މާލެ ފެނު އަޑީގައި : ބަރު އުޅަނދުތަށް ނުދުއްވުމަށާއި ހަތަރު ފުރޮޅުލީ އުޅަނދުތައް ޒަރޫރީ ހާލަތްތަކުގައި ނޫނީ ނުދުއްވަން އިލްތިމާސްކޮށްފި

މާލެއަށް މިހާރު ކުރަމުން އަންނަ ވިއްސާރައިގައި ފެންބޮޑުވެފައިވާތީ މަގުތަކުގައި މި ހާލަތުގައި ބަރު އުޅަނދުތައް ނުދުއްވުމަށް ދިވެހި ފުލުންގެ ޚިދުމަތުން އިލްތިމާސްކޮށްފި އެވެ.

ފުލުހުން ދާދި ދެންމެ އަކު ނެރުނު ބަޔާނެއްގައި ބުނީ ފެންބޮޑުވުމުގެ ސަބަބުން ބައެއް ގޭގެއަށް ފެން ވަނުމުގެ ޙާދިސާތައް ހިނގަމުންދާކަން ފާހަގަކުރައްވައި ފުލުހުންވަނީ ފެން ހިނދި ޢާއްމު ހާލަތަށް މަގުތަށް އަންނަންދެން ބަރު އުޅަނދުތައް މާލޭގެ މަގުތަކުގައި ނުދުއްވުމަށާއި ހަތަރު ފުރޮޅުލީ އުޅަނދުތައް ޒަރޫރީ ބޭނުންތަކުގައި މެނުވީ ނުދުއްވުމަށް އިލްތިމާސްކުރާ ކަމަށެވެ.

މިއަދު ހެނދުނުން ފަށައިގެން ކުރަމުން އަންނަ ވިއްސާރާގައި މާލޭގެ ހުރިހާ ސަރަހައްދެއްގައި ކަހަލަ ގޮތަކަށް ވަނީ ފެންބޮޑުވެ ދަތުރުފަތުރުކުރުމަށާއި ފައިމަގުގައި އުޅޭ ފަރާތްތަކަށްވެސް މަގުތަކުގައި އުޅުމަށް އުނދަގޫ ތަކަކާއި ކުރިމަތި ވެފައި އެވެ. މާލޭގައި އާންމުކޮށް ފެން ބޮޑުނުވާ ސަރަހައްދުތަކުގައި ވެސް ފެންގަނޑު ކަކުލާ ހަމައަށް އަރައެވެ.

މާލޭގެ ފެން ހިންދުމުގެ މަސައްކަތް ކުރުމަށް ދިވެހި ސިފައިން މިހާރު ވަނީ މަގުތަކަށް ނުކުމެ މަސައްކަތް ފަށާފައި އެވެ. އަދި މަގުތަކުގެ ރައްކާތެރިކަން ކަށަވަރުކުރުމަށް ދިވެހި ފުލުހުން ވެސް އަންނަނީ މަގުތަކުގައި ހަރަކާތްތެރިވާން ފަށާފައި އެވެ.

މޫސުމާއި ބެހޭ ގައުމީ އިދާރާއިން ވަނީ ބޯކޮށް ވާރޭވެހި ފެންބޮޑުވާނެ ކަމަށް ލަފާކޮށް މާލެ ސަރަހައްދު ހިމެނޭހެން މެދު ރާއްޖެ ތެރެއަށް އޮރެންޖު އިންޒާރުވެސް ނެރެފައި އެވެ.