ނޮވެމްބަރު 3 ގައި ޝަހީދުވި ސިފައިންގެ އާއިލާތަކާއި، ޝަރަފުގެ ނިޝާން ދެވިފައިވާ ފަރާތްތަކަށް އިނާޔަތް ދޭން ނިންމައިފި

ނޮވެމްބަރު 3 ގައި ޝަހީދުވި ސިފައިންގެ އާއިލާތަކާއި، ޝަރަފުގެ ނިޝާން ދެވިފައިވާ ފަރާތްތަކަށް އިނާޔަތް ދޭން ނިންމައިފި އެވެ.

ޑިފެންސް މިނިސްޓްރީން މިއަދު ނެރުނު ބަޔާނެއްގައި ބުނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެ ވަޢުދުފުޅާ އެއްގޮތަށް، 1988 ނޮވެމްބަރ 03 ގެ ޢުދުވާނީ ޙަމަލާއިން ދިވެހި ޤައުމާއި ރައްޔިތުން ސަލާމަތްކުރުމުގައި ޖިހާދުކޮށް ޝަހީދުވެފައިވާ ސިފައިންނާއި، އަދި މި ޢުދުވާނީ ޙަމަލާގައި ދިވެހިރާއްޖެ ދިފާޢު ކުރުމުގައި އާދަޔާޚިލާފު ހިތްވަރާއި ސާބިތުކަން ދައްކުވައިދެއްވާފައިވާ ފަރާތްތަކުން އިސްލާމްދީނާއި، މި ލޮބުވެތި ވަޠަނާއި ދިވެހި ރައްޔިތުންގެ ޙައްޤުގައި ވެވަޑައިގަންނަވާފައިވާ ޤުރުބާނީ އާއި ކުރައްވާފައިވާ މަތިވެރި ޖިހާދުގެ އަގު ދިވެހި ރައްޔިތުންގެ ފަރާތުން ސަރުކާރުން ރަމްޒެއްގެގޮތުން ވަޒަންކޮށް، ޝަހީދުންގެ ޢާއިލާތަކަށާއި އާދަޔާޚިލާފު ހިތްވަރާއި ސާބިތުކަން އެދުވަހު ދައްކުވައިދީފައިވާ ސިފައިންގެ ތެރެއިން ދުނިޔޭގައި ތިއްބެވި ފަރާތްތަކަށް އިނާޔަތް ދިނުމަށް ނިންމައި އެ އިނާޔަތް ދޭނެ އުސޫލު މިއަދު ގެޒެޓުކޮށްފައިވާ ކަމަށެވެ.

މިގޮތުން 1988 ނޮވެމްބަރ 03 ވަނަދުވަހުގެ ޢުދުވާނުގައި ހަނގުރާމަކޮށް ޝަހީދުވި ސިފައިންގެ ޢާއިލާތަކަށާއި، އެ ހަނގުރާމައިގައި ދައްކުވައިދެއްވާފައިވާ އާދަޔާޚިލާފް ހިތްވަރާއި ސާބިތުކަމުގެ ސަބަބުން މެޑެލް ފޮރ އެކްސެޕްޝަނަލް ބްރޭވަރީ އަދި މެޑެލް ފޮރ ބްރޭވަރީ ގެ ޝަރަފް އެރުވިފައިވާ ބޭފުޅުންނަށް މި އުސޫލުގެ ތެރެއިން ދެމެހެއްޓެނިވި ގޮތެއްގައި ޚާއްޞަ އެލަވަންސެއް ސަރުކާރުން ދެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ހަމަޖައްސަވާފައި ކަމަށާއި މި އުސޫލް ގެޒެޓްގައި ޝާއިޢުކުރާ ދުވަހުން ފެށިގެން މި ފަރާތްތަކަށް އެލަވަންސް ލިބިވަޑައިގަންނަވާނެ ކަމަށް ޑިފެންސްއިން ބުނެއެވެ.

މިގޮތުން ނޮވެމްބަރު 3 ގައި ޝަހީދުވި ސިފައިންގެ ހިދުމަތް ފާހަގަކޮށް އިނާޔާތް ދިނުމަށް ނިންމާފައިވަނީ ޝަހީދުންގެ އާއިލާތަކަށެވެ. އެގޮތުން އާއިލާގޮތުގައި ބަލާނެ ކަމަށް އުސޫލުގައި ބުނެފައިވަނީ މައިންބަފައިންނާއި އުފަންދަރީންނާއި ހުވަފަތް އަނބިމީހާއެވެ. ޝަހީދުވި ސިފައިންގެ މީހާގެ އާއިލާގެ ކޮންމެ މީހަކަށް އެލަވެންސްގެ ގޮތުގައި 9,000 ރުފިޔާ ދިނުމަށް ވަނީ ނިންމާފައި އެވެ. އަދި މިހާރު ދުނިޔޭގައި ތިބި އެދުވަހުގެ ބަތޮލުންގެ ތެރެއިން އިނާޔަތް ދިނުމަށް ނިންމާފައިވަނީ ހުރަވީ ރަން މެޑަލް ލިބިފައިވާ ސިފައިންނާއި ހުރަވީ ރިހި މެޑަލް ލިބިފައިވާ ސިފައިންގެ އިތުރުން ހިތްވަރުގަދަކަމުގެ ކުލަ ލިބިފައިވާ ސިފައިންނަށެވެ. މިގޮތުން ހުަރަވީ ރަން މެޑަލް ލިބުނު ސިފައިންނަށް 9,000 ރުފިޔާ , ހުަރަވީ ރިހި މެޑަލް ލިބުނު ސިފައިންނަށް 8,000 އަދި ހިތްވަރުގަދަ ކަމުގެ ކުލަ ލިބުނު ސިފައިންނަށް 6,000 ރުފިޔާގެ އެލަވެންސެއް ދިނުމަށް ވަނީ ނިންމާފައި އެވެ.

އަދި 03 ނޮވެންބަރ 1988 ގެ އުދުވާނީ ޙަމަލާގައި ދިވެހިރާއްޖޭގެ މިނިވަންކަމާއި ސިޔާދަތު ދިފާޢުކޮށް އާދަޔާ ޚިލާފު ހިތްވަރު ދައްކުވައިދިން ޤައުމީ ބަތަލުން އެކުރެއްވި ޚިދުމަތުގެ އަގު ވަޒަންކުރުމަކީ، ދިވެހިރާއްޖޭގެ މިނިވަންކަމާއި ސިޔާދަތު ޙިމާޔަތްކޮށް ރައްކާތެރިކުރުމަށާއި، ޤައުމީ ލޯތްބާއި ދިވެހި ޤައުމިއްޔަތު ދިރުވާއާލާކުރުމަށްޓަކައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޚާއްޞަ އިސްކަމެއްދެއްވާ ކަމެއްކަން ވެސް ބަޔާނުގައި ވަނީ ފާހަގަކޮށްފައި އެވެ.