އެމެރިކާއިން ޔަމަނަށް ބޮން އަޅަނީ

އެމެރިކާގެ ރައީސް ޑޮނަލްޑް ޓްރަމްޕުގެ އޯޑަރަށް އެމެރިކާ އަސްކަރިއްޔާއިން ޔަމަނުގެ ސަރަހައްދުތަކަށް ވައިގެ ހަމަލާތަކެއް ދީފި އެވެ.

ރިޕޯޓުތައް ބުނާގޮތުގައި އެމެރިކާގެ ހަނގުރާމަމަތީ މަތިންދާބޯޓުތަކުން ޔަމަނުގެ ސަންހާން ޑިސްޓްރިކްޓްގެ ޖަރްބާން ސަރަހައްދަށް ވަރުގަދަ ވައިގެ ހަމަލާތަކެއް މިހާރު ދަނީ ދެމުންނެވެ.

މި ހަމަލާތަކާއި ގުޅިގެން އަދި މިހާތަނަށް ޔަމަނާއި އެމެރިކާއިންވެސް ރަސްމީ ބަހެއް ބުނެފައިނުވާއިރު ޔަމަނުގެ ހޫތީ ޖަމާއަތާއި ދެކޮޅަށް އެމެރިކާގެ ރައީސް ޓްރަމްޕު ވަނީ މިމަހުގެ ކުރީކޮޅު ހަމަލާދިނުމުގެ އޯޑަރު ނެރެ ހޫތީންގެ އަމާޒުތަކަށް ވަރުގަދަ ހަމަލާތަކެއް ހޫތީންނަށް ދޭނެކަން އިއުލާނުކޮށްފައި އެވެ.

އެގޮތުން ޓްރަމްޕުގެ އޯޑަރަށް އެމެރިކާއިން މި މަހުގެ ކުރީކޮޅު ޔަމަނަށް ދިން ވަރުގަދަ ހަމަލާގައި 30 އަށްވުރެ ގިނަ މީހުން ވަނީ ޝަހީދުވެފައި އެވެ.

ޔަމަނަށް އެމެރިކާއިން ދޭން ފެށި ހަމަލާތަކަކީ ޔަހޫދީ އިޒްރޭލާއި ދެކޮޅަށް ހޫތީން ދެމުންދާ ހަމަލާތަކާއި ގުޅިގެން އެހަމަލާތަކުގެ ބަދަލު ހިފުމުގެ ނިޔަތުގައި އެމެރިކާއިން ދޭން ފެށި ހަމަލާތަކެއް ކަމަށް މަޝްރަހު ދިރާސާ ކުރާ ފަރާތްތަކުން ދަނީ ބުނަމުންނެވެ.