ޔަމަނުން އިޒްރޭލަށް ވައިގެ ހަމަލާއެއް ފޮނުވާލައިފި

ޔަމަނުން ނިރުބަވެރި އިޒްރޭލަށް ހަމަލާއެއް ދީފި އެވެ.

ރިޕޯޓުތައް ބުނާގޮތުގައި އިޒްރޭލުގެ ދެކުނުގެ ސަރަހައްދުތަކުގައި ވައިގެ ހަމަލާއެއްގެ ސައިރަންތައް ވަނީ މީގެ އިރުކޮޅެއް ކުރިން އިވިފައި އެވެ. އަދި މިއީ ޔަމަނުން އިޒްރޭލަށް ވައިގެ މަގުން އައި ހަމަލާއެއްކަން އިޒްރޭލުގެ އަސްކަރިއްޔާއިން ވެސް ވަނީ ކަށަވަރުކޮށްދީފައި އެވެ.

ޔަމަނުން އިޒްރޭލަށް އަމާޒުކޮށް ހަމަލާއެއް ފޮނުވާލާފައިވަނީ ދާދި ފަހުން އެމެރިކާއިން ޔަމަނުގެ ހޫތީންނަށް އަމާޒުކޮށް ވަރުގަދަ ވައިގެ ހަމަލާތަކެއް ދީފައިވާ ދަނޑިވަޅެއްގައި އެވެ. އެގޮތުން އެމެރިކާއިން ދިން ހަމަލާތަކަކީ އިޒްރޭލަށް ތާއީދުކުރުމަށް ދިން ހަމަލާތަކަކަށް ވާއިރު ހަމަލާތަކުގެ ބަދަލު ހިފާނެ ކަމަށާއި ޔަހޫދީން ޣައްޒާގައި ހިންގަމުންދާ އުދުވާން ހުއްޓާލަންދެން އިޒްރޭލަށް ހަމަލާތައް ދޭނެ ކަމުގެ އިންޒާރު ހޫތީން ވަނީ އިއްޔެ ދީފައި އެވެ.

މި އިންޒާރު ހޫތީން ދީފައިވަނިކޮށް އިޒްރޭލުން ރޭ ވަނީ ޣައްޒާއަށް ވަރުގަދަ ވައިގެ ހަމަލާތަކެއް ދީ 400 އަށްވުރެ ގިނަ މީހުން ޝަހީދުކޮށްލާފައި އެވެ. އޭގެ ތެރޭގައި ގިނަ އަދަދެއްގެ ކުޑަކުދިންވެސް ހިމެނެއެވެ.

މި ހަމަލާއާއި ގުޅިގެން އިޒްރޭލުގެ އަސްކަރިއްޔާއިން ދާދި ދެންމެ އަކު ބުނީ ބުނީ ޔަމަނުން މިސައިލެއް ފޮނުވާލުމާ ގުޅިގެން އިޒްރޭލުގެ މެދުތެރެއާއި ދެކުނު ނެގެވްއަށް އެލާޓްތައް ނެރެފައިވާ ކަމަށާއި ނަމަވެސް އިޒްރޭލުގެ ސަރަހައްދަށް މިސައިލް ވަނުމުގެ ކުރިން އެމިސައިލް ހުއްޓުވާފައިވާ ކަމަށެވެ.