--
ފެންވަރާލުމަށްފަހު އަވަސް އަރުވާލައިގެން، ގައި ހިއްކަން ބޭނުންކުރި ތުވާލިން ދެވަނަ ވިސްނުމަކާ ނުލައި މޫނުވެސް ފޮހެލެވެނީ އަހަރެމެން ތެރެއިން ކިތައްމީހުންނަށްބާއެވެ؟
އެއީ ކުރަން ވަރަށް ފަސޭހަ ކަމެއް ނޫން ހެއްޔެވެ؟
މިއާދަ ކިތަންމެ އާދައިގެކަމެއްހެން ހީވި ނަމަވެސް، ހަމުގެ ޑޮކްޓަރުން ބުނާގޮތުން މިއީ މޫނުގުގެ ހަންގަނޑު ދުޅަހެޔޮކޮށް ސާފުކޮށް ބަހައްޓަން މަސައްކަތްކުރާނަމަ ކުރެވޭ ގެއްލުން ބޮޑު ކަމަކަށްވެދާނެއެވެ.
މޫނުގެ ހަންގަނޑު ތަފާތު
މޫނުގައި ހަށިގަނޑުގެ ތުވާލި ބޭނުންކުރުން ހުއްޓާލަން ޖެހޭ ފުރަތަމަ އަދި އެންމެ މުހިންމު ސަބަބަކީ މޫނުގެ ހަންގަނޑު ހަށިގަނޑުގެ އެހެން ހިސާބުތަކުގައި ހުންނަ ހަންގަނޑަށް ވުރެ ނާޒުކުވުމެވެ. މޫނުގެ ހަންގަނޑު ތުނިވެ، ފަސޭހައިން އިރިޓޭޓްވުމުމުގެ ފުރުސަތު އޮވެއެވެ. އަދި ތެޔޮ އުފައްދަން މަގުފަހިކޮށްދޭ ސެބެސިއަސް ގްލޭންޑްތައްވެސް މޫނުގައި ގިނައެވެ. މިކަންކަމުގެ ސަބަބުން މޫނުގެ ހަންގަނޑަށް އެކި ކަހަލަ ރިކްޝަންތައް ކުރިމަތިވުމުގެ ފުރުސަތު ބޮޑެވެ. ހަށިގަނޑުގައި އުފެދިފައި ހުންނަ ކިލަޔާއި ތެޔޮ ޖެހިފައި ހުންނަ ތުވާލި މޫނުގައި ބޭނުންކުރުމުން މޫނުގެ ހަންގަނޑު އިތުރަށް ގޯސްވެ ރަތްވުމާއި ބިހިނެގުން ފަދަ މައްސަލަތައް ކުރިމަތިވެއެވެ.
ބެކްޓީރިއާ ޓްރާންސްފާ
މިއީ އަދި އެހާ ބޮޑަށް ވިސްނާފައި ނުވާ ކަމަކަށް ވެދާނެއެވެ. ތުވާއްޔަކީ ބެކްޓީރިއާ އުފެދޭ އެއްޗެކެވެ. ހަށިގަނޑުން ގިނައިން މޮއިސްޗަރ އުފައްދައިދޭ ތަންތަން ހިއްކުމަށްފަހު ތުވާލިން އެތަންތަނުގައި ހުންނަ ތެޔޮ އަދި މަރުވެފައިވާ ހަމުގެ ސެލްތައް އެބްޒޯބްކޮށްލައެވެ. ގިނަގިނައިން ތުވާލި ދޮވުނަސް ހުރިހާ ބެކްޓީރިއާއެއް މުޅިން ނައްތާލުމަކީ ގާތްގަނޑަކަށް ނާދިރު ކަމެކެވެ. ދެން ހަމަ އެތުވާލި މޫނުގައި ބޭނުންކުރުމުން އެ ޖަރާސީމުތައް ސީދާ މޫނުގެ ހަންގަނޑަށް ޓްރާންސްފާވެއެވެ.
ތަޖުރިބާކާރުން ބުނާ ގޮތުގައި ހަށިގަނޑުގައި އުޅޭ ބެކްޓީރިއާތަކުގެ ސަބަބުން ހަމުގެ އެހެން ތަންތަނަށް އާންމުކޮށް މާބޮޑު މައްސަލަތަކެއް ކުރިމަތިނުވި ނަމަވެސް، ނާޒުކު މޫނުގެ ހަންގަނޑަށް އެޖަރާސީމުތައް އެރުމުން އެކި ކަހަލަ ބިހި ނެގުމާއި އަދި އިންފެކްޝަންތައް ވެސް އުފެދެ އެވެ.
ތުވާލިން ހަންގަނޑަށް ގެއްލުން ލިބޭ ގޮތް
ހަރު ނުވަތަ އާންމުކޮށް ގައި ހިއްކަން ބޭނުންކުރާ އާދައުގެ މެޓީރިއަލްގެ ތުވާލިން މޫނު ހިއްކުމުންވެސް މޫނުގެ ހަންގަނޑަށް ގެއްލުން ލިބެއެވެ. މޫނު ފޮހޭ ވަގުތު ތުވާލީގެ ހަރުކަން އިހުސާސް ނުކުރެވުނުނަސް މިކަމުގެ ސަބަބުން ހަންގަނޑުގައި މައިކްރޯޓިއާތައް އުފެދެއެވެ. މި މައިކްރޯޓިއާތައް ހަންގަނޑު ރައްކާތެރިކޮށްދޭ ފަށަލަ ކޮމްޕްރޮމައިޒްކޮށްލައެވެ. މީގެ ސަބަބުން ހަންގަނޑުގެ އަމިއްލައަށް ރައްކާތެރިކުރުމުގެ ޤާބިލުކަން ބަލިކަށިވެ، ހަންގަނޑު ހިކި، ފައިން ލައިން ނުވަތަ ރިންކްލްސް ޖެހުމުގެ ފުރުޞަތު ބޮޑުވެއެވެ.
އާ ރޫޓިންއެއް
ވަކި ފޭސް ތުވާއްޔަކަށް އިންވެސްޓް ކުރުން
އެންމެ ފުރަތަމަ ކަމަކަށް މޫނަށް ހާއްސަ ތުވާއްޔަކަށް އިންވެސްޓް ކުރާށެވެ. މޫނަށް ހާއްސަކޮށް ތައްޔާރުކޮށްފައި ހުންނަ ތުވާލި އާންމުގޮތެއްގައި ތައްޔާރުކޮށްފައި ހުންނަނީ ކޮޓަން ނުވަތަ މައިކްރޯފައިބަރ ފަދަ ލުއި ތަކެތިންނެވެ. އަދި މި ތުވާލިތަކަކީ ކުދިކޮށް ތައްޔާރުކޮށްފައި ހުންނަ ތުވާލިކަމުން ގެންގުޅެންވެސް ފަސޭހަވެއެވެ. އަދި ބެކްޓީރިއާ އުފެދުމުން ސަލާމަތްވުމަށްޓަކައި އަވަސްއަވަހަށް ތުވާލި ބަދަލުކުރަންވާނެއެވެ.
ހަނގަޑަށް ނުކަތާވަރަށް ބޭނުންނުކުރޭ!
މަޑު އަދި މޫނަށް ހާއްސަކޮށް ތައްޔާރުކޮށްފައި ހުންނަ ތުވާއްޔަކުން މަޑުމަޑުން "ޕެޓް" ކުރުމުން މޫނުގެ ހަންގަނޑު ކުރިން ބުނި ކަންކަމުން ސަލާމަތްވެގެންދާނެއެވެ. ބާރަށް ތުވާލިން މޫނުގައި ހާކާނަމަ ހަންގަނޑު އިތުރަށް ގެއްލުންވުމުގެ ފުރުސަތު ބޮޑެވެ. ނަމަވެސް ޕެޓް ކުރާނަމަ މޫނުގެ ނާޒުކު ހަންގަނޑަށް ގެއްލުމެއް ނުދީ އިތުރު މޮއިސްޗާ ނައްތާލެވޭނެ އެވެ.
ތުވާލި ރަނގަޅަށް ދޮވެލަން ވާނެ!
ކޮންމެ ތުވާއްޔެއް އިޚްތިޔާރު ކުރިޔަސް، ކޮންމެވެސް ބެކްޓީރިއާއެއް، ތެޔޮ، ނުވަތަ ހަމުގެ މަރުވެފައިވާ ސެލްތައް ނައްތާލުމަށް ޓަކައި ރަނގަޅަށް ދޮވުމަކީ ކޮންމެހެން ކުރަން ޖެހޭ ކަމެކެވެ. ތުވާލި ރަނގަޅަށް ސާފުކުރެވޭތޯ ބެލުމަށް ހޫނު ފެނާއި ހައިޕޯއެލާޖެނިކް ޑިޓާޖަންޓެއް ބޭނުންކުރާށެވެ.
މިއީ ކުޑަ އާދައެއްގެ ގޮތުގައި ހީވިނަމަވެސް، މޫނުގައި ހަށިގަނޑުގެ އެހެނިހެން ތަންތަން ހިއްކަން ގެންގުޅޭ ތުވާލި ބޭނުންކުރުމަކީ ހަމުގެ އެކި އެކި މައްސަލަތަކަށް މަގުފަހިކޮށްދޭ ކަމެކެވެ. މިކަންކަމުން ސަލާމަތްވުމަށް ޓަކައި ވަކިން ހާއްސަކޮށް މޫނަށް ހާއްސަ، ލުއި ތުވާއްޔެއް ބޭނުންކުރުން ރަނގަޅެވެ.
ތުވާލި އާދަތަކަށް ކުޑަ ބަދަލެއް ގެނައުމުން ހަންގަނޑުގެ ސިއްހަތާއި މުޅި ސިފަ ވަރަށް ބޮޑަށް ރަނގަޅުކޮށްދެ އެވެ. ތިބާގެ މޫނަށް ފަރުވާތެރިކަމާއި ސަމާލުކަން ދީގެން ފަރުވާ ދޭން ޖެހޭތީ އެކަމަށް ބޭނުންވާ ހާއްސަ ތުވާލި ބޭނުންކުރަން ފަށާށެވެ.
ފަހުގެ
