މަޝްއަރު ޓުއާސްގެ ވެރިންނަށް ދައުވާކުރަން ފޮނުވައިފި

ޢުމްރާއަށް މީހުން ގެންދިއުމާބެހޭ އުސޫލާ ޚިލާފަށް އަލްމަޝްއަރު ޓުއާރސްއިން ޢަމަލުކޮށްފައިވާތީ އެ ކުންފުންޏާ ދެކޮޅަށް ދައުވާ ކުރަން ފޮނުވައިފިއެވެ.

ފުލުހުން މިއަދު ބުނީ އަލްމަޝްއަރު ޓުއާސްއިން އުމްރާއަށް މީހުން ފޮނުވަން ކަމަށް ބުނެ ފޮނުވި ޗެކްތަކެއް ބައުންސްވެފައިވާ މައްސަލަ އެއިދާރާއަށް ހުށަހެޅީ މިދިޔަ އަހަރުގެ އޭޕްރީލް މަހުގެ 13 ވަނަ ދުވަހު ކަމަށެވެ. އަދި މި މައްސަލައިގެ ތަޙްޤީގު ނިމުމަށްފަހު ދަޢުވާ ކުރުމަށްޓަކައި މިދިޔަ ޑިސެމްބަރު މަހުގެ 2 ވަނަ ދުވަހު ޕީޖީ އޮފީހަށް ފޮނުވާފައިވާކަމަށް ވަނީ ބުނެފައި އެވެ.

އެ މައްސަލައަކީ މިދިޔަ 2023 ވަނަ އަހަރު އެ ގްރޫޕުން އުމްރާއަށް މީހުން ގެންދަން ފްލައިޓް ޗާޓަރުކުރި ދިވެހި ކުންފުންޏަށް ފައިސާ ދައްކަން ދިން ދެ ޗެކް ބައުންސްވި މައްސަލައެކެވެ. އެއީ 140،000 އަށް ވުރެ ގިނަ ޑޮލަރުގެ ޗެކަކާއި 90،000 ޑޮލަރުގެ ޗެކެކެވެ.

އެކަން އެހެން އޮއްވައި އެ ގްރޫޕްގެ ހަވާލުގައި މިދިޔަ އަހަރު ވެސް އުމްރާއަށް ދިޔަ ދިވެހިންތަކެއް ހާލުގައި ޖެހި ރާއްޖެ ނާދެވި ތާށިވި އެވެ. އެ ފަހަރު އުމްރާ އަށް މީހުން ގެންދިޔައީ އިސްލާމިކް މިނިސްޓްރީގެ ހުއްދަ ވެސް ނެތި އެހެން ނަމެއްގައި އެވެ. އަދި އެ މައްސަލަ މިދިޔަ އަހަރު މިނިސްޓްރީން ފުލުހުންނަށް ހުށަހެޅި އެވެ.