އިޒްރޭލުން އިރާނުގެ ނިއުކްލިއާ ސައިޓްތަކަށް ހަމަލާއެއް ދޭން ތައްޔާރުވެއްޖެ - ރިޕޯޓުތައް

އިޒްރޭލުން އިރާނުގެ ނިއުކްލިއާ ސައިޓްތަކަށް ހަމަލާއެއް ދޭން ތައްޔާރުވެފައިވާ ކަމަށް އެމެރިކާގެ އެންމެ ބޮޑު އެއް ނޫސް ކަމަށްވާ ނިއު ޔޯކް ޓައިމްސްއިން ރިޕޯޓުކޮށްފި އެވެ.

ނިއުޔޯކް ޓައިމްސްއިން ރިޕޯޓުކޮށްފައިވާ ގޮތުގައި އެމެރިކާގެ އޮފިޝަލުންތަކަކަށް ވަނީ އީރާނުގެ ނިއުކްލިއާ ޕްރޮގްރާމަށް އިޒްރޭލުން ކުއްލި ހަމަލާއެއް ދީފާނެ ކަމުގެ ރިޕޯޓުތައް ލިބިފައި އެވެ. އަދި އެހަމަލާ ކުރިޔަށް އޮތް ގަޑިތަކުގައި ދީފާނެ ކަމަށްވެސް ނިއުޔޯކް ޓައިމްސްއަށް މައުލޫމާތު ދިން އެމެރިކާގެ ސަލާމަތީ ބާރުގެ މަސްދަރަކުން ވަނީ ބުނެފައި އެވެ.

އަދި ކުއްލި ހަމަލާއެއް ދޭން އިޒްރޭލުން ނިންމާފައިވަނީ އެހަމަލާ ހުއްޓުވުމަށް އެއްވެސް މަޝްވަރާއަކަށް އެމެރިކާއަށް ފުރުސަތު ނުދޭން ކަމަށާއި މިއީ ސީދާ އިސްރާއީލުގެ ނިރުބަވެރި ބޮޑުވަޒީރު ބެންޖަމިން ނަތަންޔާހޫގެ ނިންމުމެއް ކަމަށްވެސް ވަނީ ރިޕޯޓުކޮށްފައި އެވެ. ނަމަވެސް 7 ގަޑިއިރަށްވުރެ ކުރު ނޯޓިސް އެއް އިޒްރޭލުން އެމެރިކާއަށް ދީފާނެ ކަމަށް ރިޕޯޓުތައް ބުނެއެވެ.

އެގޮތުން އިޒްރޭލުގެ އޮފިޝަލުން ދެކޭ ގޮތުގައި ތެހެރާނުން ބަދަލު ހިފިޔަސް އެމެރިކާއިން އިޒްރޭލަށް އެހީތެރިކަން ފޯރުކޮށްދިނުން ނޫން ގޮތެއް ނޯންނާނެ އެވެ.

އިސްރާއީލުން މިފަދަ ހަމަލާއެއް ދީފާނެ ކަމުގެ ރިޕޯޓުތަކެއް ފެންމަތިވި އިރު އެމެރިކާގެ ރައީސް ޑޮނަލްޑް ޓްރަމްޕު ވަނީ އިރާނާއި އެކު ނިއުކްލިއާ ޕްރޮގްރާމް ހުއްޓާލުމުގެ ފުޅާ މަޝްވަރާތަކެއް ފަށާފައި އެވެ.