މޯލްޑިވް ގޭހުން 45 ކިލޯގެ ސިލިންޑަރުތައް ރީފިލް ކުރާ އަގު ހެޔޮކޮށްފި

ރާއްޖޭގެ ގޭސްގެ މައި ކުންފުނި މޯލްޑިވްސް ގޭސްއިން 45 ކިލޯގެ ސިލިންޑަރުތައް ރީފިލް ކުރާ އަގު ހެޔޮކޮށްފި އެވެ.

އެކުންުފުނިން މިއަދު ނެރުނު ބަޔާނެއްގައި ބުނީ 45 ކިލޯގެ ސިލިންޑަރުތައް ރީފިލް ކުރާ އަގު 1,170 ރުފިޔާއަށް ހެޔޮކޮށްފައިވާ ކަމަށެވެ. އަދި މި ބަދަލާއި އެކު ކަސްޓަމަރުންނަށް ބޮޑު ހަރަދެއް ސަލާމާތްކުރެވިގެންދާނެ ކަމަށެވެ.

އެކުންފުނިން ބުނީ މި ބަދަލު ގެނައީ ޒަރޫރީ ހަކަތައިގެ ޙައްލުތައް މިހާރަށްވުރެ އަގުހެޔޮކޮށް މުޖުތަމަޢަށް އެހީތެރިކަން ފޯރުކޮށްދިނުމަށް ކުރަމުންދާ މަސައްކަތުގެ ތެރެއިން ކަމަށެވެ. އަދި ރާއްޖޭގައި އެލް.ޕީ.ޖީ އުފެއްދުމުގައި އެންމެ އިސްކޮށް ހަރަކާތްތެރިވާ ފަރާތުގެ ހައިސިއްޔަތުން، ގޭބިސީތަކަށާއި، ވިޔަފާރިތަކަށާއި، އެހެނިހެން ޞިނާޢަތްތަކަށް ވެސް، ފަސޭހައިން ކުޑަ އަގެއްގައި ކައްކާ ގޭހާއި އެހެނިހެން ގޭސްތައް ފޯރުކޮށްދިނުމަށް ގިނަ މަސައްކަތްތަކެއް ކުރަމުންދާކަން އެކުންފުނިން ފާހަގަކުރި އެވެ.

މީގެ އިތުރުން ކަސްޓަމަރުންނަށް ފެންވަރު ރަނގަޅު، އިތުބާރު ހިފޭ ހަކަތައިގެ ޙައްލުތައް ފޯރުކޮށްދިނުމަށާއި މެދުކެނޑުމެއްނެތި ގޭސް ސަޕްލައި ކުރުމަށް އެކުންފުނިން އަބަރުވެސް އަހައްމިއްޔަތުކަން ދޭނެކަން އެކުންފުނިން ވަނީ ނެރުނު ބަޔާނުގައި ފާހަގަކޮށްފައި އެވެ.