--
މިއަހަރު އެންމެ ގިނަ ބަޔަކު އެންމެ ބާރަށް ދެއްކި އެއްވާހަކައަކީ ސިގިރޭޓުގެ އަގު ބޮޑުވި ވާހަކައާއި ވޭޕް މަނާކުރި ވާހަކައެވެ. ގިނަ ބަޔަކު މިކަމާ ދެކޮޅު ހެދިނަމަވެސް ގަބޫލުކުރަންޖެހޭ ހަގީގަތަކީ މިއީ އޭގެ ސަބަބުން ސިއްހަތަށް އެތަކެއް ފައިދާކުރާނެކަމެއް ކަމެވެ.
ނަމަވެސް ހިތާމައަކީ މިކަމުން ފިލާވަޅެއް ލިބުމުގެ ބަދަލުގައި މިކަން އިތުރަށް ކުރެވެން އޮތް އެހެން މަގުތަށް ގިނަ ބަޔަކު އިޚްތިޔާރުކުރުމެވެ. އެހެންކަންކަމަށް އޮންނަ ބަޖެޓް ކުޑަކޮށްގެން ނަމަވެސް ސިގިރޭޓް ގަނެވޭތޯ ބަލާ މީހުން ވަރަށް ގިނައެވެ. އަދި ކުރިން ވޭޕް ބޭނުންކުރި މީހުން ސިގިރޭޓަށް ނުަވަތަ ޝީޝާއަށް ބަދަލުކުރިއެވެ.
މިއީ މި ގެއްލުންހުރި އާދަތަކުން އެއްކޮށް ހުއްޓަންވީ ވަގުތެވެ. އެހެންވީމާ އައު އަހަރުގެ ރިޒޮލިޔުޝަނަކަށް މި ކަންކަން އެއްކޮށް ހުއްޓުން ކިހިނެއްވާނެބާ؟
ދުންފަތުގެ އިސްތިއުމާލު ކުރުމަކީ އޭގެ ސަބަބުން ސިއްހަތަށް އެކަމުގެ އެތަށް ނޭދެވޭ އަސަރުތަކެއް ކުރާ ކަމެކެވެ. ދުންފަތުގެ އިސްތިއުމާލު ނުކުރާ މީހުންނަށް ވުރެ ދުންފަތުގެ އިސްތިއުމާލު ކުރާ ނުވަތަ ދުންފަތުގެ އެހެނިހެން ބާވަތްތައް ބޭނުންކުރާ މީހުން އެކި ބަލިތައް ޖެހުމުގެ ފުރުސަތު ބޮޑުވެއެވެ. މިކަން ދުނިޔޭގެ އެކި ދިރާސާތަކުން ވަނީ ސާބިތުވެފައި އެވެ
މި ކަންކަން އިނގުނު ނަމަވެސް ދުންފަތުގެ އިސްތިއުމާލު ކުރުން ހުއްޓާލުމަކީ ކިހާ އުނދަގޫ ކަމަކަށް ވެދާނެކަމާ މެދު ވެސް ގިނަ ބަޔަކު ކަންބޮޑުވެދާނެ އެވެ. އެއީ ނިކޮޓިން އަކީ ވަރަށް ބޮޑަށް އެޑިކްޓިވް/ ދެވިހިފާ އެއްޗެކަށްވާތިއެވެ.
ދުންފަތުގެ އިސްތިއުމާލު ކުރުން ހުއްޓާލުން ހާއްސަކޮށް އެހީއަކާ ނުލައި އެއީ އުނދަގޫ ކަމަކަށް ވެދާނެ އެވެ. ގިނަ މީހުންނަށް ފުރަތަމަ ފަހަރުން ހުއްޓާލަން މަސައްކަތް ކުރުމުން ކާމިޔާބެއް ނުލިބެ އެވެ. އެކަމަށް އެއް ފަހަރަށް ވުރެ ގިނަ ފަހަރު މަސައްކަތްކުރަން ޖެހިދާނެ އެވެ. އެކަމަކު ހަނދާނުގައި ބަހައްޓަންވީ ކަމަކީ ދުންފަތުގެ އިސްތިއުމާލު ކުރުން ހުއްޓާލެވިދާނެ އެވެ. އެއީ ނުވާނެ ވަރުގެ ކަމެއް ނޫންކަމެވެ.
އެންމެ ފުރަތަމަ ފިޔަވަޅެއްގެ ގޮތުން ދުންފަތުގެ އިސްތިއުމާލު ކުރުން ހުއްޓާލަން ނިންމާ އެކަމަށް އަޒުމް ކަނޑައަޅާށެވެ. އަދި ހުއްޓާލާނެ ތާރީޚެއް ކަނޑައަޅާށެވެ. ދެން ލިބެން ހުރި ވަސީލަތްތަކުގެ ބޭނުން ހިފައި، ކާމިޔާބުކަމާއެކު ދުންފަތުގެ އިސްތިއުމާލު ކުރުން ހުއްޓާލުމަށް މަސައްކަތްފަށާށެވެ.
ތިމާގެ އާއިލާއާއި ލޯބިވާ މީހުންނަށް އައު އަހަރާއި އެކު ދެވޭނެ މިއަށްވުރެ އަގުބޮޑު ހަދިޔާއެއް ނޯންނާނެއެވެ.
ފަހުގެ
