ތިނަދޫ ސިޓީގެ ސްކޫލުތަކުގައި ކުނި ވަކިކުރުމާ ބެހޭގޮތުން ވެމްކޯއިން މަޝްވަރާކޮށްފި

ކުނި މެނޭޖްކުރުމުގެ ހިދުމަތް ތިނަދޫ ސިޓީގައި ދެމުން އަންނަ ވޭސްޓް މެނޭޖްމެންޓު ކޯޕަރޭޝަން, ވެމްކޯއިން އެސިޓީގެ ސްކޫލުތަކާއި އެކު މަޝްވަރާ ބައްދަލުވުންތަކެއް ބާއްވައިފި އެވެ.

ވެމްކޯއިން މިއަދު ބުނީ ވެމްކޯ ތިނަދޫ އޮޕަރޭޝަންސްއިން އިސްނަގައިގެން ގދ.އަތޮޅު ތަޢުލީމީ މަރުކަޒާ، އަބޫބަކުރު ސްކޫލްއާއެކު ކުނި ވަކިކުރުމާ ބެހޭގޮތުން މަޝްވަރާ ބައްދަލުވެމެއް ބާއްވާފައި ކަމަށެވެ. މި ބައްދަލުވުމުގައި ތިނަދޫ ސިޓީ ވެމްކޯ އޮޕަރޭޝަންގެ މެނޭޖަރު އަހުމަދު ޖަމްޝީދުގެ އިތުރުން ތިނަދޫ ސިޓީ ވެމްކޯ އޮަޕަރޭޝަންގެ ބައެއް އިސް މުވައްޒަފުންވެސް ބައިވެރިވި އެވެ.

މި ބައްދަލުކުރެއްވުމަށްފަހު މެނޭޖަރު ޖަމްޝީދު ފޭސްބުކުގައި ކުރި ޕޯސްޓެއްގައި ވިދާޅުވީ މިބައްދަލުވުމުގައި ހުރިހާ ދަރިވަރުންނަށްވެސް ކުނި ވަކިކުރުމުގެ މުހިންމުކަން އަންގައިދިނުމަށާއި، ކުނި ވަކިކުރުމުގެ އާދަތައް ރަނގަޅުކުރުމަށްޓަކައި ގުޅިގެން މަސައްކަތްކުރުމާ ބެހޭގޮތުން ގިނަ މަަަޟްވަރާތަކެއްކުރެވުނު ކަމަށެވެ.

ތިނަދޫ ސިޓީގައި ވެމްކޯގެ ހިދުމަތް ރަސްމީކޮށް ފެށީ މިދިޔަ އަހަރުގެ ތެރޭގައި އެވެ.

ވެމްކޯގެ ހިދުމަތް ދެމުން އަންނަ އެހެނިހެން ރަށްތަކުގައިވެސް މިފަދަ ބައްދަލުވުންތައް ކުރިޔަށް ގެންގޮސް ރައްޔިތުންގެ މެދުގައި ކުނި މެނޭޖްކުރުމަށް އަހުލުވެލިކުރުމަށް ގިނަ ހަރަކާތްތަކެއް ދަނީ ކުރަމުންނެވެ.