ރައީސްގެ ވައުދުފުޅާއި އެއްގޮތަށް ގުޅީ ބިންހިއްކަން ފަށައިފި

ކ.ގުޅީ ބިންހިއްކުމާއި ގޮނޑުދޮށް ހިމާޔަތްކުރުމުގެ މަޟްރޫއުގެ ތެރެއިން ބިން ހިއްކުމުގެ ޢަމަލީ މަސައްކަތް ފަށައިފި އެވެ.

ގުޅީ ބިން ހިއްކުމުގެ މަޝްރޫޢުގެ މަސައްކަތް ޢަމަލީ ގޮތުން ފައްޓަވައި ދެއްވީ އެމަޝްރޫއުގެ ކޮންޓްރެކްޓަރު އެމްޓީސީސީގެ މެނޭޖިންގ ޑައިރެކްޓަރ ޑީސީޕީ (ރިޓަޔަރޑް) އަޙްމަދު ސަޢުދީއެވެ.

ކ.ގުޅީގައި ބޭއްވުނު މި ރަސްމިއްޔާތުގައި އެމްޓީސީސީގެ މެނޭޖިންގ ޑައިރެކްޓަރ ޑީސީޕީ (ރިޓަޔަރޑް) އަޙްމަދު ސަޢުދީއާއި ކ.ގުޅި ކައުންސިލްގެ ރައީސް މޫސާ ސަފީލްގެ އިތުރުން އެމްޓީސީސީ އާއި ގުޅީގެ ކައުންސިލްގެ އިސްވެރިން ބައިވެރިވެ ވަޑައިގެންނެވިއެވެ.

މި މަޝްރޫޢުގެ ދަށުން ބިން ހިއްކުމަށްފަހު 10.15 ހެކްޓަރުގެ ބިމެއް އެ ރަށަށް އިތުރުވެގެންދާނެއެވެ. މީގެ އިތުރުން ގޮނޑުދޮށް ހިމާޔަތްކުރުމުގެ މަސައްކަތުގެ ދަށުން 10,962 މީޓަރުގެ ބޮޑު ހިލައިގެ ރިވެޓްމަންޓަކާއި 362 މީޓަރުގެ ޖިއޯބޭގް ރިވެޓްމަންޓަކާއި، 88 މީޓަރުގެ ގްރޮއިންސްޖެހުމުގެ މަސައްކަތް ހިމެނެއެވެ. މި މަޝްރޫޢަކީ 89.63 މިލިއަން ރުފިޔާއަށް ސަރުކާރުން އެކުންފުންޏާއި ހަވާލުކުރި މަޝްރޫއުއެކެވެ.

814 މީހުންގެ އާބާދީއެއް އޮންނަ މާލެއަތޮޅު ގުޅިއަކީ ބިމުގެ ޖާގައިގެގޮތުން ކުޑަނަމަވެސް ވަރަށް ރީތި ހިތްގައިމު ރަށެކެވެ. މާލެއަތޮޅުގެ ގިނަ ރަށްތައް ފަދައިން ގުޅިއަކީވެސް ފަތުރުވެރިކަން ކުރިއަށްއަރަމުން އަންނަ ރަށެކެވެ. އެގޮތުން މިހާރުވެސް ރަށުގައި 15 ވަރަކަށް ގެސްޓްހައުސް އަންނަނީ އެކި ފަންތީގައި ހިންގަމުންނެވެ. ރަށުގެ ގިނަ ރައްޔިތުންނަށް އޮތް އެންމެ ބޮޑު ދައްޗަކީ ރަށުގެ ބިންކޮޅު ކުޑަވުމުން ރަށުގައި ދިރިއުޅުމަށާއި އަދި ވިޔަފާރިކުރުމަށް އިތުރު ޖާގަ ނެތުމުގެ މައްސަލައެވެ. ވީވާ މި މަޝްރޫޢުގެ ދަށުން ބިން ހިއްކުމުގެ މަސައްކަތް ފެށުމާއެކ،ު ރައްޔިތުންގެ ހުވަފެންތަކުގައި ކުލަޖެހިގެންދާތަން ކުރިއަށް އޮތް މުސްތަޤްބަލުގައި ފެނިގެންދާނެއެވެ. އަދި މުޅި މަޝްރޫޢު ނިމުމާއެކު ރަށުގެ ރައްޔިތުންގެ އޮތް ބޯހިޔާވަހިކަމާއި އިޤްތިޞޯދު ފުޅާކުރުމަށް އޮތް ދަތިކަމަށް ބޮޑުތަނުން ހައްލު ލިބިގެންދާނެ ކަމަށް ސަރުކާރުން ބުނެއެވެ.