--
ރާއްޖޭގެ ފޮރިން މިނިސްޓަރު ޑރ އަބްދުالله ހަލީލް އެކުވެރި އަރަބު އިމާރާޔު, ޔޫއޭއީގެ ބޮޑުވަޒީރުގެ ނައިބު އަދި ފޮރިން މިނިސްޓަރު ހިޒް ހައިނެސް ޝެއިޚް އަބްދުالله ބިން ޒައިދު އަލް ނަހްޔާންއާއި ބައްދަލުކުރައްވައިފި އެވެ.
މި ބައްދަލުކުރެއްވުން އޮތީ މިއަދު ޔޫއޭއީގެ ބޮޑުވަޒީރުގެ ނައިބު އަދި ފޮރިން މިނިސްޓަރު ހިޒް ހައިނެސް ޝެއިޚް އަބްދުالله ބިން ޒައިދު އަލް ނަހްޔާންގެ ރަސްމީ އޮފީހުގައި އެވެ. މިއީ ފޮރިން މިނިސްޓަރު ހަލީލް އެގައުމަށް މިހާރު ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިން ބޭއްވި އެންމެ މަތީ ފަންތީގެ ބައްދަލުވުމެމެވެ.
މި ބައްދަލުކުރެއްވުމަށްފަހު ހަލީލް އެކްސްގައި ކުރެއްވި ޕޯސްޓެއްގައި ވިދާޅުވީ ޔޫއޭއީގެ ބޮޑުވަޒީރުގެ ނައިބު އަދި ފޮރިން މިނިސްޓަރު ހިޒް ހައިނެސް ޝެއިޚް އަބްދުالله ބިން ޒައިދު އަލް ނަހްޔާންއާ ބައްދަލުކުރެއްވުމުގެ ޝަރަފު ލިބިވަޑައިގެންނެތީ އުފާކުރައްވާ ކަމަށެވެ. އަދި މި ބައްދަލުކުރެއްވުމުގައި ވިޔަފާރީގެ ދާއިރާއާއި، ފަތުރުވެރިކަމާއި، މަސްވެރިކަމާއި، އިޢާދަކުރަނިވި ހަކަތައާއި، ކަނެކްޓިވިޓީ ފަދަ ދާއިރާތަކުން ގުޅުން ބަދަހިކުރުމުގެ ފުރުޞަތުގެ މައްޗަށް އަލިއަޅުއްވާލައްވައި، ދެޤައުމުގެ ދެމެދުގައި އޮތް ހަރުދަނާ އަދި ދެމެހެއްޓެނިވި ގުޅުމާ ބެހޭގޮތުން މަޝްވަރާކުރެއްވުނު ކަމަށެވެ.
އަދި ރާއްޖޭގެ ތަރައްޤީއަށާއި ކުރިއެރުމަށް ޔޫ.އޭ.އީއިން ވެދެއްވަމުން ގެންދަވާ އެއްބާރުލެއްވުމަށް ހަލީލް ޝުކުރު އަދާކުރެއްވިއެވެ.
ފޮރިން މިނިސްޓްރީން ބުނީ ޚަލީލްގެ މި ދަތުރުފުޅަކީ ޔޫއޭއީގެ ބޮޑުވަޒީރުގެ ނައިބު އަދި ފޮރިން މިނިސްޓަރު ހިޒް ހައިނެސް ޝެއިޚް އަބްދުالله ބިން ޒައިދު އަލް ނަހްޔާންގެ ދައުވަތަކަށް ކުރައްވާ ރަސްމީ ދަތުރުފުޅެއް ކަމަށެވެ. އެގޮތުން މި ދަތުރުފުޅުގައި ޔޫއޭއީ ސަރުކާރުގެ އެހެން ޢިއްޒަތްތެރިންނާ އެކު ވެސް މިނިސްޓަރ ބައްދަލުކުރައްވައި، ގުޅުން ބަދަހިކުރުމަށާއި، ދެޤައުމުގެ މަސްލަހަތު ކުރިއެރުވުމަށް މަސައްކަތްކުރައްވާނެ ކަމަށް ފޮރިން މިނިސްޓްރީން ބުނެއެވެ.
ޚަލީލްގެ އަރިހުގައި އެމްބެސެޑަރ އެޓް ލާޖް އަބްދުالله ހަމީދާއި ފޮރިން މިނިސްޓްރީގެ ޖޮއިންޓް ސެކްރެޓަރީ މަރިޔަމް ރީޝާ މި ދަތުރުފުޅުގައި ބައިވެރިވެވަޑައިގެންނެވިއެވެ.
ފަހުގެ
