ޓްވިން އޮޓަރ މަރުކާގެ ބޯޓުތަކުން ދެކުނުގެ 4 އަތޮޅު ވައިގެ ދަތުރުން ގުޅާލައިފި

ރާއްޖޭގައި ސީޕްލޭން ހިދުމަތް ދޭން ބޭނުންކުރާ ޓްވިން އޮޓަރ މަރުކާގެ ބޯޓުތަކުގައި ފުރޮޅު ހަރުކޮށް އެއާޕޯޓުތަކަށް ޖެއްސޭ ގޮތް ހަދައި ދެކުނުގެ 4 އަތޮޅު ވައިގެ ދަތުރުން ގުޅާލައިފި އެވެ.

ދެކުނުގެ ހަތަރު އަތޮޅު ފައިގެ މަގުން ގުޅާލުމަށް މިއަދު ވަނީ ޚާއްސަ ރަސްމިއްުޔާތެއް އައްޑޫ ގަން އެއާޕޯޓުގައި ބާއްވާފައި އެވެ. މިއަދު ރަސްމިއްޔާތު ޝަރަފުވެރިކޮށްދެއްވީ ދަތުރުފަތުރާއި މަދަނީ އުދުހުންތަކާބެހޭ ވަޒީރު މުޙައްމަދު އަމީންއެވެ. މީގެ އިތުރުން މި ރަސްމިއްޔާތުގައި ކެބިނެޓުގެ ގިނަ ވަޒީރުންނާއި މޯލްޑިވިއަންގެ އިސްބޭފުޅުން ބައިވެރިވެ ވަޑައިގެންނެވިއެވެ.

ދެކުނުގެ އަތޮޅުގެ 4 އެއާޕޯޓު ވައިގެ މަގުން އެއް އެއާޕޯޓު އަނެއް އެއާޕޯޓާއި ގުޅުވާލައި ދަތުރުތައް މިހާރު ފަށާފައިވާއިރު، މި ދަތުރުތަކުގެ އަގުތައްވެސް ހާމަކޮށް ބުކިންގ އަށް މިހާރު ވަނީ ހުޅުވާފައި އެވެ، 5 ސެކްޓަރ ނުވަތަ ރޫޓަށް ބަހާލައިގެން ގައުމީ އެއާލައިން، މޯލްޑިވިއަންއިން ފެށި މި ފަތުރުތަކުގެ ސެކްޓަރތަކަކީ، އައްޑޫ ގަމުން ހުވަދު އަތޮޅުގެ ކާޑެއްދޫ އަދި ކޫއްޑޫ އެއާޕޯޓުގެ އިތުރުން ފުވައްމުލަކަށް ދަތުރު ކުރާ ގޮތަށާއި ފުވައްމުލަކުން ކާޑެއްދޫ އަދި ކޫއްޑޫއަށް ދެވޭ ގޮތަށެވެ.

މޯލްޑިވިއަންގެ ދެކުނުގެ ދަތުރުތަކާއި އަގުތައް

• ގަން - ފުވައްމުލައް - 500ރ• ފުވައްމުލައް - ކޫއްޑޫ - 650ރ• ފުވައްމުލައް - ކާޑެއްދޫ - 650ރ• ގަން - ކާޑެއްދޫ - 900ރ• ގަން - ކޫއްޑޫ - 900ރ

މި ދަތުރުތައް ކުރުމަށް ހަމަޖެހިފައިވަނީ، މޯލްޑިވިއަންގެ އެންމެ ކުދި ސީޕްލޭން ދަތުރުތަކުގައި ބޭނުންކުރާ ޓްވިން އޮޓަރ މަރުކާގެ ބޯޓުތައް ވައިގެ ބަނދަރުތަކަށް ޖެއްސޭނެ ހެން ފުރޮޅު ހަރުކޮށްފައިވެއެވެ. މި ދަތުރުތަކުގައި ބޭނުންކުރާ މި ފްލައިޓުތަކަކީ 15 މީހުންގެ ޖާގައިގެ ކުދި ބޯޓުތަކެކެވެ.