މޯލްޑިވިއަންގެ އެއާޝޯއާއި ދިމާކޮށް އަގުބޮޑު އިނާމުތަކާއެކު ޚާއްސަ މުބާރާތެއް!

ގައުމީ އެއާލައިން, މޯލްޑިވިއަންއިން އަންނަ ހޯމަ ދުވަހު މާލެ ސަރަހައްދުގައި ބާއްވާ އެއާޝޯއާއި ގުޅުވައި އަގުހުރި އިނާމުތަކާއެކު ފޮޓޯ އަދި ވީޑިއޯގްރަފީ މުބާރާތެއް ބޭއްވުމަށް ނިންމައިފި އެވެ.

މޯލްޑިވިއަން އިން އެއާޝޯއެއް ބޭއްވުމަށް ތައްޔާރުވަމުންދަނީ އެއާލައިންގެ ފްލީޓާއި އަލަށްގުޅޭ އޭ-330 މަރުކާގެ ބޯޓު ރާއްޖެ އަންނަ ދުވަހާއި ދިމާކޮށެވެ. އެގޮތުން އެއާޝޯގައި މޯލްޑިވިއަންގެ މިހާރުގެ ބޯޓުތަކާއި އަލަށް ގުޅޭ ބޯޓުވެސް ފެނިގެންދާނެ ކަމަށް މޯލްޑިވިއަންއިން ބުނެއެވެ.

މި އެއާޝޯ ކުރިޔަށް ގެންދިޔުމަށް ހަމަޖެހިފައިވަނީ 6 ވަނަ ދުވަހު ހަވީރު 05:00 އިން 05:30 އަށް، މާލޭގެ އުސްފަސްގަނޑު ސަރަހައްދު އަދި ހުޅުމާލެ ފުރަތަމަ ފިޔަވައްސާ ދެވަނަ ފިޔަވަހީގެ އިރުމަތީ ގޮނޑުދޮށް ސަރަޙައްދުގައެވެ.

މި ޚާއްސަ އެއާޝޯއާއި ގުޅުވައި މޯލްޑިވިއަންއިން ވަނީ އަގުބޮޑު އިނާމުތަކާއެކު ފޮޓޯ/ވީޑިއޯ މުބާރާތެއް ބޭއްވުމަށް ހުޅުވާލާފައެވެ. މި މުބާރާތުގައި ފޮޓޯއާއި ވީޑިއޯ ހުށައެޅޭނީ ސޯޝަލް މީޑިއާ މެދުވެރިކޮށެވެ. ފޮޓޯއާއި ވީޑިއޯ ހުށައެޅުމުގެ ސުންގަޑިއަކީ 9 ވަނަ ދުވަހުގެ 14:00 ކަމުގައި ކަނޑައަޅާފައިވާއިރު، މުބާރާތުގެ ވަނަތަށް އިޢުލާނުކުރާނީ 11 ޖެނުއަރީގައެވެ.

މި މުބާރާތުގައި ބައިވެރިވުމާ ގުޅޭ ތަފްސީލްތައް މޯލްޑިވިއަންގެ ސޯޝަލް މީޑިއާ ޕްލެޓްފޯމްތަކުގައި ވަނީ މިހާރު ހިއްސާކޮށްފައެވެ.

މި މުބާރާތުން ހޮވޭ ފަރާތްތަކުގެ ތެރެއިން 1 ވަނަ އިނާމެއްގެ ގޮތުގައި ރާއްޖޭގެ 5 ތަރީގެ ރިސޯޓެއްގައި 2 ރޭ ހޭދަކުރުމުގެ ފުރުޞަތު ދެ މީހަކަށް ދިނުން ހިމެނެއެވެ. 2 ވަނަ އިނާމެއްގެ ގޮތުގައި އިންޑިއާ ދެކޮޅު ޓިކެޓު ދެމީހަކަށް އަދި 3 ވަނަ އިނާމެއްގެ ގޮތުގައި ރާއްޖޭގެ މަންޒިލަކަށް ދެ މީހަކަށް ދެކޮޅު ޓިކެޓު ދިނުން ހިމެނެއެވެ.

ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވައުދުފުޅާ އެއްގޮތަށް މޯލްޑިވިއަން އިން ވައިޑްބޮޑީ އެއާކްރާފްޓެއް ގެންނަށް އެއްބަސްވުމުގައި ސޮއިކުރީ މިއަހަރުގެ ޖުލައި މަހުގެ 26 ވަނަ ދުވަހު އެވެ. މޯލްޑިވިއަން އަށް އެއާބަސް A330-200 މަރުކާގެ ބޯޓެެއް ގެނައުމަށް ހަވާލުކޮށްފައިވަނީ, އެއާލައިންތަކަށް މަތިންދާބޯޓު ފޯރުކޮށްދޭ ކުންފުންޏެއް ކަމަށްވާ ޓްރޫނޯޑްއާ އެވެ.

ރާއްޖެ ގެނައުމަށް ހަމަޖެހިފައިވަނީ އެއާބަސް A330-200 މަރުކާގެ މަތިންދާބޯޓުތަކެކެވެ. މި ބޯޓު 13000 ކިލޯ މީޓަރު ދުރަށް އެއްވެސް އެއާޕޯޓެއްގައި ނުޖައްސާ ޑައިރެކްޓުކޮށް ދަތުރުކުރެވޭނެ އެވެ. މިއީ ނެރޯ-ބޮޑީ މަތިންދާބޯޓު ދަތުރުކުރާ ރާސްތާއާ އަޅާބަލާއިރު 3 ގުނަ އިތުރު ދުރުމިނެކެވެ.