ބަނގުރަލުގެ ވިޔާފާރި ކުރާކަމަށް ތުހުމަތުކުރެވިގެން ރޭ ހައްޔަރުކުރި 3 ޒުވާނަކު ކޯޓުން ދޫކޮށްލައިފި

ބަނގުރަލުގެ ވިޔާފާރި ކުރާކަމަށް ތުހުމަތުކުރެވިގެން ރޭ ހައްޔަރުކުރި 3 ޒުވާނަކު ކޯޓުން ދޫކޮށްލައިފި އެވެ.

ފުލުހުން މިއަދު ބުނީ މީލާދީ އާއަހަރާއި ދިމާކޮށް ފުލުހުން ހިންގި މަސްތުވަތާކެތީގެ އޮޕަރޭޝަނެއްގައި ގަވާއިދާ ހިލާފަށް ބަނގުރާ ގެންގުޅެ ބޭނުންކޮށް އެތަކެތީގެ ވިޔަފާރިކުރާކަމަށް ތުހުމަތު ކުރެވޭ މައްސަަލައަކާއި ގުޅިގެން ތިން ޒުވާނަކު ހައްޔަރުކޮށްފައިވާ ކަމަށެވެ.

އެގޮތުން ހައްޔަރުކުރީ އުމުރުން 22 އަހަރުގެ އަހުމަދު އާނިޝް އާއި އުމުރުން 19 އަހަރުގެ އިބްރާހިމް އަކްމަލް އަބްދުލްސައްތާރުގެ އިތުރުން އުމުރުން 26 އަހަރުގެ އިސްމާއީލް މާހީން ކަމަށް ފުލުހުން ބުނެއެވެ.

ހައްޔަރުކުރި މި ތިން މީހުންގެ ބަންދާއި މެދު ގޮތެއް ނިންމުމަށް ކޯޓަށް ހާޒިރުކުރުމުން ޝަރުތުތުކޮށް ވަނީ ދޫކޮށްލާފައިކަމަށް ފުލުހުން ބުނެއެވެ. ނަމަވެސް ޝަރުތުކުރީ ކޮން ކަންކަމަކަށް ކަމެެއް ފުލުހުން ހާމައެއް ނުކުރެއެވެ.

އާއަހަރާއެކު މަސްތުވާތަކެއްޗާއި ބަނގުރަލުގެ މައްސަލަތައް އިތުރުވާނެ ކަމަށް ލަފާކޮށް ރާއްޖޭގެ އެކި ކަންކޮޅުތަކުގައި ފުލުހުން ވަނީ ޚާއްސަ އޮޕަރޭޝަންތައް ފަށާފައި އެވެ.