މާލެ ސިޓީ ކައުންސިލައަށް މިއަހަރު 487 މިލިއަން ރުފިޔާގެ ބަޖެޓެއް!

މާލެ ސިޓީކައުންސިލްގެ 2025 ވަނަ އަހަރުގެ ބަޖެޓް ފާސްކޮށްފިއެވެ.

މި ބަޖެޓް ފާސްކުރީ، މާލެ ސިޓީކައުންސިލްގެ 4 ވަނަ ދައުރުގެ 178 ވަނަ ރަސްމީ ޢާއްމު ޖަލްސާގައެވެ. މި ޖަލްސާގައި 2025 ވަނަ އަހަރު މާލެ ސިޓީކައުންސިލަށް ލިބޭނެކަމަށް ލަފާކުރާ ޢާމްދަނީއާއި ހިނގާނެ ޚަރަދުގެ ތަފުޞީލު ޕްރަޒެންޓޭޝަނެއް ހުށަހެޅުނެވެ. 2025 ވަނަ އަހަރަށް ފާސްކުރި ބަޖެޓްގެ ޖުމުލައަކީ 487،225،846.50 ރުފިޔާއެވެ.

ބަޖެޓު ހުށަހެޅުމަށް ފަހު، ބަޖެޓާބެހޭގޮތުން ވާހަކަފުޅު ދައްކަވަމުން، ޑެޕިއުޓީ މޭޔަރ އަޙުމަދު ނަރީޝް ދެއްކެވި ވާހަކަފުޅުގައި ވިދާޅުވީ، ޢާއްމުކޮށް މާލެ ސިޓީގައި ނުގެންގުޅޭ ބާވަތުގެ ވެހިލްތައް، މާލެސިޓީ ކައުންސިލްގައި އެބަހުރި ކަމަށާއި އެ ފަދަ ވެހިލްކަލްތަކުގެ ބޭނުން ހިފުމަށް ކުންފުނިތަކާއި އަމިއްލަ ފަރާތްކަން އެދެމުންދާކަމަށެވެ. އެހެން ކަމުން، އެ ފަދަ ވެހިލަކްތައް އިތުރަށް ހޯދައި، އެ ތަކެތި ކުއްޔަށް ދީގެން މާލެ ސިޓީ ކައުންސިލަށް ރަނގަޅު ޢާމްދަނީއެއް ލިބުމުގެ ފުރުޞަތު އޮތްކަން ފާހަގަ ކުރެއްވިއެވެ.

ބަޖެޓާ ބެހޭގޮތުން ވާހަކަ ފުޅުދައްކަވަމުން، ކައުންސިލަރ މުޙައްމަދު ސައިފު ފާތިޙު، ވިދާޅުވީ، ކޮންމެ އަހަރެއްގެ ދައުލަތުގެ ބަޖެޓުން، މާލެސިޓީ ކައުންސިލަށް ދޭން، ޤާނޫނުގައި ކަނޑައަޅުއްވާފައިވާ މިންވަރު ނުލިބޭކަމަށެވެ. ސައިފު ވިދާޅުވީ 2024 ވަނަ އަހަރަށް ވުރެ ދައުލަތުގެ ބަޖެޓް، އެތައް ތަނަކުން އިތުރުވި އިރު، ދައުލަތުގެ ބަޖެޓުން މާލެ ސިޓީ ކައުންސިލަށް ދޭން ނިންމި ފައިސާގެ ޢަދަދު، 2024 ވަނަ އަހަރަށް ވުރެ، 2025 ވަނަ އަހަރު، 23 މިލިޔަން ރުފިޔާ މަދު ކަމަށެވެ.