އާސެނަލް ކަޓުވާލުމަށްފަހު ނިއުކާސަލް ލީގު ކަޕްގެ ފައިނަލުން ޖާގަހޯދައިފި

އިނގިރޭސި ލީގު ކަޕްގެ ސެމީފައިނަލް ފުރަތަމަ މެޗުގެ ދެވަނަ ލެގުގައި ބުދަ ދުވަހުގެ ރޭ އަމިއްލަ ދަނޑުގައި 2-0 ގެ ނަތީޖާއަކުން އާސެނަލް ބަލިކޮށް ނިއުކާސަލް ޔުނައިޓެޑް މުބާރާތުގެ ފައިނަލުން ޖާގަ ހޯދައިފިއެވެ.

މިދެޓީމު އާސެނަލްގެ ދަނޑުގައި ކުޅުނު ސެމީގެ ފުރަތަމަ ލެގުގެ މެޗު 2-0 ގެ ނަތީޖާއަކުން ނިއުކާސަލް ކާމިޔާބުކޮށްފައިވާއިރު، އެޓީމު ފައިނަލުން ޖާގަހޯދީ 4-0 ގެ އެގްރިގޭޓް ނަތީޖާއަކުންނެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މެޗު ފެށިގެން ތިންވަނަ މިނެޓުގައި ނިއުކާސަލްގެ ފޯވާޑް އެލެގްޒެންޑަރ އިސާކް ވަނީ އެޓީމަށް ލަނޑެއް ކާމިޔާބުކޮއްދީފައެވެ. ނަމަވެސް ވީއޭއާރުން ބެލުމަށްފަހު ރެފްރީ ނިންމީ އެއީ އޮފްސައިޑް ލަނޑެއް ކަމަށެވެ.

ނިއުކާސަލް އިން މެޗުގެ ލީޑުހޯދި ލަނޑު ފުރަތަމަ ހާފުގެ 19 ވަނަ މިނެޓުގައި މިޑްފީލްޑަރު ޖެކޮބް މާފީ ކާމިޔާބުކުރިއިރު، އެޓީމުން ލީޑު ފުޅާކުރި ލަނޑު ދެވަނަ ހާފުގެ 52 ވަނަ މިނެޓުގައި ކާމިޔާބުކޮށްދިނީ އެންތޮނީ ގޯޑަން އެވެ.

މުބާރާތުގެ ފައިނަލުގައި ނިއުކާސަލް ވާދަކުރަންޖެހޭނީ މިރޭ ކުޅެވޭ ސެމީ ފައިނަލް ދެވަނަ މެޗުގެ ދެވަނަ ލެގުގައި ޓޮޓެންހަމް އާއި ލިވަޕޫލް ވާދަކުރާ މެޗުން މޮޅުވާ ޓީމަކާއި ދެކޮޅަށެވެ. އަދި ޓޮޓެންހަމްގެ ދަނޑުގައި ކުޅުނު ސެމީގެ ފުރަތަމަ ލެގުގެ މެޗުގައި އެޓީމުން ވަނީ 1-0 ގެ ނަތީޖާއަކުން ލިވަޕޫލް ބަލިކޮށްފައެވެ.