މިއަދުގެ މިވަގުތާއި ހަމައަށް ޣައްޒާއިން ޝަހީދުވި މީހުންގެ އަދަދު 27 އަށް!

މިއަދުގެ މިވަގުތާއި ހަމައަށް ޣައްޒާއިން ޝަހީދުވި މީހުންގެ އަދަދު 27 އަށް އަރައިފި އެވެ.

ރިޕޯޓުތައް ބުނާގޮތުގައި ފާއިތުވި ބައި ގަޑިއިރުގެ ތެރޭގައި ޔަހޫދީން ދިން ހަމަލާތަކުގައި ޣައްޒާގެ ފަސް މީހަކު ވަނީ ޝަހީދުވެފައި އެވެ. އަދި ގިނަ ބަޔަކު ގެއްލި، ބިމާވެފައިވާ ގެތަކުގެ ކުނިތަކުގެ ދަށުގައި ތާށިވެފައި އެބަތިއްބެވެ.

މިއަދު ހެނދުނު ޣައްޒާގެ މެދުތެރޭގެ އިރުމަތީ ސަރަޙައްދުގައި ބުރެއިޖް ރެފިއުޖީ ކޭމްޕްގެ އިރުމަތީ ސަރަޙައްދަށް ޔަހޫދީން ވަނީ ޑްރޯން ޙަމަލާއެއްވެސް ދީ ގިނަ ބަޔަކު ޝަހީދުކޮށްލާފައި އެވެ. އަދި ބެއިޓް ހަނޫން ސިޓީއަށް ދިން ޑްރޯން ހަމަލާއެއްގައި އިތުރު ހަތަރު މީހުން ވަނީ ޝަހީދުކޮށްލާފައި އެވެ.

ޖަބާލިއާއަށް ރޭ ދަންވަރު ޔަހޫދީން ދިން ހަމަލާއެއްގައި އެއް އާއިލާއެއްގެ ނުވަ މީހެއް ޝަހީދުކޮށްލާފައިވާއިރު ޣައްޒާގެ މެދުތެރޭ ސަރަހައްދު ކަމަށްވާ ޚާން ޔުނިސް ސިޓީ އާއި ޣައްޒާ ސިޓީގެ އެކި ހިސާބުތަކުގައި ފަތިހުން ފެށިގެން ދެމުންދާ ހަމަލާތަކުގައި ޝަހީދުވި މީހުންގެ އަދަދު ވަނީ 27 އަށް އަރާފައެވެ.

ޔަހޫދީން މިދިޔަ އަހަރުގެ އޮކްޓޯބަރު މަހުން ފެށިގެން ޣައްޒާއަށް ހުއްޓުމެއްނެތި ދެމުންދާ ހަމަލާތަކުގައި މިއަދާއި ހަމައަށް ޖުމުލަ 45,338 މީހުން ވަނީ ޝަހީދުވެފައި އެވެ. އޭގެ ތެރޭގައި ގިނައީ ކުޑަކުދިންނާއި އަންހެނުންނެވެ.