ގައްދޫ އާއި އެއްވަރުވި ނަމަވެސް ވާދޫ އިން ސެމީގެ ޖާގައެއް ކަށަވަރުކޮށްފި

މިހާރު ކުރިއަށްދާ ގޯލްޑަން ފުޓްސަލް ޗެލެންޖް 2025، އަތޮޅު ބުރުގެ ގދ. އަތޮޅު ގުރޫޕް ބީގައި އެންމެ ފަހުގެ އަތޮޅު ޗެންޕިއަން ވާދޫ އާއި ގައްދޫ ވާދަކުރި ފޯރިގަދަ މެޗު 1-1 ގެ ނަތީޖާއަކުން ދެޓީމު އެއްވަރުވެއްޖެއެވެ.

މުބާރާތުގައި ވާދޫ ކުޅުނު ފުރަތަމަ މެޗުގައި ފަސޭހަކަމާއެކު 11-1 ގެ ތަފާތުބޮޑު ނަތީޖާއަކުން ފިޔޯރީ އަތުން މޮޅުވެފައިވާއިރު، މިއީ މިއަހަރުގެ މުބާރާތުގައި ގައްދޫ ޓީމު ކުޅުނު ފުރަތަމަ މެޗެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މިހާފުގައި ދެޓީމުން ވެސް ވަނީ ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. އަދި މިމެޗުގައި ފުރަތަމަ ލަނޑުޖަހައި ކުރިހޯދީ ގައްދޫ އިންނެވެ. މިލަނޑު ފުރަތަމަ ހާފުގެ 19 ވަނަ މިނެޓުގައި ކާމިޔާބުކޮށްދިނީ އެޓީމުގެ އަހުމަދު އަކްމަލް ނިޒާމް އެވެ.

މިއީ ވާދޫގެ ހާފު މެދެންހާ ހިސާބުން ލިބުނު ހިލޭޖެހުމެއްގައި ފޮނުވާލި ބާރު ހަމަލާއެއް ގޯލުގެ ކަނަށް އަމާޒުކޮށްލައިގެން އެނާ ކާމިޔާބުކޮށްދިން ލަނޑެކެވެ. އަދި މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ގައްދޫ ކުރީގައި އިވެގެންނެވެ.

މެޗުގެ ދެވަނަ ހާފުގައި ވެސް ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، ވާދޫ އިން މެޗުގެ ނަތީޖާ އެއްވަރުކުރި ލަނޑު ދެވަނަ ހާފު ފެށިގެން ހަތަރުވަނަ މިނެޓުގައި ކާމިޔާބުކޮށްދިނީ މުހައްމަދު ނާއިލް އެވެ. މިއީ ގައްދޫގެ ޕެނަލްޓީ އޭރިއާ ބޭރުން ލިބުނު ހިލޭޖެހުމެއްގައި ތިރިތިރިން ފޮނުވާލި ބާރު ހަމަލާއެއް ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

ނަމަވެސް ފަހުހާފުގެ 33 ވަނަ މިނެޓުގައި ގައްދޫ ކުޅުންތެރިއަކަށް ނާއިލް ކުރިފައުލަކާއި ގުޅިގެން ރެފްރީ ގައްދުއަށް ޖެހުމެއް ދިނުމުން އެކަމާއި ހިތްހަމަނުޖެހުން ފާޅުކުރުމުން ރެފްރީ ވަނީ ނާއިލްއަށް ސީދާ ރަތް ކާދެއް ދައްކައި ދަނޑުން ފޮނުވާލާފައެވެ.

މީގެ އިތުރުން މިހާފުގައި ވާދޫ ޓީމުން ގައްދޫގެ ގޯލަށް ގިނަ ހަމަލާތަކެއް ފޮނުވާލި ނަމަވެސް މެޗުގެ ކުޅުން ނިނިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބުނުކުރެވި 1-1 ގެ ނަތީޖާއަކުން ދެޓިމު އެއްވަރުވެފައި އިވެގެންނެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ ގައްދޫ ޓީމުގެ ކީޕަރު އަހުމަދު އިބްތިސާމް މައުސޫމް އެވެ.

މިނަތީޖާއެކު ގުރޫޕް ސްޓޭޖުގައި ކުޅުނު ދެމެޗުން ލިބުނު ހަތަރު ޕޮއިންޓާއެކު ގުރޫޕް ބީގެ އެއްވަނައިގައި ވާދޫ މިވަގުތު އޮތްއިރު، އެޓީމުން ވަނީ އަތޮޅު ބުރުގެ ސެމީގެ ޖާގައެއް ކަށަވަރުކޮށްފައެވެ. އަދި މިމެޗުން ލިބުނު އެއް ޕޮއިންޓާއެކު ގުރޫޕްގެ ދެވަނައިގައި ގައްދޫ އޮތްއިރު، ގުރޫޕްގެ ފަހުމެޗުގައި ފިޔޯރީ އާއި އެއްވަރުވި ނަމަވެސް ގައްދޫއަށް ގުރޫޕްގެ ދެވަނަ ޓީމުގެ ގޮތުގައި ސެމީގެ ދެވަނަ ޖާގަ ލިބިގެންދާނެއެވެ. އަދި ގުރޫޕްގެ އެއްވަނަ ހޯދަން ބޭނުންނަމަ އެޓީމަށްޖެހޭނީ 11 ލަނޑުގެ ތަފާތަކުން ފިޔޯރީ ބަލިކުރާށެވެ.

މިއަހަރުގެ ގޯލްޑަން ފުޓްސަލް ޗެލެންޖް އަތޮޅު ބުރުގައި ގދ.އަތޮޅުން ހަ ޓީމެއް ވާދަކުރަމުން އަންނައިރު، މިއަތޮޅުގެ މެޗުތައް ކުރިއަށްދަނީ ބައިވެރިވި ހަ ޓީމު ދެ ގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕަކުން އެންމެ ރަނގަޅު ނަތީޖާއެއް ހޯދާ ދެޓީމު ސެމީއަށް ހޮވޭއިރު، އަތޮޅުބުރުގެ ފައިނަލުގައި ވާދަކުރާ ދެޓީމަށް މުބާރާތުގެ ޒޯން ބުރުން ފުރުސަތު ލިބިގެންދާނެ އެެވެ.