ހިތަދޫގައި ނުރައްކާތެރި ކެމިކަލްތަކާއި ކުނި ރައްކާކުރާ ވަގުތީ މަރުކަޒުގެ އެސްއޯޕީއަށް މުވައްޒަފުން އަހުލުވެރިކުރުމަށް ތަމްރީނެއް!

އައްޑޫ ސިޓީ ހިތަދޫގައި ހުންނަ ނުރައްކާތެރި ކެމިކަލްތަކާއި ކުނި ރައްކާކުރާ ވަގުތީ މަރުކަޒުގެ ސްޓޭންޑަރޑް އޮޕަރޭޓިންގ ޕްރޮސީޖަރ (އެސްއޯޕީ) އަށް މުވައްޒަފުން އަހުލުވެރިކުރުމުގެ ދެ ދުވަހުގެ ތަމްރީނު ޕްރޮގްރާމެއް މިއަދު ފަށައިފިއެވެ.

މި ތަމްރީނުގައި ވޭސްޓް މެނޭޖްމަންޓް ކޯޕަރޭޝަން (ވެމްކޯ)، ޔޫޓިލިޓީ ރެގިއުލޭޓަރީ އޮތޯރިޓީ (ޔޫއާރުއޭ)، އެންވަޔަރަންމަންޓަލް ޕްރޮޓެކްޝަން އޭޖެންސީ (އީޕީއޭ) އަދި މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) ގެ ޖުމްލަ 46 އޮފިޝަލުން ބައިވެރިވެއެވެ.

އެންވަޔަރަމެންޓު މިނިސްޓްރީން ބުނީ މި ތަމްރީނުގެ މަޤްޞަދަކީ ނުރައްކާތެރި ކުނި އެއްކުރުމާއި، އުފުލުމާއި އަދި ރައްކާކުރުމުގައި ގެންގުޅެންޖެހޭ ރައްކާތެރި އުސޫލުތަކަށް މުވައްޒަފުން އަހުލުވެރިކުރުން ކަމަށެވެ. އަދި މިފަދަ ތަމްރީނުތަކުގެ ސަބަބުން ނުރައްކާތެރި ކުންޏާ ގުޅޭ މަސައްކަތްތައް ކުރުމުގައި ރައްކާތެރިކަމުގެ ފިޔަވަޅުތައް އިތުރަށް ހަރުދަނާވެގެންދާނެ ކަމަށް ވެސް އެމިނިސްޓްރީން ބުނެއެވެ.

މި ދެ ދުވަހުގެ ތަމްރީނު ޕްރޮގްރާމް ނިމުމުން، ބައިވެރިން އެސްއޯޕީގެ އުސޫލުތަކަށް އަހުލުވެރިވެ، އެ އުސޫލުތަކާ އެއްގޮތަށް މަސައްކަތްކުރުމަށް މަގުފަހިވެގެންދާނެ ކަމަށް މިނިސްޓްރީން ބުނެއެވެ.