ތިނަދޫގެ ސިޓީގެ ދަރަޖަ އަތުލަން ހައިކޯޓަށް ހުށަހެޅި މައްސަލަ ބަލައިނުގަތް!

ތިނަދޫއަށް ސިޓީއެއްގެ ދަރަޖަ ދިނުން އުވާލުމަށް ދައުލަތާ ދެކޮޅަށް ހައި ކޯޓަށް ހުށަހެޅި ދުސްތޫރީ މައްސަލަ ބަލައިނުގަންނަން އެ ކޯޓުން ނިންމައިފި އެވެ.

ސިޓީއެއްގެ ދަރަޖަ ދިނުމުގައި ބަލާ އާންމު މިންގަނޑުތަކުގެ ތެރޭގައި ހިމެނޭ 10،000 މީހުންގެ އާބާދީ ތިނަދޫގައި 10000 މީހުން ހަމަނުވާ ކަމަށް ބުނެ ސިޓީގެ ދަރަޖަ ބާތިލުކުރަން އެދި ހުށަހެޅި މައްސަލަ ހައި ކޯޓުން އިއްޔެ ކޯޓުން ބޭރުކޮށްލި އިރު ރައީސް އޮފީހަށް ރައްދުވާ އެ ދުސްތޫރީ މައްސަލަ މިދިޔަ މަހުގެ 21 ގައި ހައި ކޯޓަށް ހުށަހެޅުއްވީ ގާނޫނީ ވަކީލު އަދި ކުރީގެ ޑެޕިއުޓީ މިނިސްޓަރު މުހައްމަދު ރާގިބު އަހުމަދެވެ.

އޭނާ ހުށަހެޅި މައްސަލަ ބަލައިގަތުމާއި މެދު ގޮތް ނިންމީ ހައި ކޯޓްގެ ރަޖިސްޓްރާ މަރިޔަމް ހޫރުޝީދާއެވެ. އެގޮތުން ރަޖިސްޓްރާ ނިންމެވީ އެ މައްސަލަ އަކީ މަޖިލީހުގެ ގާނޫނުން ލިބޭ ބާރަކުން ރައީސް އިބްރާހީމް މުހައްމަދު ސޯލިހު ނެރުއްވި ގަރާރެއްކަން ހުށަހެޅި މައްސަލައިގެ ލިޔުމުން ބުނެދެވިފައި ނުވާ ކަމަށާއި އެހެންވެ އެ މައްސަލަ ކޯޓަށް ބަލައިގަނެވެން ނެތް ކަމަށެވެ.

މީގެ އިތުރުން ރަޖިސްޓްރާ ނިންމެވީ އެމައްސަލަ އަކީ ފުރަތަމަ މަރުހަލާގައި ރާއްޖޭ ހައިކޯޓަށް ބެލުމުގެ އިހްތިސާސް ލިބިފައިވާ މައްސަލައެއް ނޫން ގޮތުގައި އެވެ.

ސަރުކާރުގެ ޑެޕިއުޓީ މިނިސްޓަރަކަށް ހުންނަވައި ރާޣިބު ގދ. ތިނަދޫގެ އާބާދީގައި 10،000 ހަމަނުވާ ކަމަށްބުނެ އެ ރަށުގެ ސިޓީގެ ދަރަޖަ ބާތިލުކުރަން ހައި ކޯޓަށް ދުސްތޫރީ މައްސަލައެއް ހުށަހެޅުއްވުމާއި އެކު އޭނާ ވަނީ މަގާމުން ވަކޮކޮށްފައެވެ.

ރާގިބު ހައިކޯޓަށް ހުށަހެޅި ދުސްތޫރީ މައްސަލާގައި ވަނީ ތިނަދޫއަށް ރައީސް އޮފީހުގެ ގަރާރަކުން ސިޓީގެ ދަރަޖަ ދީފައިވަނީ އާބާދީ އާއި ގުޅޭގޮތުން ދައުލަތުގެ ލިޔުމެއް ގަސްދުގައި އޮޅުވާލައި، ދައުލަތުގެ އިދާރާއަކަށް ދޮގު މައުލޫމާތު ދީގެން ކަމަަށް ތުހުމަތުކޮށް ކައުންސިލާއި ކުރީގެ ރައީސުލްޖުމްހޫރިއްޔާގެ މައްސަލަ ބެލުމަށާއި ތިނަދޫއަށް ދީފައިވާ ސިޓީގެ ދަރަޖަ ބާތިލުކޮށްދޭންށެވެ.

ތިނަދޫއަށް ސިޓީގެ ދަރަޖަ ދިނީ މިދިޔަ އަހަރުގެ ސެޕްޓެމްބަރު މަހުގެ ތެރޭގައި ކުރީގެ ރައީސް އިބްރާހިމް މުހައްމަދު ސޯލިހުގެ ގަރާރަކުންނެވެ. އެގޮތުން ސިޓީގެ ދަރަޖަ ދިނުމުގެ ކުރިން ރިޔާސީ އިންތިހާބުގެ ކެމްޕެއިންގެ ތެރޭގައި އޭރުގެ ރިޔާސީ ކެނޑިޑޭޓު އަދި މިހާރުގެ ރައީސް ޑރ މުހައްމަަދު މުއިއްޒު ވެސް ވަނީ ތިނަދޫއަށް ސިޓީގެ ދަރަޖަ ދެއްވާނެކަން އިއުލާނުކުރައްވާފައި އެވެ.

ތިނަދޫއަށް ސިޓީގެ ދަރަޖަ ދެއްވުމަށް ފަހު އޭރުގެ ރައީސް އިބްރާހިމް މުހައްމަދު ސޯލިހު ވިދާޅުވެފައިވަނީ ލާމަރުކަޒީ ގާނޫނުގައިވާ ބުނާ ހުރިހާ ޝަރުތުތަކެއް ފުރިހަމަ ވާތީ ތިނަދޫ ސިޓީއަކަށް ހަދަން ނިންމައި، ގަރާރުގައި ސޮއިކުރެއްވީ ކަމަށެވެ. އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގައިވާ ގޮތުން ސިޓީއެއްގެ ދަރަޖަ ދިނުމުގައި ބަލާ މިންގަނޑުގެ ތެރޭގައި އާބާދީ 10،000 އަށް ވުރެ ދަށްނުވުން ހިމެނެ އެވެ.

މިހާރުގެ ރައީސް ޑރ މުހައްމަދު މުއިއްޒު ވަނީ މިއަހަރުގެ މާޗު މަހުގެ ތެރޭގައި ހުވަދުއަތޮޅު ދެކުނުބުރީ ތިނަދޫ ކައުންސިލަކީ، "ތިނަދޫ ސިޓީ ކައުންސިލް" ގެ ގޮތުގައި އަދި "ހުވަދުއަތޮޅު ދެކުނުބުރީ ތިނަދޫ ކައުންސިލްގެ އިދާރާ" އަކީ "ތިނަދޫ ސިޓީ ކައުންސިލްގެ އިދާރާ"ގެ ގޮތުގައި ހަމަޖައްސަވާފައި އެވެ. އެނިންމުން ރައީސް ނިންމެވީ ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނު (ޤާނޫނު ނަންބަރު 2010/7) 51 ވަނަ މާއްދާގެ (ރ) ގެ ދަށުން ކަމަށް ރައީސް އޮފީހުން މާޗު މަހުގެ 26 ވަނަ ދުވަހު ނެރުނު ދެންނެވުމެއްގައި ބުނެފައި ވެއެވެ.