މާފަންނުގެ ގެއެއް ގަނބައިގަނެ އަޑިޔައަށް ދާތީ އެގޭގެ މީހުން ހުސްކުރަނީ

މާފަންނުގެ ގެއެއްގައި ބޮޑު ރެނދެއް އަޅައި އަޑިޔައަށް ދާތީ އެގޭގެ މީހުން ހުސްކުރަން ފަށައިފި އެވެ.

މާލެ ސިޓީ ކައުންސިލުން މިއަދު ބުނީ މ.ނެވިގޭޓަރ އިމާރާތްކުރަމުންދަނިކޮށް އެ ގެ ޖެހިގެން ހުރި ގެ މ.ލަކީހެވެންގެ ގަނބައިގަނެ އަޑިއަށްދާތީ އެގެއިން މީހުން ހުސްކުރުމުގެ މަސައްކަތް ކުރަމުންދާ ކަމަށެވެ.

އެގޮތުން މ.ލަކީހެވެންގެ ގަނބައިގަނެ އަޑިއަށްދާން ފެށީ މ.ނެވިގޭޓަރ އިމާރާތްކުރަމުންދިޔައިރު ޝީޓް ޕައިލިންގ ގެ މަސައްކަތް ނުކޮށް ހުރުމުގެ ސަބަބުން ކަމަށް މާލެ ސިޓީ ކައުންސިލުން ބުނެއެވެ.

އެގޮތުން މީހުން ހުސްކުރަމުންދާ ގޭގައި ޖުމުލަ 4 ކޮޓަރި ހުންނަ އިރު 4 އާއިލާއެއްގެ 6 މީހަކު އުޅެމުންދާކަމަށާއި އޭގެ ތެރޭގައި 18 އަހަރުން ދަށުގެ 3 ކުދިން ހިމެނޭ ކަމަށް ސިޓީކައުންސިލުން ބުނެއެވެ. އަދި އެގޭގެ 2 ބާގައި ބޭރު މީހުންވެސް ކުއްޔަށް އުޅެމުންދާކަން ވަނީ ފާހަގަކޮށްފައެވެ.