ފަހުވަގުތު ނުނޭޒް ކާމިޔާބުކުރި ދެލަނޑާއެކު ލިވަޕޫލަށް ބޮޑު ލީޑެއް

އިގިރޭސި ޕްރެމިއާ ލީގުގައި މިރޭ ރަށުން ބޭރުގައި ބެންޓްފޯޑާއި ދެކޮޅަށް ކުޅުނު މެޗުގެ ފަހުހާފުގެ އިތުރުވަގުތުގެ ތެރޭގައި ކާމިޔާބުކުރި ދެލަނޑާއެކު 2-0 ގެ ނަތީޖާއަކުން މޮޅުވެ ލިވަޕޫލުން ލީގު ތާވަލުގެ ކުރީގައި ބޮޑު ލީޑެއް ނަގައިފިއެވެ.

ލީގުގައި ލިވަޕޫލް އެންމެ ފަހުން ކުޅުނު މެޗުގައި ނޮޓިންހަމް ފޮރެސްޓާއި ވާދަކޮށް 1-1 ގެ ނަތީޖާއަކުން އެއްވަރުވެފައިވާއިރު، ބްރެންޓްފޯޑުން ލީގުގައި އެންމެ ފަހުން ކުޅުނު މެޗުގައި ޗެންޕިއަން މެންޗެސްޓާ ސިޓީއާއި ވާދަކޮށް 2-2 ގެ ނަތީޖާއަކުން ދެޓީމި ވަނީ އެއްވަރުވެފައެވެ. އަދި މިދެޓީމު އެންމެ ފަހުން ކުޅުނު މެޗު 2-0 ގެ ނަތީޖާއަކުން ކާމިޔާބުކުރީ ލިވަޕޫލް އެވެ.

މުޅި މެޗުގައި ވެސް މޮޅަށް ކުޅެ ލިވަޕޫލް މެޗު ޑޮމިނޭޓްކުރިއިރު، މިމެޗުގައި އެޓީމުން ވަނީ ބްރެންޓްފޯޑްގެ ގޯލަށް 37 ހަމަލާ ފޮނުވާލާފައެވެ. އަދި އޭގެ ތެރެއިން އަށް ހަމަލާއެއް ގޯލާއި އަމާޒުވިއިރު، އެޓީމުން މެޗުގެ ލީޑުހޯދީ ދެވަނަ ހާފުގެ އިތުރުވަގުތުގެ ފުރަތަަމަ މިނެޓުގައެވެ. މިލަނޑު އެޓީމަށް ކާމިޔާބުކޮށްދިނީ އުރުއޭގެ ފުވާޑް ޑާވިން ނުނޭޒް އެވެ. އަދި އޭގެ ދެމިނެޓު ފަހުން ނުނޭޒް ވަނީ އިތުރު ލަނޑެއް ކާމިޔާބުކޮށް އެޓީމުގެ ލީޑު ފުޅާކޮށްދީފައެވެ.

މިލަނޑާއެކު މެޗުގެ ކުޅުން ނިމިގެންދިޔައީ 2-0 ގެ ނަތީޖާއަކުން ލިވަޕޫލް ކުރީގައި އޮވެގެންނެވެ. އަދި މިނަތީޖާއެކު ލީގުގައި ކުޅުނު 21 މެޗުން ލިވަޕޫލަށް 50 ޕޮއިންޓް ލިބިފައިވާއިރު، އެޓީމު މިވަގުތު އޮތީ ހަތް ޕޮއިންޓްގެ ލީޑަކާއެކު ލީގު ތާވަލުގެ އެއްވަނައިގައެވެ. އަދި މިމެޗުން ބަލިވި ބްރެންޓްފޯޑުން ލީގުގައި ކުޅުނު 22 މެޗުން ލިބުނު 28 ޕޮއިންޓާއެކު އެޓީމު މިވަގުތު އޮތީ ލީގު ތާވަލުގެ 11 ވަނައިގައެވެ.