ލުހާމްގެ ފަސް ލަނޑާއެކު ޚައިރާ ސްޕޯޓްސް އެކަޑަމީ އަތުން އެސްޖީސީއަށް ތަފާތުބޮޑު މޮޅެއް

ފ.ނިލަންދޫގައި މިހާރު ކުރިއަށްދާ ރަށްވެހި ޗެލެންޖު 2024 ގައި މިއަދު ހަވީރު ކުޅުނު މެޗުގައި އެންމެފަހުގެ ޗެންޕިއަން ސުޕަރ ޖެނަރޭޝަން ކުލަބު (އެސްޖީސީ) އާއި ޚައިރާ ސްޕޯޓްސް އެކަޑަމީ ވާދަކުރި މެޗު ފަސޭހަކަމާއެކު 12-1 ގެ ތަފާތުބޮޑު ނަތީޖާއަކުން ކާމިޔާބުކޮށް ލީގުބުރުގެ އެއްވަނަ ޓީމުގެ ގޮތުގައި އެސްޖީސީ މުބާރާތުގެ ފައިނަލުން ޖާގަހޯދައިފިއެވެ.

މުބާރާތުގައި އެސްޖީސީ ކުޅުނު ފުރަތަމަ މެޗުގައި 5-1 ގެ ނަތީޖާއަކުން ނިއު ޖެނަރޭޝަން ކުލަބު އަތުން މޮޅުވެފައިވާއިރު، ދެވަނަ މެޗުގައި އެންމެ ފަހުގެ ރަނަރަޕް ސްޕޯޓްސް ކުލަބު ފަހުލަވާން (އެސްސީއެފް) އަތުން އެޓީމު މޮޅުވީ 4-3 ގެ ނަތީޖާއަކުންނެވެ.

ޚައިރާ ސްޕޯޓްސް އެކަޑަމީގެ ފުރަތަމަ މެޗުގައި 9-2 ގެނަތީޖާއަކުން އެސްސީއެފް ބަލިވިއިރު، ދެވަނަ މެޗުގައި ނިއު ޖެނަރޭޝަން ކުލަބު (އެންޖީސީ) އަތުން އެޓީމު ބަލިވީ 9-0 ގެނަތީޖާއަކުންނެވެ.

މުޅިމެޗުގައި ވެސް މޮޅަށް ކުޅެ އެސްޖީސީގެ އިން މެޗު ޑޮމިނޭޓްކުރިއިރު، ފުރަތަމަ ހާފުގެ ކުޅުން ނިމިގެންދިޔައީ 4-0 ގެ ނަތީޖާއަކުން އެސްޖީސީ ކުރީގައި އޮވެގެންނެވެ. އަދި މެޗުފެ ދެވަނަ ހާފުގައި އެސްޖީސީ އިން އެޓީމުގެ އެޓޭކުތައް އިތުރަށް ވަރުގަދަކުރިއިރު، މިހާފުގައި އެޓީމުން ވަނީ އިތުރު ހަ ލަނޑު ކާމިޔާބުކޮށްފައެވެ.

އެގޮތުން މިމެޗުގައި އެސްޖީސީގެ ލުހާމް އަބްދުއް ލަތީފް ފަސް ލަނޑު ކާމިޔާބުކުރިއިރު، އެޓީމުގެ ހަސަން ނަޒީމް ވަނީ ތިން ލަނޑު ކާމިޔާބުކޮށްފައެވެ. އަދި މީގެ އިތުރުން އެޓީމުގެ ހަސަން ރާއިފް އަދި އަޒުހާން ޚަލީލް މިއިން ކޮންމެ ކުޅުންތެރިއަކު ވަނީ ދެލަނޑު ކާމިޔާބުކޮށްފަ އެވެ.

މީގެ އިތުރުން މިމެޗުގައި ޚައިރާ ސްޕޯޓްސް އެކަޑަމީގެ ހަމައެކަނި ލަނޑު ދެވަނަ ހާފުގެ އިތުރު ވަގުތުތެރޭގައި އެޓީމުގެ މައީޝް މަހްމޫދު ކާމިޔާބުކުރިއިރު، މެޗުގެ މޮޅުކުޅުންތެރުއަކަށް ހޮވުނީ އެސްޖީސީގެ ލުހާމް އަބްދުއް ލަތީފް އެވެ.

މިނަތީޖާއެކު ކުޅުނު ތިން މެޗުން ވެސް މޮޅުވެ ލީގުބުރުގެ އެއްވަނަ ޓީމުގެ ގޮތުގައި އެސްޖީސީ ފައިނަލުން ޖާގަހޯދިއިރު މިމެޗުން ބަލިވި ޚައިރާ ސްޕޯޓްސް އެކަޑަމީ އިން މުބާރާތް ނިންމާލީ ކުޅުނު ހަތަރު މެޗުން ވެސް ބަލިވެ ޕޮއިންޓެއް ނުލިބި ލީގު ބުރުގެ ފުލުގައި އޮވެއެވެ.

ޗެންޕިއަން ޓީމަށް 20،000 އަދި ރަނަރަޕް ޓީމަށް 10،000 ރުފިޔާފެ ފައިސާގެ އިނާމެއް ހުށަހަޅާފައިވާ މިމުބާރާތަކީ ފ.އަތޮޅު ނިލަންދޫ ރަށްވެހި ގުރޫޕުން އިންތިޒާމުކޮށް 2019 ވަނަ އަހަރުން ފެށިގެން ކޮންމެ އަހަރަކު ނިލަންދޫގައި ބާއްވަމުން އަންނަ މުބާރާތެކެވެ.

މިމުބާރާތުގައި މިއަހަރު ހަތަރު ޓީމަކުން ވާދަކުރަމުން އަންނައިރު، މުބާރާތް ކުރިއަށްދަނީ ބައިވެރިވި ހަތަރު ޓީމުގެ މެދުގައި ލީގު އުސޫލުން ކޮންމެ ޓީމެއް ކޮންމެ ޓީމަކާއި އެއްމެޗުކުޅެ އެންމެ ރަނގަޅު ނަތީޖާއެއް ހޯދާ ދެޓީމު ފައިިނަލަށް ހޮވޭގޮތަށެވެ.

މީގެ އިތުރުން މި އަހަރުގެ މުބާރާތުގެ މެއިން ސްޕޮންސަރ އަކީ ނިލަންދޫ ދާއިރާގެ މަޖްލީސް މެންބަރު ފާތުމަތު ސައުދާ އެވެ.އަދި މީޑިއާ ޕާޓްނަރަކީ ގާފު ސްޕޯޓްސް އެވެ.