އަތޮޅުތަކުގައި ވެމްކޯގެ ބިލް ކަރަންޓު ބިލުގައި ހިމެނުން ހުއްޓާލައިފި

އަތޮޅުތަކުގައި ކުނީގެ ފީ، ކަރަންޓު ބިލުގައި ހިމެނުން ހުއްޓާލަން ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން ނިންމައިފި އެވެ.

ވެމްކޯ އިން މިއަދު ނެރުނު ކުރި ބަޔާނެއްގައި ބުނީ މި މަހުން ފެށިގެން ވެމްކޯ އިން އަތޮޅުތެރޭ ރަށްރަށުގައި ފޯރުކޮށްދޭ ގޭބިސީތަކުން ކުނި ނަގައިދިނުމުގެ ހިދުމަތުގެ ބިލު ޔޫޓިލިޓީ އެހެން ހިދުމަތެއްގެ ބިލުގައި ހިމެނުމަށް ނިންމި ނިންމުން ރައީސް ޑރ. މުހައްމަދު މުއިއްޒުގެ ލަފާފުޅުގެ މަތިން ބާތިލުކޮށްފައިވާ ކަމަށެވެ.

މި ބަދަލާއެކު، ވެމްކޯގެ ހިދުމަތް ފޯރުކޮށްދޭނީ އަދި ހިދުމަތަށް ބިލު ކުރެވޭނީ ވެމްކޯގެ ހިދުމަތަށް ރަޖިސްޓްރީ ކޮށްފައިވާ ފަރާތްތަކަށް އެކަނި ކަމަށް ވެމްކޯ އިން ބުނެ އެވެ.

އަދި ބިލަށް ފައިސާ ދެއްކުމުގެ ކަންކަން ވެމްކޯގެ އަތޮޅުތެރޭ ރަށްރަށުގައި ގާއިމުކޮށްފައިވާ އޮފީސްތަކުންނާއި ވެމްކޯގެ އަވަސްޕޭ ޕޯޓަލް މެދުވެރިކޮށް އިންތިޒާމު ކުރެވިފައިވާ ކަމަށް ވެމްކޯ އިން ބުންޏެވެ.

އަތޮޅުތަކުގައި ވެމްކޯގެ ބިލް ވަކިން ފޮނުވި ނަމަވެސް، މާލޭގައި ވެމްކޯގެ ބިލް ފޮނުވާނީ ސްޓެލްކޯއިން ފޮނުވާ ކަރަންޓް ބިލުގައި ހިމެނުމަށްފަހުގައި އެވެ.