާއި އެކު ބޯޓު ރާއްޖެ ގެނައީ މޯލްޑިވިއަންގެ ޕައިލެޓުންގެ ޓީމަކުންނެވެ.

މިއީ މޯލްޑިވިއަންގެ ފްލީޓާއި ގުޅޭ 5 ވަނަ އޭޓީއާރެވެ. އަދި އެއެއާލައިންގެ 25 ވަނަ މަތިންދާބޯޓެވެ. މިއަދު ގެނައި އޭޓީއާރްއަކީ 46 މީހުންގެ ޖާގައިގެ އޭޓީއާރު 42-600 ވޭރިއަންޓްގެ މަތިންދާބޯޓެކެވެ.

މޯލްޑިވިއަން އިން މިހާރު ބޭނުންކުރަމުން އަންނަ ދުވަސްވީ ޑޭޝް-8 މަރުކާގެ އެއާކްރާފްޓްތައް ބޭނުންކުރުން ހުއްޓާލައި އެއާލައިނުން މަސައްކަތް ކުރަމުން އަންނަނީ އޭޓީއާރް އެއާކްރާފްޓްތަކުގެ ފްލީޓެއް ގާއިމްކުރުމަށެވެ.

އެގޮތުން ފްރާންސްގެ އޭޓީއާރު ކުންފުނިން މުޅިން އާ ހަތަރު މަތިންދާބޯޓެއް ގަނެގެން މިހާރުވެސް މޯލްޑިވިއަނުން އަންނަނީ ބޭނުން ކުރަމުންނެވެ. އެއީ އޭޓީއާރް 600-72 މަރުކާގެ ދެ އެއާކްރާފްޓާއި އޭޓީއާރް 600-42 މަރުކާގެ ދެ ބޯޓެކެވެ.